dëgjoni

Në një konferencë shtypi të organizuar nga Komisioni Organizativ i Lojërave Olimpike të Pekinit, nënkryetari i degës së fizkulturës masive të Drejtorisë së Përgjithshme Shtetërore të Fizkulturës dhe Sporteve të Kinës, zoti Shy Çuan bëri të ditur se drejtoria e tij do të organizojë këtë vit në mbarë vendin 65 aktivitete fizkulturore masive në përmasa të mëdha me temë "Kalitja fizike masive që ecën paralelisht me Olimpiadën", në mënyrë që, krahas kalitjes fizike të masave popullore, të bëhet propagand për mobilizimin e banorëve në përgatitjen e Lojërave Olimpike që do të organizohen në vitin 2008 në Pekin.

Zoti Shy Çuan shprehu mendimin se ky vit është një vit kyç për përgatitjen e Lojërave Olimpike të Pekinit. Në një kohë të tillë, zhvillimi i aktiviteteve fizkulturore masive në shkallë kombëtare është i dobishëm për t'u dhënë një shtytje qarqeve të ndryshme shoqërore të Kinës që t'u kushtojnë më shumë vëmendje Lojërave Olimpike të Pekinit. Nga ana tjetër, kemi qëllim që nëpërmjet entuziazmit të masave popullore për Lojërat Olimpike, të ngrihet më tej një fushatë e kalitjes fizike masive në Kinë. Si rezultat, procesi i përgatitjes dhe organizimit i Lojërave Olimpike të Pekinit do të bëhet edhe një proces i shtytjes përpara të kalitjes fizike të masave popullore për forcimin e mëtejshëm të shëndetit.

"Një detyrë e rëndësishme për Drejtorinë e Përgjithshme Shtetërore të Fizkulturës dhe Sporteve të Kinës është që të kapet fort pas stërvitjeve të sportistëve që do të marrin pjesë në Lojërat Olimpike të Pekinit. Por detyra jonë kyçe është gjithmonë që të punojmë për rritjen e cilësisë shëndetësore të popullit. Edhe në kohën e stërvitjeve intensive të sportistëve nuk do të dobësojmë kryerjen e detyrës sonë kryesore."

Zoti Shy Çuan shfaqi shpresën se, duke përfituar nga rasti i volitshëm i organizimit të Lojërave Olimpike, do të bëjmë që në vitet e ardhshme të rritet numri i banorëve që marrin pjesë në aktivitet fizkulturore të paktën tri herë në javë.

"Në disa vende të zhvilluara, 50-60 % të banorëve marrin pjesë të paktën tri herë në javë në kalitjen fizike, madje kjo përqindje arrin në 70 %. Kurse në vendin tonë, kjo përqindje është nën 34 %. Objektivi ynë është që, deri në vitin 2010, kjo përqindje në vendin tonë të arrijë në 40 %."

Na kënaq fakti se, me vënien në jetë të rendit të punës 5 ditë në javë dhe me shtimin e ditëve të pushimit me rastin e festës kombëtare dhe të Ditës Ndërkombëtare të punonjësve, masat popullore të Kinës kanë më shumë kohë për të marrë pjesë në kalitjen fizike. Opinioni shoqëror u bën thirrje edhe punonjësve shumë të zënë me punë "të mobilizohen" dhe të hidhen në kalitjen fizike. Zoti Shy Çuan tha se, si reaultat i ngritjes së vetëdijes së masave popullore për forcimin e shëndetit, një numër i konsiderueshëm masash popullore morën pjesë në aktivitetet fizkulturore masive në përmasa të mëdha, që u organizuan vitet e fundit.

"Tani gjendja ka ndryshuar dhe nuk është më si në të kaluarën, kur shqetësoheshim nëse banorët do të merrnin pjesë apo jo në aktivitetet fizkulturore që organizonim. Përkundërazi, sa herë që organizojmë tani aktivitete të tilla, kemi merak se mos regjistrohen shumë njerëz dhe fusha nuk i përbalojnë dot."

Zoti Shy Çuan thotë se në bazë të planit të aktiviteteve fizkulturore për vitin 2007 me temë "Zhvillimi i aktiviteteve fizkulturore masive në Kinë në kuadrin e vitit të përgatitjes së Lojërave Olimpike", Drejtoria e Përgjithshme Shtetërore e Fizkulturës dhe Sporteve të Kinës do të organizojë në mbarë vendin një sërë aktivitetsh fizkulturore masive në përmasa të mëdha dhe ndeshjesh e garash sportive me ndikim të gjerë, si alpinizmi, ndeshjet e ping-pongut, noti, ndeshjet e tenisit, gjimnastika, gara me varka dragonjsh dhe vallja e luanit, që u pëlqejnë shumë masave popullore kineze. Aktivitete të tilla do të organizohen në çdo muaj të këtij viti. Drejtoria e Përgjithshme Shtetërore e Fizkulturës dhe Sporteve inkurajon sektorët lokalë të fizkulturës të organizojnë aktivitete të tilla edhe në krahinat e veta në vitin 2007. (Zheng)