Në nënrubrikën e sotme "Shkëmbime kulturore" do t'ju njohim me instrumentisten kineze Chen Yaming dhe disa melodi të huaja të interpretuara prej saj.

Melodia që po dëgjoni, quhet "Fëmijë" dhe është përpunuar mbështetur mbi muzikën e kompozitorit francez Pol Moria. Ajo interpretohet nga instrumentistja Chen Yaming me veglën muzikore kineze yueqin. Pas përpunimit prej saj, kjo melodi është bërë më e afërt, më e bukur dhe me forcë më të madhe tërheqëse artistike.

Yueqin-i është një vegël tradicionale muzikore me tela, shumë e preferuar nga banorët e pakicave kombëtare, si të kombësive yi, miao e tong të Kinës jugperëndimore.

Chen Yaming lindi në qytetin e Kinës verilindore Harbin dhe filloi të mësonte qysh në moshën 8 vjeçe nga instrumentisti i njohur kinez Fen Shaoxian veglën muzikore kineze yueqin. Në vitin l979 ajo u pranua me konkurs në Institutin e Arteve të Ushtrisë Popullore Çlirimtare të Kinës për të mësuar interpretimin e veglave muzikore yueqin dhe zhongyuan. Pas diplomimit, ajo u punësua në institut dhe deri tani ka përvetësuar një mjeshtëri të lartë interpretimi.

Muzika që po dëgjoni, është "Suita ruse", e luajtur nga Chen Yaming dhe e përpunuar prej saj mbi bazën e tri pjesëve muzikore ruse. Në fragmentin e parë "Mbrëmja në periferi të Moskës", me melodi të lehtë lirike dhe me ritme të ngadalshme, ajo ka përshkruar një tablo shumë të bukur tërheqëse të natës me flladin e freskët, me hënën e ndritshme dhe me lumin që rrjedh, duke transmetuar edhe ndjenjat e sinqerta të dashurisë midis çifteve të reja. Në fragmentin e dytë "Bulevardet e vendlindjes", me muzikë valsi përshkruhen dallgët e dashurisë; tingujt ritmikë të veglës yueqin, ashtu si vallëzimi i të dashuruarve, u jap dëgjuesve kënaqësi. Në fragmentin e tretë "Tregimet mbi mollë" me ritme të shpejta, të nxehta dhe të rrjedhshme dhe me shoqërime tingujsh përshkruhet një forcë e papërmbajtur tërheqëse, duke simbolizuar guximin e të rinjve në dashuri....

Gjatë më se 20 vjetëve, Chen Yaming studion me zell interpretimin e instrumenteve muzikore popullore kineze. Ajo ka marrë pjesë në spektakle të rëndësishme të gjithë ushtrisë dhe ka shkuar së bashku me delegacionet e muzikantëve popullore për vizitë, shfaqje dhe shkëmbime brenda e jashtë vendit. Në vitin 2001, ajo organizoi me sukses edhe "Koncertin e interpretimit solo nga Chen Yaming-i të instrumenteve muzikore yuan dhe yueqin" dhe publikoi albumin muzikor "Përmbledhje melodish të interpretuara nga Chen Yaming me veglën muzikore yueqin". Në fund të këtij emisioni, dëgjues të dashur, ju ftojmë të ndiqni melodinë "Ndeshja me dema" e përpunuar prej saj mbi bazën e muzikës spanjolle. (Zhai)