Dëgjoni

Një funksionar i Ministrisë së Kulturës të Kinës bëri të ditur ditët e fundit se për të mbrojtur burimet e pasura të trashëgimisë kulturore jomateriale, palët përkatëse po përpilojnë aktivisht një sërë masash konkrete dhe do t'i vënë së shpejti ato në zbatim në mbarë vendin. Ruajtja e trashëgimisë kulturore jomateriale nga Kina ka hyrë në fazën e mbrojtjes së gjithanshme.

Të dashur dëgjues, në nënrubrikën e sotme "Kultura në fokus", do të dëgjoni reportazhin me titull "Kina do të forcojë më tej mbrojtjen e trashëgimisë kulturore jomateriale ".

Gjatë procesit të zhvillimit të gjatë historik, kombi kinez ka krijuar trashëgimi të pasura dhe të larmishme shumë të çmuara kulturore jomateriale, ku përfshihen arti tradicional i shfaqjes, aktivitetet popullore të dokeve dhe zakoneve, ceremoni të ndryshme, aktivitete kremtuese të festave, si dhe mjeshtëri të punimeve me dorë të artizanatit tradicional.

Zv.drejtori i drejtorisë shoqërore e kulturore të Ministrisë së Kulturës të Kinës, z. Qy Shengrui, tha se tani ruajtja e trashëgimisë kulturore jomateriale ka hyrë në fazën e mbrojtjes me hartimin e masave konkrete, si mënyra e mbrojtjes së trashëgimtarëve, mënyra e mbrojtjes së zonave të trashëgimisë etj., në mënyrë që puna mbrojtëse të zhvillohet në thellësi dhe me efikasitet.

Duke folur për përmbajtjen e këtyre masave, ai tha: "Ne po krijojmë mënyrën e mbrojtjes së trashëgimtarëve për disa trashëgimtarë përfaqësues e do të hartojmë standardet. Pas paraqitjeve dhe shqyrtimeve do të publikohen një numër përfaqësuesish të trashëgimtarëve dhe t'u japim atyre përkrahje. Me anë të kësaj mënyre do të mbrojmë aktivitetet tradicionale të trashëgimtarëve, në mënyrë që objektet e trashëgimisë jomateriale të trashëgohen në mënyrë normale".

Përveç këtyre, Kina do të krijojë l0 zona të mbrojtura që kanë trashëgimi të pasura dhe të përqendruara kulturore jomateriale, duke i mbrojtur këto zona ashtu siç mbrohen zonat e mbrojtura natyrore. Qeveria kineze do të krijojë një numër muzesh për të shpëtuar të dhënat konkrete të trashëgimisë kulturore jomateriale dhe do të krijohet një mekanizëm i përsosur i koleksionimit.

Vitet e fundit Kina ka shtuar forcën e mbrojtjes së trashëgimisë kulturore jomateriale. Në vitin 2004, ajo hyri zyrtarisht në "Konventën e mbrojtjes së trashëgimisë kulturore jomateriale" të UNESKO-s dhe u bë një nga vendet që ka nënshkruar më herët këtë konventë. Në vitin 2005, Kina nisi në mbarë vendin veprën e hulumtimit të trashëgimisë kulturore jomateriale për të njohur në mënyrë të gjithanshme përhapjen dhe gjendjen e ruajtjes së këtyre trashëgimive. Në vitin 2006, Kina publikoi listën e grupit të parë me më se 500 objekte të trashëgimisë kulturore jomateriale në rang kombëtar dhe qysh nga ky vit, ka përcaktuar të dielën e dytë të qershorit të çdo viti si Ditën e Trashëgimisë Kulturore, duke organizuar aktivitete të ndryshme për të përhapur njohuritë mbi mbrojtjen e trashëgimisë kulturore jomateriale. Tani në mbi 50% të provincave janë përcaktuar listat e trashëgimisë kulturore jomateriale në rang province për të mbrojtur këto trashëgimi.

Një përgjegjës i Qendrës së mbrojtjes së trashëgimisë kulturore jomateriale të Kinës, z. Zheng Changling, vuri në dukje se, me hartimin e një numri të madh masash konkrete, ruajtja e trashëgimisë kulturore jomateriale ka hyrë në fazën e mbrojtjes së gjithanshme. Ai tha..2.. " Në të kaluarën, ne kemi bërë mbrojtjen e disa objekteve, kurse tani do të fillojmë mbrojtjen e gjithanshme të të gjithë trashëgimisë kulturore jomateriale, në mënyrë që ato të mbrohen dhe të trashëgohen me efikasitet".

Siç mësohet, edhe shkëmbimet dhe bashkëpunimi i Kinës në mbrojtjen e trashëgimisë kulturore jomateriale në arenën ndërkombëtare janë forcuar më tej. Në dhjetëditëshin e dytë të prillit, qeveria kineze organizoi në selinë e përgjithshme të UNESKO-s në Paris "Festivalin artistik të trashëgimisë kulturore jomateriale", për të demonstruar thelbin e trashëgimive dhe rezultatet e mbrojtjes së tyre. Në fund të majit, në qytetin e Kinës perëndimore Chendu do të organizohet edhe festivali i parë ndërkombëtar i trashëgimisë kulturore jomateriale. Përfaqësues nga më se 50 vende e rajone do të vijnë për të marrë pjesë në këto aktivitete.(Zhai)