dëgjoni

Ashtu siç bëhen zakonisht prova të shumta para se të shfaqet një program i bukur artistik, kështu edhe para fillimit të lojërave olimpike do të zhvillohen gara prove, në mënyrë që të kontrollohet shkalla e përgatitjes që bën vendi organizator dhe të shihet gatishmëria e instalimeve përkatëse. Kohët e fundit, Komisioni Organizativ i Lojërave Olimpike të Pekinit bëri të ditur se, duke filluar nga korriku i këtij viti, do të organizohet një seri e garave të provës të 40 sporteve, me temë "Pekini fatmirë". Kjo do të jetë një provë e përgjithshme para Lojërave Olimpike të Pekinit të vitit 2008.

Në një konferencë shtypi, që u organizua kohët e fundit në Qendrën e Shtypit të Lojërave Olimpike të Pekinit, nënkryetari i Komisionit Organizativ të Lojërave Olimpike të Pekinit, zoti Yang Shu-an foli për gjendjen e përgatitjes së këtyre garave të provës. Ai tha se në vitin 2007, që është një vit vendimtar për përgatitjen e Lojërave Olimpike të Pekinit, të gjitha punët e përgatitjes do të përfundojnë në përgjithësi; të gjitha stadiumet dhe pallatet e sporteve, qofshin ato të garave apo të stërvitjeve, do të vihen njëri pas tjetrit në provë; organizatat e garave dhe programet e punës do të kontrollohen në praktikë; punonjësit dhe vullnetarët, që do të marrin pjesë në shërbim gjatë Lojërave Olimpike të Pekinit, do të kaliten dhe do të kualifikohen në praktikë. Prandaj Komisioni Organizativ u kushton shumë rëndësi këtyre garave të provës.

"Kemi përcaktuar datën, kohën, vendin dhe rregullat e garave të të gjitha sporteve. Programet e garave janë miratuar nga federatat sportive përkatëse ndërkombëtare. Të gjitha punët e përgatitjes po kryhen mbarë."

Këto gara të provës do të zhvillohen për një kohë të gjatë. Yang Shu-an tha se gjatë këtyre garave të provës do të vihen në përdorim të gjitha stadiumet, pallatet dhe instalimet e Lojërave Olimpike të Pekinit të vitit 2008.

Zoti Yang Shu-an tha se organizimi i çdo gare të një sporti na kërkon që të hartojmë një program të masave urgjente në raste të papritura. Aq më tepër, një nga detyrat tona të rëndësishme për organizimin e lojërave olimpike është hartimi i një programi të masave urgjente në raste të incidenteve të papritura. Po të dalin probleme të papritura të llojeve të ndryshme gjatë garave të provës, që do të organizojmë, kjo do të ndihmojë përsosjen e programit të masave urgjente të Lojërave Olimpike të Pekinit të vitit 2008 dhe do të ushtrojë një ndikim pozitiv mbi organizimin me sukses të tyre.

"Për shembull, si do të organizojmë disa gara jashtë në rast shiu? Organizuesit e çdo loje sportive mund të ndeshen me këtë problem dhe duhet medoemos të bëjnë përgatitjet e duhura, të cilat ne i quajmë programin e masave urgjente. Kjo është një nga normat bazë të punës organizative për organizatorët e garave sportive ose një nga pikat e domosdoshme të procedurës së punës organizative."

Garat e provës me temë "Pekini fatmirë" do të demonstrojnë paraprakisht Lojërat Olimpike të Pekinit të vitit 2008, por kjo seri garash kanë dallim esencial me garat e lojërave olimpike.

"Nëpërmjet garave të provës do të kontrollojmë stadiumet dhe pallatet e ndërtuara për Lojërat Olimpike të Pekinit. Por duke bërë një kontroll të tillë, kemi për qëllim që të shohim nëse ato mund të plotësojnë kërkesat e lojërave olimpike nga anët e sistemit teknik dhe të funksioneve të tyre. Pjesëmarrësit në këto gara nuk mund të shpresojnë se të gjitha garat do të jenë të njëllojta me garat e lojërave olimpike. Në të vërtetë garat e provës, që do të organizojmë kësaj here, nuk do të jenë tamam si garat e lojërave olimpike."

Sido qoftë, seria e garave të provës me temë "Pekini fatmirë" do të jetë një rast për të kalitur në mënyrë të gjithanshme punonjësit e përgatitjes së Lojërave Olimpike të Pekinit. Prandaj zoti Yang shpreson se të gjithë sektorët që kanë lidhje me përgatitjen e Lojërave Olimpike të Pekinit do të marrin pjesë me seriozitet në këto aktivitete. (Zheng)