Kinezët nuk kanë arritur rezultate të mira në sportin me biçikletë në rrugën automobilistike, megjithëse Kina është vendi që ka më shumë biçikleta në botë. Sot Li Fuyu u ka ndezur çiklistëve kinezë shpresën për të korrur suksese të mira në Lojërat Olimpike të Pekinit. Si një nga sportistët kinezë që u pranuan të parët në skuadrën e çiklistëve profesionistë, Li Fuyu ka potencial të madh që njihet nga sportistët e tjerë në arenën ndërkombëtare. Skuadra amerikane "Diskovery Kanal", që është skuadra më e njohur e çiklistëve në botë, e ka ftuar atë që të marrë pjesë në këtë skuadër. Në garën e parë me biçikletë në rrugën automobilistike nëpër ishullin Hainan të Kinës, që u organizua para disa kohësh, Li Fuyu tërhoqi vëmendjen e të gjithëve, edhe pse nuk fitoi garën.

Gjyqtari i kësaj gare, zoti Zhang Hongquan është i mendimit se meqenëse sporti me biçikletë është një sport me karakter kolektiv, çdo individ e ka të vështirë të fitojë pa kooperimin e pjesëtarëve të tjerë të skuadrës.

"Li Fuyu nuk mund të fitojë vetëm duke u mbështetur tek forca e tij. Sado i fuqishëm të jetë, ai si individ nuk mund të sfidojë një skuadër të huaj."

Çiklisti rus Sergej Kolesnikov, që fitoi titullin e kampionit si individ në garën me biçikletë në rrugën automobilistike nëpër ishullin Hainan të Kinës, thotë se ai nuk do të fitonte këtë titull pa ndihmën e anëtarëve të tjerë të skuadrës ndërkontinentale Dinamo të Moskës, ku bën pjesë ai.

Li Fuyu e ka të qartë se, duke qenë për një kohë të gjatë në një mjedis me nivel relativisht të ulët, ai jo vetëm nuk mund të ngrejë nivelin e vet, por përkundrazi, mund të ecë prapa. Për fat të mirë, kur atij i lindi dëshira për të marrë pjesë në ndonjë skuadër profesioniste të huaj të çiklistëve me nivel të lartë, ai gjeti përkrahjen aktive të Shoqatës Kineze të çiklistëve. Lidhur me këtë, foli sekretari i përgjithshëm i Shoqatës Kineze të çiklistëve, zoti Gjang Guofeng.

"Gjatë 2 vjetëve të fundit, Li Fuyu mori pjesë disa herë në gara botërore të nivelit të lartë, duke pasuruar përvojën e tij. Para disa kohësh, skuadra amerikane e çiklistëve Diskovery Kanal shfaqi interes për atë dhe ne e përkrahëm."

Në fakt, qysh në vitin 2005 Li Fuyu u pranua në skuadrën Marko Polo, që është e para skuadër profesioniste e çiklistëve në Kinë. Gjatë këtyre 2 vjetëve, ai gjeti një hapësirë të re dhe pati më shumë raste për të marrë pjesë në gara të rëndësishme, duke thelluar njohjen për administrimin dhe stërvitjen e profesionistëve dhe për modelet e garave.

Një rast i ri i artë i shtrohet para Li Fuyusë. Atë e ka ftuar skuadra amerikane e çiklistëve Diskovery Kanal, ku shërbeu dikur Lance Armstrong, që 7 herë u bë kampion në garën me biçikletë nëpër Francë. Kjo skuadër amerikane premtoi në kontratë se Li Fuyu do të marrë pjesë në garë çdo javë.

"Tani gjithçka shkon mbarë. Më tej, do të caktohet kampi i stërvitjeve. Më pas do të publikohet plani i pjesëmarrjes në gara për vitin e ardhshëm."

Po shkallëzohet gradualisht jeta e Li Fuzusë si një çiklist profesionist, duke u kthyer nga një çiklist gjysmë-profesionist në pjesëtar të një skuadër çiklistësh profesionistë me nivel të lartë. Objektivi i tij është që, pas fitimit të medaljes së arit në Lojërat Aziatike në vitin 2006, të mësohet me jetën në skuadrën amerikane të çiklistëve Diskovery Kanal në vitin 2007 dhe të fitojë mandatin për të marrë pjesë në Lojërat Olimpike të Pekinit në vitin 2008 dhe të veprojë si duhet pranë portës së shtëpisë së vet.

"Unë jam i bindur se do të dal faqebardhë në Lojërat Olimpike të vitit 2008, sepse do të marr pjesë në garë para portës së shtëpisë sime."

Li Fuyu po përgatit ëndrrën e tij, ndërsa rruga e tij stimulon edhe ëndrrën e çiklistëve të tjerë kinezë. Ai thotë se shpreson që, si një pararojë e çiklistëve kinezë drejt botës, ai do të krijojë përvojë për çiklistët kinezë të mëvonshëm. (Zheng)