Sima Guang lindi në vitin 1019 të erës së re në familjen e një zyrtari të qeverisë së dinastisë Song. Ai mori një edukatë të mirë që në fëmijëri dhe shfaqi herët zgjuarësinë e tij të jashtëzakonshme. Ruhet edhe tani rrëfimi për veprimin e tij në fëmijëri për të shpëtuar një djalë të vogël nga rreziku. Thuhet se një ditë, kur ai po luante së bashku me disa fëmijë të tjerë, një djalë i vogël u ngjit me kureshtje në një qyp të madh qeramike të mbushur plot me ujë dhe ra nga pakujdesia brenda qypit. Ndërsa të gjithë fëmijët e tjerë i zuri paniku dhe u shtangën, Sima Guang u tregua gjakftohtë. Ai ngriti një gur të madh dhe e theu qypin. Kështu, uji u derdh dhe djali i vogël shpëtoi. Mbi bazën e këtij rrëfimi, piktorët krijuan një pikturë me titull "Një djalë i vogël theu qypin", e cila u bë një pikturë tradicionale në libërat shkollorë të fëmijëve.

Në saje të zellit të madh për mësim, Sima Guang i dha provimet perandorake qysh në moshën 19 vjeçare dhe u bë një politkan i njohur. Kur ishte 40 vjeç, ai filloi të shkrunte vepra historiografike duke shfrytëzuar kohën e lirë. Në fillim ai redaktoi disa libra mbi historinë e hershme të Kinës, si "Vitet e dinastisë Zhou", "Vitet e dinastisë Çin" etj dhe ia paraqiti perandorit. Pasi i lexoi, perandori vlerësoi shumë lart veprat e tij dhe e urdhëroi të vazhdonte duke renditur kapitujt sipas kohës. Me vendimin e perandorit, u ngrit një drejtori botimi posaçërisht për punën e tij dhe u formua një grup ndihmësish për të. Pikërisht në atë kohë, për arsye politike, Sima Guang u tërhoq përkohësisht nga puna e oborrit perandorak dhe u zhyt në punën për shkrimin dhe redaktimin e librave historiografikë. Pas 15 vjet përpjekjesh këmbëngulëse, ai përfundoi shkrimin dhe redaktimin e librit "Mësime historike për të gjithë", që është një vepër e madhe historiografike klasike.

Libri "Mësime historike për të gjithë", që ka 3 milionë fjalë, u botua në vitin 1084 të erës së re. Kjo vepër e madhe, që ndahet në 294 kapituj, është libri i parë historiografik i stilit analistik në Kinë. Në të shënohet një histori e periudhave prej 1362 vjetëve në Kinë, nga viti 403 para erës së re deri në vitin 959 të erës së re.

Sima Guang shpresonte se sundimtarët do të nxirrnin përvojë dhe mësime nga ngjarjet historike, prandaj ia vuri librit të tij titullin "Mësime historike për të gjithë". Në fakt, rëndësia e këtij libri ia ka kaluar shumë qëllimit të tij. Ai jo vetëm u ofroi sundimtarëve një pasqyrë reference, por edhe krijoi një pasuri shpirtërore për gjithë shoqërinë. Kjo vepër e madhe historiografike e Sima Guangut është një nga lëndët mbështetëse për studimin e arterieve të historisë prej disa mijëra vjeçare të Kinës. (Zheng)