Të dashur miq, kënga që ndoqët "Bozhure e bardhë e të dashurit"?është interpretuar nga këngëtarja Su Ping në stilin "huaer". Stili popullor i këndimit "huaer", i përhapur gjeërsisht në provincat Gansu dhe Qinghai, në Rajonin Autonom të Ningxia-Huit dhe në Rajonin Autonom të Singjiang-Ujgurit në veriperëndim të Kinës, pëlqehet shumë nga banorët e kombësive dongxiang, baoan, hui, sala etj. Ata shprehin me këngët "huaer" shpresat e tyre për jetën e lumtur dhe për dashurinë e bukur. Në programin e sotëm do t'ju paraqit artisten popullore Suping nga kombësia sala që interpreton këngët "huaer".

Këngëtarja 65-vjeçare Suping ka lindur në provincën Qinghai dhe quhet "mbretëresha e huaerit". Ajo këndon me zë të lartë e kumbues dhe në mënyrë të lirshme e të hapur. Suping tha se provinca Qinghai është vendlindja e këngëve "huaer" dhe ka shumë takime të këtyre këngëve. Në prill, korrik dhe tetor të çdo viti banorët vendës mblidhen në arë, në fushë, në pyll, në bregun e lumit, ku këndojnë sipas dëshirës, për të shprehur ndjenjat e veta dhe për të gjetur dashurinë. Takimi i këngëve "huaer" zgjat deri në të gdhirë. Suping është rritur pikërisht në një mjedis të tillë artistik:

"Jam nga një familje fshatare, kam marrë një edukim të mirë familjar dhe të vendlindjes. Që kur isha 16 vjeçe, fillova të këndoj këngët "huaer". Kam qenë në të gjitha takimet e këtyre këngëve në Gansu, Ningxia dhe Qinghai. Kam mësuar mjaft edhe nga shumë pedagogë të Konservatorit Qendror të Kinës."

Në vitin 1980, Suping këndoi në krahina të ndryshme të vendit këngët "huaer" si një nga programet e shquara të zgjedhura nga Ministria e Kulturës dhe u mirëprit shumë nga spektatorët. Në vitin 1984 ajo këndoi edhe në mbrëmjen artistike të Televizionit Qendror të organizuar me rastin e Festës së Pranverës, duke u bërë e njohur brenda dhe jashtë vendit. Ajo ka shkuar për shfaqje e vizitë edhe në Austri, Gjermani, Francë, Itali etj. Tani le të shijojmë së bashku këngën e famshme me titull "Çelin lulet shandan të së dashurës".

Këngëtarja Suping është nderuar shumë herë brenda e jashtë vendit, por për të mirëpritja e bashkëfshatarëve të vendlindjes është më e rëndësishme. Një herë, kur përfundoi shfaqjen në një minierë ari, erdhën mbi 10 minatorë që sapo dolën nga puna, të cilët dëshironin të dëgjonin këngët e saj, por kishin merak se mos ajo ishte e lodhur. Sa mori vesh këtë, ajo këndoi për këta minatorë mbi 10 këngë "huaer". Pasi kaluan ca kohë, ajo mori një letër nga këta minatorë, ku shprehej dashuria e tyre për interpretimin e saj dhe admirimi i tyre për virtytet e saj fisnike. Kjo gjë e preku shumë Suping-un.

"Spektatorët e mi janë si vëllezërit dhe motrat e mia, ata më duan shumë, zemrat e tyre janë të lidhura ngushtë me zemrën time. Më duket se ata janë mësues dhe miq besnikë. Këngët popullore janë të popullit, prandaj duhet t'i këndoj për popullin."

Këngëtarja Suping jo vetëm ka arritur suksese të mëdha në interpretimin e këngëve "huaer", por edhe ka mbledhur e sistemuar shumë këngë "huaer" nga gjiri i popullit, ka bërë studime teorike dhe ka shkruar shumë disertacione shkencore lidhur me këto këngë. Në të njëjtën kohë ajo jep leksione edhe në shumë universitete, ku mirëpritet shumë nga pedagogët e studentët. Kontributi që ka dhënë Suping për trashëgimin dhe mbrojtjen e këngëve "huaer" vlerësohet lart nga z. Han Xiaodong, profesor i Shoqatës së Artistëve Popullorë të Kinës.

"Këngëtarja Suping, si 'mbretëresha e këngëve huaer', ka luajtur një rol shumë të madh në përhapjen e këtyre këngëve. Gjatë karrierës së saj artistike dhjetëra vjeçare, ajo ka shkuar më se një herë në bazë, e ka krijuar stilin e vet të interpretimit."

Sot, adhuruesit e këngëtares Suping që janë të moshave të ndryshme, janë të përhapur në të gjitha krahinat e Kinës. Zonja mbi 20 vjeçare Çen Lu i tha korrespondentit se edhe të rinjtë si ajo i pëlqejnë shumë këngët e kënduara nga Suping.

"Profesoresha Suping këndon shumë bukur, edhe të rinjtë si unë e pëlqejnë shumë atë. Suping është mbi 60 vjeçe, por ajo ka ende zë të ëmbël. Unë shpresoj se gjithnjë e më shumë njerëz do të kenë mundësi të shijojnë interpretimin e saj, se kultura jonë kombëtare do të trashëgohet dhe do të çohet përpara."

Pak kohë më parë, unë e ndjeva nga afër forcën prekëse të interpretimit të Supingut në një koncert, shkruan korrespondenti, si dhe ndjeva edhe lidhjet e ngushta midis saj e spektatorëve. Në sallën e koncertit, spektatorët e pritën me duartrokitje të ngrohta "mbretëreshën e këngëve 'huaer'", Edhe drejtuesit e koncertit u prekën nga entuziazmi i spektatorëve.

"Profesoresha Su, kënduat shumë bukur, ne u mallëngjyem shumë duke dëgjuar interpretimin tuaj prapa skene. Dëgjuam edhe duartrokitjet e ngrohta të spektatorëve, prej të cilave ndihet dashuria e tyre për këngët e kënduara prej jush", tha drejtuesja e koncertit. "Ashtu është, -vazhdoi drejtuesi i koncertit, -kur ishim prapa skene, shumë spektatorë erdhën dhe na ngarkuan një detyrë, që t'ju themi të këndoni patjetër një këngë 'huaer'. Pas konsultimeve, vendosëm që të këndoni këngën 'Yiya yiya'". ( Pina )