Meqenëse ende ekziston në Kinë disniveli midis qytetit dhe fshatit në zhvillimin ekonomik dhe shoqëror, në fshatrat e Kinës, sidomos në fshatrat e krahinave perëndimore, niveli i shërbimit mjekësor ka qenë gjithmonë i ulët, pajisjet mjekësore kanë qenë të prapambetura, kuadrot në njësitë e mjekësisë kanë qenë të pamjaftueshëm dhe shpesh herë të sëmurët mbeteshin pa u vizituar tek mjeku vetëm për shkak të mungesës së parave. Për të zgjidhur këtë problem, qeveria kineze ka shtuar vitet e fundit investimet për zhvillimin e mjekësisë dhe higjienës në fshat. Masa të tilla ka marrë edhe qyteti Çongqing.

Një shembull është distrikti Qian-gjang në periferi të këtij qyteti, që ka një popullsi prej 500 mijë vetash dhe pjesa më e madhe e tyre jetojnë në fshatra. Një ditë në mëngjes, korrespondenti ynë shkoi në një nga këto fshatra. Fshatarja Fen Xiaomei e fshatit Liming, duke marrë me vete djalin e saj 1-vjeçar, erdhi në poliklinikën e lokalitetit, ku mjeku e vaksinoi djalin e saj për mbrojtjen nga hepatiti. Më pas, ajo i dorëzoi mjekut një fletë të gjelbër me titull "Fleta e shërbimit për vaksinim me plan". Kjo është një fletë e lëshuar nga qeveria për vaksinim falas.

Drejtoresha e kësaj poliklinike, zonja Li Gjie tha se qysh nga fillimi i zbatimit të vendimit për vaksinimin falas të fëmijëve, është ngritur dukshëm përqindja e prindërve që pranojnë vaksinimin e fëmijëve të tyre.

"Më parë, një pjesë e madhe e prindërve nuk pranonin vaksinimin të fëmijëve për shkak se ata duhej të paguanin. Kurse tani, meqenëse vaksinimi bëhet falas, të gjithë fëmijët vaksinohen, prandaj shëndeti i tyre është i siguruar."

Në rajonin Qian-gjang të periferisë së qytetit Çongqing, jo vetëm fëmijët gëzojnë shërbimin mjekësor falas për vaksinimin, por edhe gratë shtatzëna gëzojnë shërbimin për ekzaminimin mjekësor para dhe pas lindjes. Duke filluar nga korriku i vitit 2005, fshatarët e këtij distrikti marrin nga administrata lokale 4 lloje fletësh të shërbimit mjekësor, si ato të vaksinimit dhe ekzaminimit mjekësor të fëmijëve, të ekzaminimit mjeksor të shtatzënave para dhe pas lindjes. Kjo masë e marrë në këtë distrikt e ka lehtësuar shumë barrën e fshatarëve për mjekim. Ndërsa për të ardhurat financiare të poliklinikës së fshatit, mjafton që ajo të tërheqë llogarinë nga sektori përkatës i administratës lokale duke treguar fletët e shërbimit mjekësor të dorëzuar nga fshatarët.

Që në vitin 2003, Qian-gjang u bë një nga distriktet e periferisë së qytetit Çongqing që filluan të parat të zbatojë në mënyrë eksperimentale sistemin e ri të mjekimit të kooperuar në fshat. Sipas këtij sistemi mjekimi, fshatarët që marrin pjesë në të, paguajnë në vit vetëm 10 juanë për çdo frymë dhe gëzojnë shërbimin mjekësor, që subvencionojnë dikasteret financiare shtetërore dhe lokale me 50 juanë në vit për çdo frymë. Fshatarët mund t'i raportojnë llogaritarit 40% të shpenzimeve të mjekimit. Kurse ata që u mjekuan të shtruar në spital, mund t'i raportojnë llogaritarit 65 % të shpenzimeve të mjekimit dhe të barnave. Duke parë këtë leverdi, gjithnjë e më shumë fshatarë regjistrohen për të marrë pjesë në mjekimin e kooperuar. Deri në dhjetor të vitit të kaluar, 70 % të fshatarëve të rajonit Qian-gjang u regjistruan për të marrë pjesë në këtë sistem mjekimi.

Krahas shtimit të vazhdueshëm të subvencionimit të drejtpërdrejtë për mjekimin e fshatarëve, distrikti Qian-gjang investoi një fond të madh edhe për përsosjen e pajisjeve bazë mjekësore dhe për ngritjen e nivelit të shërbimit mjekësor dhe higjienik në fshat. Drejtori i shëndetësisë i këtij distrikti, zoti Luo Kui foli për të kaluarën e distriktit të tij.

"Në të kaluarën, mjekët në fshat nuk kishin nivel të lartë profesional dhe nuk zgjidhnin dot problemet themelore higjienike të fshatarëve. As radhët e kuadrove të mjekësisë në fshat nuk ishin të qëndrueshme. Poliklinikat e lokaliteteve nuk kishin ndonjë pajisje që mund të quhej aparat modern dhe mjekët bënin diagnozën vetëm duke u mbështetur tek stetoskopi, termometri dhe sfighomanometri, të cilat quhen 'tri aparatet bazë'."

Vitet e fundit, administrata e distriktit Qian-gjang investoi 20 milionë juanë për përsosjen e poliklinikave të lokaliteteve dhe të shtëpive të mjekësisë të fshatrave. Drejtori i poliklinikës së lokalitetit Zhongtang, zoti Vang Guzhang foli për gjendjen e poliklinikës së tij.

"Para vitit 2002, poliklinika jonë kishte një shtëpi të vjetëruar përdhese, prandaj fshatarët e konsideronin si një farmaci publike dhe jo një klinikë. Kurse sot, kemi pajisje moderne dhe kemi arritur objektivin që fshatarët të mos dalin nga fshati për mjekimin e një sëmundjeje të lehtë, të mos dalin nga lokaliteti për mjekimin e një sëmundjeje të rëndë dhe të mos dalin nga distrikti Qian-gjang për mjekimin e një sëmundjeje të rrezikshme." (Zheng)