Në prill të vitit të kaluar këngëtarja e re kineze Lei Jia nxori në qarkullim albumin e ri me këngë popullore të titulluar "Qielli i radhiqeve". Në programin e sotëm të muzikës kineze ju ftoj të dëgjoni disa këngë nga ky album i saj.

"Hëna ime është varur në qiell, duke pritur djalin tim t'i bjerë lushengut (një vegël muzikore kineze). Nata më bën flokët e gjatë të zinj, flladi i lehtë fryn rrobat e mia. Hija e hënës valëvitet mbi sipërfaqen e ujit, zemra më fluturon drejt qiellit."

Kënga që ndoqët, është një këngë popullore e kombësisë tai të provincës Yunnan në jugperëndim të Kinës me titull "Ngjyra e hënës", interpretuar nga këngëtarja Lei Jia. Kënga e shoqëruar me veglat muzikore kineze zhongzhuan, guzheng, bawu etj. përshkruan bukurinë e natës me hënë.

Këngëtarja e re Lei Jia ka lindur në qytetin Yiyang të provincës Hunan. Kur ishte 14 vjeçe ajo hyri në shkollën artistike të provincës, ku mësoi operën lokale huagu të provincës Hunan. Pas mbarimit të kësaj shkolle ajo u pranua në Konservatorin e Kinës për të studiuar muzikën vokale popullore. Në vitin 2002 ajo u bë këngëtare soliste në Ansamblin e këngëve dhe valleve të Drejtorisë së Përgjithshme Politike të Ushtrisë Popullore Çlirimtare Kineze.

Kënga që ndoqët është një këngë popullore e kombësisë mongole me titull "Thirrja e nënës", kënduar nga Lei Jia.

"Qielli i radhiqeve" është albumi i dytë i Lei Jia-së, në të cilin përfshihen 12 këngë popullore kineze.

Kënga që dëgjuat është një këngë popullore e provincës Hunan me titull "Më merr malli për të". Kjo është një këngë e bukur dashurie, e interpretuar nga Lei Jia në dialektin e provincës Hunan. Ajo me melodinë entuziaste dhe të gjallë shpreh ndjenjat modeste dhe të hapura midis të dashuruarve.

Më poshtë do të shijojmë së bashku një këngë të kombësisë gelao me titull "Vajzat lajnë rroba në lumë".

Kombësia gelao është një nga pakicat kombëtare me më pak popullsi që jeton në pjesën jugperëndimore të Kinës. Këngët popullore zënë një vend shumë të rëndësishëm në jetën e banorëve të kësaj kombësie. Të gjithë banorët, burra e gra, pleq e fëmijë duan të këndojnë, dhe në çdo fshat ka këngëtarë të shkëlqyer. "Vajzat lajnë rroba në lumë" është një këngë popullore interesante dhe me shije jetësore, e cila përshkruan një tablo entuziaste, ku djemtë e vajzat luajnë buzë lumit. Në këngë thuhet: "Vajzat lajnë rrobat në lumë, duke qëndruar në shkëmbinj të blertë. Ato i rrahin rrobat me shkopinj, sytë të drejtuar nga djemtë..."

Këngëtarja Lei Jia ka zë të bukur e të ëmbël me forcë zhbiruese. Këngët e interpretuara prej saj "Lulet e kallamave", "Vajzat e ujit" etj. janë mirëpritur ngrohtësisht nga artdashësit.

Në vitin 2004 në Konkursin e 11-të televiziv kombëtar të këngëtarëve të rinj Lei Jia fitoi çmimin e artë në grupin e këngëve popullore.

Në fund të programit të sotëm, do të shijojmë së bashku këngën popullore të provincës Sichuan me titull "Çelin lulet huaihua", kënduar nga Lei Jia. Kjo këngë përshkruan një vajzë që është duke pritur të dashurin e saj mbështetur te gardhi. Kur ajo është zhytur në mendime, e ëma e pyet ç'po mendon? Ajo i përgjgjet: "Po mendoj se kur do të çelin lulet huaihua". Kjo përgjigje e shkathët fshehu mendimin e saj të vërtetë dhe shpreh dëshirën e saj për jetën e bukur. ?Pina)