dëgjoni

Pak kohë më parë u mbajt në Pekin sesioni vjetor i Komitetit Kombëtar të Konferencës Konsultative Politike të Popullit Kinez. Ndër grupet pjesëmarrëse në këtë sesion, grupi i qarqeve të letërsisë dhe të artit ishte grupi më i madh, ku përfshiheshin më se 150 artistë, shkrimtarë dhe studiues të kulturës. Këta anëtarë të qarqeve të letërsisë dhe të artit të Kinës, duke u nisur nga këndvështrimet e tyre, i paraqitën shumë propozime qeverisë, duke marrë pjesë në diskutimet mbi administrimin qeveritar.

Në nënrubrikën e sotme "Kultura në fokus" do t'ju njohim me përshtypjet e disa anëtarëve të qarqeve të letërsisë dhe të artit nga pjesëmarrja në këtë sesion....Kënga që po dëgjoni, interpretohet nga këngëtarja e njohur kineze Li Guyi. Këngëtarja Li Guyi është shumë e njohur në të gjithë Kinën dhe spektakli më i mirëpritur nga teleshikuesit kinezë, i organizuar nga Televizioni Qendror i Kinës me rastin e Festës së Pranverës, çdo vit mbyllet me këngën "Nuk do ta harrojmë kurrë mbrëmjen e sotme" të kësaj këngëtareje.

Li Guyi është zgjedhur anëtare e Komitetit Kombëtar të Konferencës Konsultative Politike të Popullit Kinez qysh në vitin l983. Ajo i tha korrespondentit se për të, të qenët anëtare e këtij komiteti është një nder i madh. " Atëherë isha shumë e re, rreth 30 vjeçe. Ky ishte një nderim nga shteti për sukseset e mia në punë. Por, gjatë pjesëmarrjes në sesionin e këtij komiteti, ndjeva edhe përgjegjësinë e detyrimet e mia. "

Në fillimet e pjesëmarrjes në sesionet e këtij komiteti, ajo nuk paraqiti projektpropozime, por më vonë ajo nisi të bënte gjithnjë e më shumë propozime. Gjatë 25 vjetëve, ajo ka paraqitur të paktën 30 a 40 propozime që lidhen me komunikacionin, shëndetësinë dhe mjekësinë etj. Një gjë që e kënaq atë shumë është teatri i madh kombëtar që kanë propozuar ajo dhe anëtarë të tjerë, i cili tani është ndërtuar në qendër të qytetit të Pekinit. Të 6 propozimet e paraqitura prej saj këtë vit kanë lidhje me mbrojtjen e mjedisit dhe pakësimin e harxhimit të tepërt të burimeve natyrore. Kjo ka qenë gjithashtu një pikë e rëndësishme që ka theksuar kryeministri Wen Jiabao në raportin për veprimtarinë e qeverisë. Li Guyi tha se me zhvillimin me shpejtësi të ekonomisë, njerëzit synojnë gjithnjë e më shumë një jetë luksoze. Kështu, një ushqim ose një mall i thjeshtë konsumi shpesh paketohet shumë bukur, duke sjellë shpenzime të tepërta të burimeve natyrore dhe ndotjen e mjedisit. Këtë dukuri ajo e ka vënë re prej kohësh. Gjatë qëndrimit për vizitë në vende të tjera, ajo pa se veglat për pastrim nuk janë të paketuara. Ajo tha : " Si anëtare e Komitetit Kombëtar të Konferencës Konsultative Politike të Popullit Kinez, duhet t'i ndihmoj me gjithë shpirt dhe duke shprehur mendimet e të gjithëve shtetin dhe vendin. Ne jemi nga baza, kështu që mund të vërejmë dhe të pasqyrojmë disa probleme të saj. "

Ashtu si Li Guyi, edhe anëtari Wu Jiang tha se gjatë pjesëmarrjes në këtë sesion, e ndjeu gjithnjë e më shumë përgjegjësinë e vet. Ai është tani drejtor i Teatrit të Operës së Pekinit "Kina", por ka punuar edhe si funksionar qeveritar. Prandaj, shteti i dha atij një veturë, por të cilën ai nuk e përdor. Gjatë fundjavëve, ai shkon në gjirin e popullit për t'u njohur me gjendjen e njerëzve të thjeshtë. Ai tha :  "Si anëtarë të Komitetit Kombëtar të Konferencës Konsultative Politike, ne duhet të trajtojmë problemet e sotme dhe të hedhim sytë nga e ardhmja, duke mbajtur parasysh disa probleme strategjike. Duhet të zbulojmë paraprakisht disa probleme, duke u nisur nga këndvështrimet dhe profesionet tona".

Teatri i Operës së Pekinit " Kina" që drejton Wu Jiang, përfaqëson nivelin më të lartë të artit të Operës së Pekinit. Sivjet Wu Jiang paraqiti vetëm një propozim për mbrojtjen dhe trashëgiminë e operave tradicionale kineze.

Shkrimtari Zhang Xianliang është një shkrimtar shumë i njohur në Kinë. Ai i tha korrespondentit se qysh nga viti l983, kur u zgjodh anëtar i Komitetit Kombëtar të Konferencës Konsultative Politike të Popullit Kinez, ai ka marrë pjesë gjithmonë në diskutimet mbi administrimin e qeverisë krahas me procesin e reformës dhe hapjes të Kinës. Në fillim propozimet e tij lidheshin me profesionin që kishte, por duke filluar nga shekulli i 21-të, të gjitha propozimet e paraqitura prej tij nuk kishin të bënin me artet ose letërsinë. Ai i tha korrespondentit ." Problemi që më intereson më shumë, është që të shtohet në 'Ligjin e nëpunësve qeveritarë të RP të Kinës' neni i raportimit të pasurisë dhe të ardhurave vjetore. Kjo është një masë e rëndësishme në luftën kundër korrupsionit për ngritjen morale të administratës."

Propozimi i paraqitur këtë vit nga artisti i njohur i humorit Huang Hong është për punëtorët e ardhur nga fshati, ku përfshihen mekanizmat e rritjes së rrogave, të sigurimit të mirëqenies shoqërore dhe të zhvillimit kulturor të punëtorëve nga fshati. Huang Hong tha se shumica e krijimtarisë së tij e ka burimin nga gjiri i punëtorëve nga fshati. Ai u shpreh ." Në të kaluarën, unë vetëm pasqyroja jetën e tyre në pjesët e mia teatrore. Tani si anëtar i Komitetit Kombëtar të Konferencës Konsultative Politike të Popullit Kinez, unë duhet të mendoj më shumë dhe kam më shumë përgjegjësi. Duke i drejtuar sytë nga të gjithë, krijimtaria ime artistike do të ketë mendim më të thellë dhe më shkencor. "

Në këtë komitet, edhe shumë anëtarë të tjerë nga qarqet e letërsisë dhe të artit i kanë bërë propozime shtetit me mprehtësinë dhe këndvështrimin e tyre për të gjitha drejtimet e jetës shoqërore. (Zhai)