Në vitin 1994, pas diplomimit nga Universiteti Tsinghua, që është një universitet shumë i njohur në Kinë, Vang Vubin iu përvesh punës së ndërtimit të veprës hidraulike Sanxia në lumin Jance, një vepër e madhe që tërhoqi vëmendje në gjithë botën. Si një i diplomuar i ri, ai ndiente se derdhja e djersës në kantierin e ndërtimit të kësaj vepre të madhe do të jetë krenaria e tij edhe në të ardhmen. Mirëpo atij nuk i shkonte ndër mend se, pas disa vjetësh, ai mund të transferohej dhe të lidhej ngushtë me çështjen e Lojërave Olimpike të Pekinit.

"Mua më quajnë Vang Vubin. Pas diplomimit në vitin 1994, u dërgova për punë në Korporatën e Përgjithshme Kineze të Shfqytëzimit të Ngushticës Sanxia në lumin Jance. Atje punova rreth 9 vjet dhe në janar të vitit 2003 u transferova si një pjesëtar i grupit të parë të inxhinierëve pjesëmarrës në organizimin e punimeve të ndërtimit të Qendrës Kombëtare të Notit në Pekin, në bazë të kontratës përkatëse të nënshkruar midis korporatës sonë dhe Shoqërisë Investuese të Pekinit."

Ndër të gjitha objektet që janë ndërtuar ose që janë në ndërtim e sipër për Lojërat Olimpike të vitit 2008 në Pekin, Qendra Kombëtare e Notit është ndërtesa e konceptuar dhe e projektuar më me fuqi fantastike dhe më me frymë krijuese, madje u emërtua si "Kubi ujor", për arsye se sistemi i saj strukturor është në fakt zmadhimi i strukturës së molekulës mikroskopike të ujit.

Vang Vubin, si një nga inxhinierët arkitektë të grupit të parë pjesëmarrës në ndërtimin e kësaj vepre, ushqen ndjenja të patregueshme afërsie për "Kubin ujor". Prandaj ai gëzohet dhe emocionohet duke parë se kjo vepër e artit arkitektorale shfaq gjithnjë e më qartë bukurinë e saj tërheqëse në Zonën Qendrore Olimpike të Pekinit.

Por nga ana tjetër, si një arkitekt dhe sidomos si inxhinieri që përgjigjet për punimet në kantier, Vang Vubin pranon se gëzimi i tij shoqërohet shpesh herë me shqetësim në zemër. Forma e veprës "Kubi ujor" është një formë arkitektonike e strukturës me membranë, një formë krejt e re arkitektonike, e ngritur në fillim të shekullit të 21-të, e cila integron në një të tërë arkitekturën, dinamikën strukturore, kiminë preçize, shkencën e lëndëve, teknikën e kompjuterit etj. Deri tani, "Kubi ujor" është vepra më e madhe e strukturës me membranë në botë dhe është projektuar me fantazi të çuditshme. Kështu, vështirësitë në punimet e ndërtimit të kësaj vepre kanë qenë të papara. Vang Vubin është ndeshur shpesh herë në vështirësi të shumta ashtu si inxhinierët e tjerë dhe shqetësohet nëse projektet e tij mund të kalojnë provat e praktikës.

"Mua më duhet të them se dy gjëra patën rëndësi më të madhe dhe që na gëzuam më shumë. Më 10 prill të vitit të kaluar, u gëzuam për përfundimin e punimeve të konstruksionit të çelikut. Por ateherë ne inxhinierët nuk dinim nëse një strukturë me membranë u dukej e bukur banorëve të Pekinit, sepse kjo është një formë e re dhe askush në botë nuk e ka provuar më parë. Në qershor të vitit të kaluar, nga rezultati i kontrollit dhe provave doli se disa të dhëna ia kanë kaluar shumë të dhënave që i llogaritëm më parë gjatë projektimit. Ky është një rezultat që kristalizoi përpjekjet e të gjithë inxhinierëve tanë dhe të specialistëve të njësive projektuese dhe instituteve studimore të kërkimeve shkencore. Kështu, ne u gëzuam për herë të dytë. Tani nuk dyshojmë se mund ta bëjmë atë më të bukur."

Vang Vubin thotë se, si një inxhinier arkitekt, ai është me fat që iu dha rasti të kontribuojë në ndërtimin e veprës "Kubi ujor", duke u lidhur ngushtë me Lojërat Olimpike.

"Unë jam i mendimit se Lojërat Olimpike janë jo vetëm një takim madhështor i sportistëve. Në shekullin e 21-të, kur njerëzimi ka arritur në një shkallë të lartë zhvillimi, lojërat Olimpike përmbajnë shumë faktorë të tjerë. Edhe kinezët dhe emigrantët kinezë përtej deteve presin që vendi ynë të organizojnë me sukses Lojërat Olimpike. Ne inxhinierët dhe atkitektët duhet që, duke përfituar nga rasti i Lojërave Olimpike, të bëjmë disa ndërtesa me rëndësi epokale dhe me peshë të gurit themeltar në qarqet arkitektorale të botës."(Zheng)