Liga e Volejbollit e Kinës u krijua në vitin 1996. Pas zhvillimit 10-vjeçar, ajo është bërë liga me nivelin më të lartë në Azi, ndërsa liga e volejbollit të femrave ka arritur edhe në shkallën e parë botërore. Në programin e sotëm do t'ju njohim me Ligën e Volejbollit të Femrave të Kinës.

Në fakt, Liga e Volejbollit e Kinës u krijua në vitin 1996, pas rënies në gjendje të vështirë të volejbollit kinez. Megjithëse në vitet '80 të shekullit të kaluar ekipi kombëtar i volejbollit të femrave i Kinës pati arritje të shkëlqyera, duke u shpallur 5 herë me radhë kampion në veprimtaritë e mëdha botërore, prapësëprapë me lënien e sportit nga një kontingjent veteranesh, në vitet '90 volejbolli ra në gjendjen më të dobët. Rezultatet e ekipit kombëtar në veprimtari ndërkombëtare u ulën pandërprerë, ndërsa u pakësua gjithnjë e më shumë edhe numri i shikuesve të kampionatit kombëtar të volejbollit. Si pasojë, shumë ekipe të volejbollit të Kinës u ndodhën përpara problemit të ekzistencës. Për të dalë nga gjendja e vështirë, në vitin 1996 Shoqata e Volejbollit e Kinës krijoi Ligën Kombëtare të Volejbollit. Zv.kryetari i Qendrës Administrative të Volejbollit pranë Drejtorisë Shtetërore të Sporteve dhe të Fizkulturës të Kinës, z. Li Quanqiang, kujton:

"Atëherë, Shoqata e Volejbollit e Kinës shpalli se për të rikthyer imazhin e volejbollit kinez dhe për të tërhequr shikuesit të kthehen përsëri në pallatet e sportit, kyçi ishte që të ngrihej niveli konkurrues i volejbollit dhe të thellohej reforma e volejbollit nga drejtim të sistemit të ndeshjeve. Në këto rrethana, shoqata e volejbollit e Kinës krijoi në kohë ligën e volejbollit me sistemin e fushës së vet dhe të fushës kundërshtare."

Në ligën e re të volejbollit të Kinës zbatohet prej vitesh sistemi i zhvillimit të ndeshjeve në fushën e vet dhe në fushën kundërshtare, në vend të sistemit të mëparshëm të zhvillimit të ndeshjeve brenda një periudhe të shkurtër në një qytet. Kështu u ngjall entuziazmi i sportdashësve për të parë ndeshjet e ekipit të tyre në fushën e vet, si dhe vëmendja e mediave të qytetit. Njëkohësisht, zgjatja e sezonit u jep ekipeve më shumë rast për të zhvilluar ndeshje, duke nxitur shkëmbimet midis ekipeve të ndryshme.

Sigurisht, Liga Kombëtare e Volejbollit nuk pati rritje që në fillim. Në sezonin e dytë, për shkak se nuk kishte mjaft ndikim, liga nuk arriti të gjente sponsorë. Në këtë gjendje të vështirë, Shoqata e Volejbollit u detyrua të nxirrte depozitimet e vet, të kursyera prej disa vjetëve, për të siguruar zhvillimin normal të atij sezoni. Por më vonë, me ngritjen e pandërprerë të nivelit të ligës, gjithnjë e më shumë sponsorë të fuqishëm kanë marrë pjesë në të, duke përfshirë edhe disa kompani të njohura të huaja. Për këtë, z. Li Quanqiang tha:

"Mbi këtë bazë, në sezonin e 10-të të kësaj lige 2005-2006, numri i ekipeve pjesëmarrëse të meshkujve dhe të femrave u shtua përkatësisht nga 12 në 16. Me zgjerimin e përmasës së ligës, edhe ndeshjet janë bërë më të ashpra dhe më të bukura, duke tërhequr më shumë sportdashës për të ardhur në pallatet e sportit."

Me përmirësimin e sistemit të ndeshjeve, është ngritur edhe niveli i volejbollit. Nga ana tjetër, fondet relativisht të shumta u kanë dhënë ekipeve të ndryshme raste që të përgatitin forcat vijuese. Në saje të ciklit të mirë, Liga e Volejbollit e Kinës dhe veçanërisht Liga e Volejbollit të Femrave është bërë arena e stërvitjes së të rinjve dhe të rejave, duke e furnizuar pandërprerë ekipin kombëtar me volejbollistë të talentuar. Lidhur me këtë, zv.kryetari i Qendrës Administrative të Volejbollit, z. Li Quanqiang, tha:

"Pas Lojërave Olimpike të Sidnejit në vitin 2000, u formua ekipi i ri kombëtar i volejbollit të femrave i Kinës. 7 anëtare kryesore ishin të rejat që u paraqitën shkëlqyeshëm në ligën kombëtare. Ndër to, më të mëdhatë, Feng Kun dhe Wang Lina, ishin vetëm 22 vjeçe. Pikërisht ky ekip i ri kinez, për habinë e të gjithëve, u shpall kampion në Kupën e Madhe Botërore të Kampioneve në vitin 2001. Ky rezultat i befasoi qarqet ndërkombëtare të volejbollit."

Dy vjet më vonë, ky ekip i ri u shpall kampion edhe në Kupën Botërore të Volejbollit në Japoni, dhe kjo ishte hera e parë pas 17 vjetëve që ekipi kinez i volejbollit të femrave shpallej kampion botëror. Në vitin 2004 në Athinë, këto të reja fituan përsëri medaljen e artë olimpike.

Rezultatet e mira të ekipit kombëtar kanë nxitur edhe lulëzimin e tregut të ligës së volejbollit. Drejtori i Departamentit të Sportit pranë Televizionit Qendror të Kinës, z. Jiang Heping, e vlerësoi lart vlerën tregtare të Ligës së Volejbollit të Kinës.

"Liga e Volejbollit e Kinës vlerësohet në qarqet sportive si një ligë me nivel të lartë, rezultate të mira dhe ndikim të madh në botë. Tjetër epërsi e saj e rëndësishme është që ajo ka funksionuar në mënyrë të qëndrueshme në fushën tregtare dhe ka tërhequr gjithnjë e më shumë sponsorë, të cilët sigurojnë zhvillimin e qëndrueshëm dhe afatgjatë të ligës. Mund të them se ndër ligat e ndryshme të Kinës, liga e volejbollit meriton të vlerësohet si shembull. " (Wang Lei)