Koha e dinastisë Song, nga shekulli i 10-të deri në shekullin e 13-të të erës sonë, qe periudha e kulmit të shkencës dhe teknikës së lashtë kineze. Teknika e shtypit me shkronja, që ushtroi një ndikim epokal mbi përhapjen e kulturës dhe që u radhit ndër "Katër shpikjet e mëdha koneze", krah për krah me busullin, teknikën e prodhimit të letrës dhe barutin, u shpik pikërisht nga mjeshtri Bi Sheng i kësaj periudhe, me të cilin do t'ju njohim në rubrikën e sotme.

Më parë, në Kinë përdorej teknika e shtypit me pllaka relievesh, teknikë që u krijua gjatë kohës së dinastisë Tang, nga shekulli i 7-të deri në shekullin e 9-të. Ajo teknikë ishte që tekstet dhe figurat të gdhendeshin në radhë të parë në pllaka druri dhe pastaj shtypeshin me bojë të zezë. Libri klasik "Gjin Gang Ging" i shekullit të 9-të, që ruhet edhe tani dhe që është libri më i hershëm i shtypur me atë teknikë në botë, paqyron nivelin e përparuar të teknikës së shtypit në Kinë në lashtësi. Deri në kohën e dinastisë Song, teknika e shtypit me pllaka relievesh kishte arritur në kohën e lulëzimit dhe ishin formuar 3 qendra të mëdha të shtypit në Hangzhou, Siçuan dhe Fugjan. Mirëpo reyultatet e asaj teknike ishin shumë të kufizuara. Për të shtypur një libër duhej një kohë mjaft e gjatë, sepse duhej të gdhendeshin tekstet dhe figurat në pllaka druri. Madje për të shtypur librin klasik "Da Zang Gjing" u deshën 22 vjet dhe u gdhentën 130 mijë pallaka druri. Kështu, në mes të shekullit të 11-të të erës sonë, Bi Sheng i bëri p;rmbledhje përvojës në përdorimin e teknikës së shtypit me pllaka relievesh dhe krijoi shkronja deltine. Duke filluar shtypin e librave me anë të radhitjes së teksteve me shkronja deltine, ai realizoi një revolucion të rëndësishëm në historinë e shtypit.

Ne e njohim punën e Bi Shengut kryesisht nga libri "Shënime pranë përroit Mengsi" i shkencëtarit të famshëm të dinastisë Song, Shen Kuos. Në librin e tij janë shënuar me hollësi tërë procesi i shtypit me shkronja deltine dhe gjendja e përgjithshme e shpikjes së kësaj teknike. Por për gjithë jetën dhe veprimtarinë e Bi Shengut, në këtë libër shkruhet vetëm se Bi Shengu lindi në provincën Anhui të sotme të Kinës Lindore, kishte qenë një banor i thjeshtë dhe punoi në Hangzhou ku ishte njëra nga 3 qendrat e mëdha të industrisë së shtypit të asaj periudhe.

Në librin e Shen Kuos shkruhet gjithashtu se në fillim Bi Shengu u mundua të bënte shkronja prej druri, por meqenëse druri deformohej kur ishte i lagur, ai vendosi më në fund të bënte shkronja prej deltine.

Teknika e shtypit me shkronja karakterizohet nga përdorimi i përsëritur i tyre dhe nga shpejtësia e shtypit në sasi të madhe, prandaj ajo pati epërsi të madhe në krahasim me teknikën e shtypit me pllaka relievesh. Më pas, u krijuan radhazi edhe shkronja prej qeramike, druri, bronzi, plumbi etj. Teknika e shtypit me shkronja, e shpikur nga Bi Shengu, u përhap radhazi në Japoni, Kore dhe vendet evropiane. Shpikja e tij ushtroi një ndikim direkt ose indirekt në zhvillimin e industrisë së shtypit dhe në përhapjen e kulturës në Azi dhe në gjithë botën. (Zheng)