dëgjoni

Sot ne shkojmë në këtë lagje në perëndim të qytetit të Pekinit për të njohur një vajzë 7-vjeçare, që të dëgjojmë për lodhjen dhe gëzimin e saj gjatë mësimit të instrumentit erhu.

Herët në mëngjes, Junjun-i fillon t'i bjerë erhusë, një instrument muzikor me një hark dhe me dy tela, që quhet edhe "violina kineze".

Junjun-i shkon në klasën e dytë të shkollës fillore. Babai i saj është shofer taksie, ndërsa mamaja e saj është shitëse në një dyqan. Gjyshi dhe gjyshja e saj kanë dalë në pension. Shtëpia e Junjunit ndodhet në lagjen "Yonglë". Gjatë pushimeve shkollore ajo banon në shtëpinë e gjyshit.

Pushime??Junjun-i nuk ka kohë për lojëra. Çdo ditë ajo duhet të shkojë për studim në shtëpinë e mësuesit të erhusë. Pasi ha mëngjes, ajo i luan dy herë melodinë e mësuar një ditë më parë, pastaj del së bashku me gjyshin nga shtëpia.

"Në fillim, ajo filloi t'i bjerë erhusë shtyrë nga prindërit e vet. Më vonë menduam se mësimi i këtij instrumenti mund ta ndihmojë për zhvillimin e mendjes, sepse ajo duhet të mbajë mend pjesë të gjata muzikore, dhe kështu do të mbajë mend edhe tekstet e librave të shkollës."

Në rini, gjyshi i saj i ka rënë erhusë. Ai e di se mësimi i muzikës është në favor të zhvillimit mendor, kështu që e regjistroi të mbesën e tij në kursin e muzikës. Por Junjun-i nuk ishte e kënaqur.

"Jam shumë e lodhur! Mësimi i erhusë më lodh shumë, çdo ditë duhet të luaj për dy orë melodi. Kur i bija keq erhusë, mësuesi më kritikonte shpesh."

Në fakt, qysh kur vogëlushja ishte 3-vjeçe, gjyshi i saj filloi ta përgatiste.

"Kur ajo ishte 3-vjeçe, unë e kam mbajtur atë në gji duke vallëzuar. Ajo e kap shumë mirë ritmin e melodisë. Ajo ka mësuar për një vit vallëzimin, pastaj nisi të mësojë t'i bjerë erhusë, sepse thuhet se njohja e një vegle muzikore është epërsi për pranimin në shkollat e larta."

E ashtuquajtura epërsi do të thotë se në provimin e pranimit në shkollën e mesme ose të lartë, nëse zotëron ndonjë mjeshtëri të veçantë, mund të fitosh më shumë pikë. Rënia e erhusë është një mjeshtëri e tillë, sepse me një provim të veçantë mund të përcaktohet niveli i njohjes së kësaj vegle muzikore. Por vallëzimi nuk hyn ndër këto mjeshtëri që vlerësohen, prandaj Junjun-i hoqi dorë prej tij. Fatmirësisht ajo e kap mirë ritmin e muzikës. Vetëm pas dy vjetësh ajo mësoi t'i bjerë mirë erhusë dhe mësuesi është i kënaqur me të.

Dëgjo sa i gëzuar është gjyshi, sepse e mbesa e kaloi provimin e nivelit të mesëm për amatorët. Por e gjora Junjun ka marrë pjesë edhe në 4 kurse të tjera mësimore ndihmëse: të bukurshkrimit, matematikës, anglishtes dhe të hartimeve në gjuhën kineze.

"Sa e lodhur jam! Qysh nga fillimi i shkollës unë nuk kam pushuar asnjë ditë dhe shkoj çdo ditë në mësim".

Në të vërtetë, shumë fëmijë në qytetet e Kinës jetojnë kështu si Junjuni. Sipas të dhënave statistikore, mbi 50% e fëmijëve në qytete mësojnë ose kanë mësuar instrumente. Gjatë pushimeve shkollore, shumica e fëmijëve marrin pjesë në kurse ndihmëse mësimore. Nxënësit e shkollave të mesme dhe fillore të Pekinit marrin pjesë në përgjithësi në këto kurse të tilla.

Po si të mos lodhen? Pridërit e tyre thonë se edhe ata nuk duan t'i lodhin fëmijët, por s' kanë ç' të bëjnë.

