Kënga që po dëgjoni është pjesë e operës italiane "Berberi i Sevilles" e kënduar nga Liao Changyong. Gjatë shfaqjes së kësaj opere në Shangai, një shikues i ardhur nga Venecia vlerësoi se Liao Changyong interpretoi shumë mirë rolin kryesor të operës, bile më mirë se aktorë perëndimorë. Opera është arti tradicional i Perëndimit, zakonisht këngëtarët aziatikë kanë vështirësi të interpretojnë shumë mirë operat. Krahas talentit të lindur, suksesi i Liao Changyongut vjen kryesisht nga përpjekjet e palodhshme.

Liao Changyong lindi në vitin 1968 në një familje fshatarësh në provincën Sicuan të Kinës jugperëndimore. Babai i tij vdiq kur ishte ende në moshë të re. Ai mbaroi mësimet e shkollës fillore dhe të mesme me ndihmën financiare të 3 motrave të tij. Rastësisht Liao Changyong pati kontakte me operën dhe i pëlqeu menjëherë:

"Vendlindja ime është në një fshat të varfër. Kur isha i vogël, nuk kisha kushte të njoh artin e muzikës vokale dhe operë. Një herë dëgjova në radio këngën 'Dielli im' të kënduar nga tenori i famshëm Placido Domingo, melodia e bukur më preku thellë. Kështu më lindi interes i madh për këtë art."

Kur ishte në moshën 19-vjeçare, Liao Changyong u pranua nga Universiteti i Muzikës i Shangait. Me fillimin në universitet, Liao Changyong nuk ishte mësuar fare me jetën e re në qytet të madh. Njëkohësisht për shkak të mungesës së përgatitjes bazë, Liao Changyong hasi shumë vështirësi në studimet. Për fat të mirë, pedagogja e tij Zhou Xiaoyan e ndihmoi shumë. Zhou Xiaoyan është soprano e parë në Kinë. Gjatë shfaqjes në vitet '40 të shekullit të kaluar në vende të ndryshme të botës, shikuesit e quanin "bilbili i Kinës". Profesoresha Zhou jo vetëm i mësoi Liao Changyongut teorinë, por edhe i kujdesej shumë për jetën e tij.

Nëpërmjet studimeve të palodhshme, në vitin 1993, Liao Changyong u diplomua me rezultatet më të mira ndër bashkëstudentët. Nga viti 1996 deri në vitin 1997, Liao Changyong fitoi me radhë çmimin e parë të 3 konkurseve të rëndësishme ndërkombëtare të muzikës vokale duke ngjallur jehonë të madhe në arenën muzikore ndërkombëtare. Mbretëresha e Norvegjisë Songja tha e emocionuar: "Liao Changyong është një këngëtar i madh."

Për të kënduar mirë operë, këngëtarët duhet të zotërojnë gjuhë të ndryshme të huaja. Liao Changyong ka studiuar me zell gjuhë të huaja si gjuha angleze, gjuha italiane, gjuha franceze etj. Në konkursin ndërkombëtar të muzikës vokale të Parisit të Francës, Liao Changyong fitoi çmimin e parë të këndimit në gjuhën franceze. Çdo specialist e shikues vlerësuan lartë këndimin e tij në gjuhën e pastër franceze.

Në vitin 2001, në teatrin e operës të Uashingtonit, Liao Changyong interpretoi rolin kryesor të operës së Giusepe Verdit "Il Trovatore" duke fituar përshëndetjen e njëzëshme. Media vendëse komentoi: "Liao Changyong i ardhur nga Kina është ylli i vërtetë. Ai është këngëtari i lindur i operës së Verdit."

Tani Liao Changyong është shefi i fakultetit të muzikës vokale të Universitetit të Muzikës të Shangait dhe merret kryesisht me përgatitjen e kuadrove. Ai shpreson se do të përgatitë më shumë këngëtarë të shquar të operës, kështu çështja e operës e Kinës do të zhvillohet më tej:

"Dëshira më e madhe e një pedagogu është që të përgatiten sa më shumë studentë të shquar. Jam shumë i gëzuar për çdo përparim të studentëve."

Liao Changyong shpreson gjithashtu se më shumë artistë kinezë do të shkojnë jashtë vendit për shkëmbime për të përhapur më tej kulturën kineze. (Fani)