Bao Zheng, me të cilin do t'ju njohim në rubrikën e sotme, qe një politikan i famshëm me pastërti morale në historinë kineze. Ai u tregua gjithmonë si një njeri i pastër moralisht, i drejtë, i paanshëm dhe i pakorruptueshëm dhe nuk iu tremb asnjëherë kompentencave të aristokratëve. Prandaj populli e quante "Magjistratin e drejtë Bao". Gjatë 10 shekujve më pas, "Bao Zheng" ka qenë gjithmonë një emër i respektueshëm dhe i lavdërueshëm. Në Kinë ruhen edhe tani mjaft vepra letrare dhe gojëdhëna popullore për jetën dhe veprimtarinë e tij.

Bao Zheng jetoi në mesin e viteve të dinastisë Song Veriore (960-1127), kur ishte krijuar një gjendje e revoltimit të ushtarëve dhe kryengritjes së fshatarëve për shkak të barrave të rënda. Përballë një situate të atillë, Ban Zheng propozoi që të zhvillohej një reformë politike, të viheshin njerëzit e drejtë në postet zyrtare dhe të hiqeshin njerëzit djallëzorë. Në politikën ekonomike ai propozoi të pakësoheshin shpenzimet shtetërore për të zbutur shfrytëzimin e popullit. Në fushën ushtarake dhe në politikën e jashtme ai propozoi të merreshin masa për pasurimin e popullit, për fuqizimin e vendit dhe për forcimin e mbrotjes kufitare. Por për shkak të paaftësisë së sundimtarëve, masat e propozuara prej tij nuk u vunë në jetë.

Talenti dhe zgjuarësia e Bao Zhengut gjetën shfaqjen në trajtimin e drejtë dhe të prerë të çështjeve penale. Sapo nisi jetën politike, atij i doli një problem si një provë e ndershmërisë së tij. Njëri prej të afërmve të tij kishte shkelur ligjin dhe Bao Zheng e dënoi rreptë, duke respektuar ligjin seriozisht. Kjo gjë u bë një paralajmërim ndaj të afërmve të tij të tjerë që kujtonin kot se ata mund të vepronin si të donin dhe se Bao Zheng mund t'i merrte ata nën mbrojtje.

Në vitin 1056 të erës së re, kur ishte 57 vjeç, ai u bë kryetar i bashkisë së kryeqytetit, Kaifeng. Gjatë 1 viti në këtë post drejtues, ai zbatoi ligjin me rigorozitet, duke dënuar me guxim edhe aristokratët që kryenin krime. Me veprimet e tij të vendosura, u frenuan sjelljet me arrogancë të zyrtarëve të lartë në kryeqytet. Madje të afërmit e zyrtarëve dhe eunukët trembeshin me të dëgjuar emrin e tij. Edhe gratë shtëpiake dhe fëmijët e kryeqytetit e dinin emrin e Bao Zhengut dhe quanin atë me përzemërsi "Gjigantin Bao".

Bao Zheng vdiq në vitin 1062 në postin e zv-kryeministrit të dinastisë Song. Banorët e kryeqytetit shprehën hidhërim të thellë për vdekjen e tij, siç thuhet në lëndët historiografike, kudo në Kaifeng, në bulevarde apo në rrugica, dëgjoheshin psherëtima të qytetarëve për vdekjen e Bao Zhengut.

Në shoqërinë feudale kineze të lashtësisë, mungonte parimi i trajtimit të çështjeve sipas ligjit dhe çështjet penale gjykoheshin gjithmonë sipas vullnetit të monarkut. Në sistemin atëhershëm shoqëror, virtytet e drejtësisë dhe pastërtisë morale të një zyrtari, siç ishte Bao Zheng, ishin veçanërisht të çmueshme. Prandaj brezat e mëvonshëm e kanë lavdëruar atë gjithmonë. Me kalimin e kohës, figura e Bao Zhengut është bërë gjithnjë e më e famshme. Edhe tani, ai konsiderohet si një figurë me ngjyrime të idealizuara e një zyrtari të lartë e të pastër moralisht që është më e përsosur sesa në jetën e tij origjinale. (Zheng)