Yue Fei, me të cilin do t'ju njohim në rubrikën e sotme, lindi në vitin 1103 të erës sonë dhe jetoi në një periudhë të vështirë, kur regjimi i dinastisë Song ishte i kalbur dhe populli bëhej viktimë e agresionit të vazhdueshëm nga jashtë. Asokohe, kombësia Nyzhen në Kinën Verilindore të sotme, një kombësi nomade që jetonte me blegtori shtegtare, krijoi dinastinë Gjin me sistem skllavopronar, e cila filloi të sulmonte drejt fushave qendrore kineze të sunduara nga dinastia Song. Perandori Huizong i dinastisë Song, që e zuri paniku, shpalli abdikimin nga froni perandorak dhe ngriti birin e tij të madh, princin trashëgimtar në fron, i cili u quajt perandori Qinzong. Në vitin 1127, forcat e armatosura të dinastisë Gjin pushtuan kryeqytetin Kaifeng të dinastisë Song dhe zunë rob Huizong dhe Qinzong. Zhao Gou, një bir tjetër i Huizongut, iku në mes të rrëmujave dhe arriti në jug, ku krijoi një regjim me Hangzhoun si kryeqytet dhe u orvat që, duke shfrytëzuar lumin Jance si një mburojë natyrore, të mbrohej nga agresioni i vazhdueshëm i dinastisë Gjin. Regjimi i ri, i krijuar nga Zhao Gou, u quajt në historiografi "dinastia Song Jugore".

Përballë agresionit nga jashtë, grupi i sundimtarëve të dinastisë Song Jugore u nda në dy sekte diametrisht të kundërta. Njëri prej tyre ishte për rezistencën e vendosur dhe për rimarrjen e tokave të humbura, kurse tjetri ishte për pajtimin me pushtuesit duke u dhënë toka të tjera dhe duke u paguar dëmshpërblime lufte. Raporti i forcave midis dy sekteve ndryshonte herë pas here me ndryshimin e qëndrimit të perandorit. Në sektin e rezistencës bënte pjesë edhe oficerijo i lartë Yue Fei, i cili u shqua si trim i madh dhe demonstroi zgjuarësinë dhe talentin e tij në luftë. Prandaj ai u gradua shpejt dhe u bë gjeneral.

Yue Fei komadoi trupat e tij në luftën e vendosur të rezistencës, duke përdorur mënyrat e sulmit të befasishëm, të trazirave dhe të goditjes në pritë. Me fitoret e njëpasnjëshme, ai pengoi fuqimisht sulmet e armikut. Numri i trupave të tij u shtua shpejt në 300 mijë veta. Në vitin 1140, trupat e dinastisë Gjin filluan sërisht sulme në përpjesëtime të mëdha kundër dinastisë Song Jugore. Në luftën shumë të ashpër të rezistencës, trupat e Yue Feit fituan plotësisht.

Mirëpo në prapaskenë po zhvilloheshin bisedime për paqe midis dy palëve ndërluftuese dhe të dyja palët e urrenin Yue Fein duke e shikuar si halë në sy, sepse ai ishte i vendosur për rimarrjen e tokave të humbura. Ministri zemërkeq Çin Hui, që ishte i besuari i perandorit dhe që kishte lidhje intime me dinastinë Gjin, shpifi kundër Yue Feit, duke e akuzuar për "krim të rebelimit." Si rrjedhim, Yue Fei u dënua me vdekje në moshën 39 vjeçare. Më tej, i biri Yue Jun, që pati shumë merita në luftë, si dhe të afërmit e tjerë të Yue Feit u therën.

Pas 30 vjetësh, perandori i ri i dinastisë Song Jugore ringriti emrin e Yue Feit, duke nderuar kujtimin e tij dhe duke i dhënë titullin "Wumu", që do të thotë "Gjenerali i nderuar". Trupi i Yue Feit ishte varrosur në bregun e liqenit Sihu të Hangyhout. Në vitin 1221, banorët vendas ndërtuan atje varrezën dhe tempullin e Yue Feit, të cilat ruhen edhe sot si objekte historike. (Zheng)