Qeveria kineze mori masa të shumta dhe lëshoi një sërë direktivash për zhvillimin ekonomik dhe shoqëror të vendit tonë në harmoni me zhvillimin e popullsisë. Meriton të përmendet fakti se, gjatë hartimit të këtyre masave dhe direktivave, qeveria kineze u kushtoi rëndësi të veçantë vërejtjeve dhe propozimeve të specialistëve dhe dijetarëve. Në simpoziumin akademik mbi popullsinë dhe zhvillimin e Kinës, që u organizua para disa kohësh, dhjetëra specialistë dhe dijetarë të Akademisë së Shkencave të Kinës dhe të institucioneve të tjera të kërkimeve shkencore bënë diskutime dhe shkëmbyen mendime për shumë probleme që ekzistojnë në lëmin e popullsisë kineze.

Që nga vitet 70 të shekullit të kaluar, Kina ka ndjekur politikën e planifikimit familjar. Në saje të zbatimit të kësaj politike, në Kinë është ulur lindshmëria dhe, brenda 30 vjetëve, lindja ka qenë 400 milionë veta më pak sesa parashikohej. Specialistët thonë se ky sukses nuk u arrit lehtë dhe se duhet të ngulim këmbë në stabilizimin e nivelit të ulët të lindshmërisë. Për këtë, foli bashkëpunëtori shkencor i problemit të popullsisë pranë Akademisë së Shkencave të Kinës, zoti Tian Sye Yuan.

"Përse parashtrojmë tezën se edhe tani duhet medoemos ta vëmë theksin në kontrollin e numrit të popullsisë? Sepse karakteri thelbësor i problemit të popullsisë së Kinës qëndron në tepricën e krahut të punës, gjë që përbën një presion të popullsisë mbi forcat prodhuese."

Në shumë vende të zhvilluara problemi i popullsisë qëndron në pamjaftueshmërinë e krahëve të punës, gjë që do të thotë presionin i forcave prodhuese mbi popullsinë. Kurse në Kinë ndodh e kundërta, rritja tepër e shpejtë e popullsisë për shkak të lindshmërisë tepër të lartë para 30 vjetëve ka qenë një nga sfidat kryesore ndaj Kinës.

Specialistët thonë se lindshmëria në Kinë ka zbritur tani në një nivel relativisht të ulët dhe se stabilizimi i këtij niveli është i domosdoshëm. Por kjo nuk do të thotë se sa më i ulët të jetë niveli i lindshmërisë, aq më mirë do të jetë, sepse ulja jashtë mase e lindshmërisë mund të shkaktojë vjetërimin e popullsisë dhe të vështirësojë më tej ngritjen e cilësisë së popullsisë, gjë që do të ndikojë negativisht mbi zhvillimin ekonomik dhe shoqëror të Kinës. Të njëjtin mendim shprehu edhe bashkëpunëtori shkencor i problemit të popullsisë pranë Akademisë së Shkencave të Kinës, zoti Tian Sye Yuan.

"Edhe unë kam këtë mendim. Duhet të stabilizohet niveli i ulët i lindshmërisë. Por kjo nuk do të thotë që të ndryshojë parimi i lindjes së një fëmije. Ne duhet që, duke u nisur nga realiteti, të ruajmë nivelin e ulët të lindshmërisë në një kufi shkencor dhe racional."

Profesor Vu Cang Ping i Qendrës së studimit të popullsisë dhe zhvillimit pranë Universitetit Zhong-guo Renmin thotë se deri në vitin 2020 numri i njerëzve mbi moshën 65-vjeçare në Kinë do të arrijë në 164 milionë veta, shifër kjo që do të përbëjë 11.2 % të popullsisë së gjithë vendit. Parashikohet se në fund të viteve 40 të këtij shekulli, numri i njerëzve të moshuar në Kinë do të arrijë kulmin, d.m.th një nga 3 a 4 kinezë një vetë do të jetë mbi 65 vjeç. Me vjetërimin e popullsisë, do të shtohet presioni mbi sistemin e sigurimeve shoqërore dhe sistemin e shërbimeve komunale. Përveç kësaj, si rrjedhim i papërsosmërisë së rendit të sigurimeve shoqërore në fshat, një numër i madh njerëzish të moshës së re dhe të moshës së mesme do të shpërngulen nga fshati në qytet, gjë që do të acarojë më tej gjendjen e vjetërimit të popullsisë në fshat.

Drejtoresha e Qendrës Kineze të studimit të popullsisë dhe zhvillimit, zonja Ma Li shfaq shqetësim të madh për shtimin e raportit të djemve ndër foshnjat që do të lindin.

"Dukuria e raportit të lartë të djemve ndaj vajzave ndër foshnjat e lindur është një gjë që prek një sferë gjithnjë e më të gjerë. Rritja e popullsisë në këtë mënyrë mund të sillte një problem shumë të madh shoqëror."

Zonja Ma Li thotë gjithashtu se qeveria jonë duhet medoemos të marrë masa komplekse për të frenuar vazhdimin e kësaj dukurie. Duhet të hartohen ligje ose rregulla ligjore për barazinë midis meshkujve dhe femrave dhe të përsosen më tej rregullat ligjore të mbrojtjes së të drejtave dhe interesve të ligjshme të grave dhe fëmijëve. Ajo kërkon që të dënohen rreptësisht dhe me ligj veprimet e atyreve që dallojnë paraprakisht seksin e fetusit jashtë nevojave mjekësore dhe që ndërpresin shtatzënësinë me qëllim të zgjedhjes së seksit jashtë nevojave mjekësore dhe që të dënohen krimet e njerëzve që mbytin ose hedhin tej foshnjat femra.

Drejtori i Komisionit Shtetëror kinez të popullsisë dhe planifikimit familjar, zoti Ma Veiqing thotë se shteti kinez ka plan që, brenda një kohe nga 10 deri në 15 vjet, të realizohet në përgjithësi normalizimi i raportit të djemve me vajzat ndër foshnjat. Ai thotë se qeveria kineze i kushton vëmendje edhe zgjidhjes së problemit të vjetërimit të popullsisë. (Zheng)