Në vitet '30 të shekullit të kaluar, kur Fang Cheng ishte në shkollën e mesme, Kina përballej me agresionin e Japonisë. Shumë nxënës dhe studentë të mbarë vendit organizuan aktivitete të ndryshme për të propaganduar luftën kundër agresorëve japonezë. Fang Cheng mori pjesë aktivisht në aktivitetet propaganduese dhe krijoi shumë karikatura me temën e luftës kundër agresorëve japonezë. Gradualisht karikaturat e Fang Chengut fituan përshëndetjen e lexuesve.

Pas fitores së luftës së popullit kinez kundër agresorëve japonezë, në vitin 1946, Fang Cheng shkoi në Shangai për të kërkuar punë. Talenti i tij për vizatimin e karikaturave e ndihmoi të gjente punë në një kompani reklamash. Fang Cheng kujton:

"Një kompani reklamash donte të punësonte një vizatues. Pas luftës, shumë njerëz të papunë donin të gjenin punë, prandaj konkurrenca ishte shumë e ashpër. Drejtori i kompanisë ishte një amerikan. Kur pa karikaturat e mia, ai vendosi menjëherë të më pranonte në këtë kompani."

Në kohën e lirë pas punës në kompaninë e reklamave, Fang Cheng vazhdoi të krijonte karikatura dhe u dërgoi shpesh gazetave kryesore të Shangait veprat e tij për botim. Veprat e tij tërhoqën vëmendjen e kryeredaktorit të një reviste, i cili e ftoi Fang Chengin të punonte në këtë revistë. Fang Cheng e pranoi ftesën e tij dhe filloi të merrej me krijimin profesional të karikaturave.

Pas krijimit të Kinës së re, në vitin 1950, Fang Cheng u kthye në Pekin dhe punoi në gazetën "Renminribao". Në fillim, Fang Cheng përgjigjej kryesisht për krijimin e karikaturave të aktualitetit ndërkombëtar. Në ato vite kur shkëmbimet ndërkombëtare të Kinës ishin shumë të pakta, karikaturat e Fang Chengut u hapën lexuesve kinezë një dritare për të njohur situatën ndërkombëtare. Duke kujtuar punën e atëkohshme, Fang Cheng tha:

"Çdo ditë në mbrëmje, redaksia zhvillonte një mbledhje për të përcaktuar temën e karikaturës së ditës. Pas mbledhjes, fillova të krijoj karikatura duke mbaruar vizatimin para orës 12 të mesnatës."

Krahas punës, Fang Cheng krijoi edhe shumë karikatura që satirizonin dukuri të pashëndetshme shoqërore. Në fillim të viteve '80 të shekullit të kaluar, Fang Cheng organizoi në shumë qytete ekspozitë karikaturash duke ngjallur jehonë të madhe. Ai tha:

"Ekspozita tërhoqi shikues të krahinave të ndryshme. Shumë provinca e qytete më ftuan ta hap ekspozitën atje. Në fund ekspozita u zhvillua në mbi 10 qytete kryesore."

Fang Cheng është edhe studiues i artit dhe i teorisë së humorit dhe ka botuar mbi 10 vepra teorike në këtë fushë. Fang Cheng u shpreh se humori është një art gjuhe që pasqyron inteligjencën e njeriut. Ai ka qenë në SHBA për të dhënë leksione në teorinë e humorit dhe shpreson se do të shkojë në më shumë vende për të shpjeguar konceptin e vet për humorin:

"Humori vjen nga gjuha dhe është një lloj arti. Shpresoj se do të shkoj në vende evropiane për të dhënë leksione."

Në jetën e zakonshme, Fang Cheng është një plak me humor dhe i shëndetshëm. Atij i pëlqen shumë shëtitja me biçikletë dhe shkon shpesh në pazar me biçikletë. Njëkohësisht ai u kushton ende shumë vëmendje problemeve të ndryshme shoqërore për të kërkuar ide për krijime. (Fani)