Pse? Ne ia paraqitëm këtë problem nënkryetarit të Shoqatës Kineze të Studimit të Problemeve të Rinisë Sun Yunxiao.

"Një dëshirë e tillë e prindërve për fëmijët e tyre ka një anë racionale dhe pozitive. Por shumë prindër shpresojnë se fëmijët e tyre do të bëhen talentet më të dalluara në shoqëri. Prandaj shpresa e tyre për përgatitjen e fëmijëve është shumë e madhe, duke u nisur edhe nga presioni i punësimit. Prandaj janë të kuptueshme veprimet e prindërve. "

Atëherë, le të vazhdojë të mësojë, por për të studiuar duhen para. Vogëlushja Junjun ka marrë pjesë në 5 kurse jashtëshkollore. Shpenzimet për këto kurse janë relativisht të mëdha, ndërsa të ardhurat e prindërve janë në përgjithësi të kufizuara. Shpenzimet për mësimin e erhusë mbështeten vetëm te pensioni i gjyshit.

"Pagesa për mësimin e erhusë është shumë e lartë. Për një orë duhet të paguajë 50 juanë. Vetëm gjatë 2 vjetëve të studimit të erhusë, kemi paguar 6 mijë juanë."

"Për të përgatitur më mirë dhe më shpejt fëmijët e tyre, shumë prindër i kanë regjistruar ata të paktën në 2 kurse. Prindërit harxhojnë të gjitha kursimet e tyre për mirërritjen e fëmijëve."

Përveç kursit të erhusë, Junjun-i shkon edhe në një shkollë fillore të mirë të Pekinit. Familja e saj ka paguar shumë para për zgjedhjen e kësaj shkolle.

"Kjo shkollë nuk ndodhet në lagjen ku banon Junjun. Pagesa për zgjedhjen e kësaj shkolle është 15 mijë juanë, që është sa rroga vjetore e së ëmës së saj."

Nga të dhënat statistikore del se për përgatitjesn për një nxënës deri në shkollën e mesme, duhet të shpenzohen 200 mijë juanë. Në qoftë se shkolla fillore ose shkolla e mesme zgjidhen, atëherë duhet të shtohen edhe disa dhjetëra mijë juanë të tjerë.

200 mijë juanë janë baras me të ardhurat mbi 10-vjeçare të nënës së Junjun-it. S' mund të ulen pak?

Ministri i Arsimit Zhou Ji pohoi se zgjedhja e shkollës në qytet ka shkaktuar pagesën e lartë. Moszgjedhja e shkollës është kyçi për lehtësimin e barrës së familjes për arsimimin e fëmijëve.

Për këtë, Asambleja Kombëtare Popullore e Kinës ka rishikuar "Ligjin e arsimit të detyrueshëm", duke shpërndarë në mënyrë të arsyeshme për të realizuar arsimimin e barabartë.

Qyteti Dalian, që ndodhet në pjesën verilindore të Kinës, ndaloi marrjen e pagesës për zgjedhjen e shkollës. Nëpërmjet shkëmbimeve të mësuesve, shumë mësues të dalluar kanë shkuar në shkolla të zakonshme për të dhënë mësim. Kështu nxënësit nuk kanë nevojë të zgjedhin shkollën. Sektorët arsimorë të niveleve të ndryshme kanë marrë masat konkrete për të shmangur problemin e marrjes së pagesës për zgjedhjen e shkollës, duke përdorur masa të rrepta.

Junjun-i që nuk dëshironte të mësonte t'i bjerë erhusë, është bërë tani ylli i vogël në mbrëmjet artistike të lagjes ku banon.

Ajo ka talent në interpretimin artistik me erhu. Në qoftë se do të vazhdojë përpjekjet, ajo ka mundësi të kalojë provimin e interpretimit artistik me erhu të nivelit më të lartë.

Gjyshi është i qeshur. Junjun-i nuk ndjen më lodhje, duke i rënë me vëmendje erhusë.

Konkurrenca në shoqëri do të vazhdojë. Do të vazhdojë edhe konflikti i brendshëm të prindërit. Efektiviteti i këtyre masave të qeverisë kërkon kohë.

Tregimi për Junjun-in mbaron këtu. Nesër në këtë kohë, në "Tregimet nga lagjja 'Yonglë'" do t'ju njohim me përvojën e ripunësimit e të një gruaje të dalë nga puna. (Sihai)