Në pranverën e vitit 2003, e gjithë Kina pësoi një fatkeqësi të madhe të shkaktuar nga sëmundja epidemike "sars", që do të thotë "pneumonia jo tipike". Në vitin 2005, në disa provinca të Kinës u përhap gripi i shpendëve, virusi i të cilit ka rrezik t'i ngjitet edhe njeriut. Në vitin 2006, në disa provinca të Kinës Jugore zbarkuan dendur nga deti tajfunet e fuqishëm Çançu, Prapiron, Saomai dhe Bilisi. Fatkeqësitë e shumta natyrore provuan aftësinë e reagimit të qyteteve të Kinës dhe, nga ana tjetër, i dhanë shkas përsosjes së pandërprerë të sistemit të trajtimit të urgjencave urbane të Kinës.

Meqenëse Pekini pësoi rëndë fatkeqësinë e sarsit që ndodhi në vitin 2003, funksionarët e administratës së Pekinit janë të ndërgjegjshëm se shkaku kryesor i përhapjes së sarsit në gjithë qytetin brenda një kohe të shkurtër ishte prapambetja e sistemit të trajtimit të gjendjes urgjente të epidemisë, gjë që shpuri deri atje saqë përgjegjësit e sektorëve administrativë dhe mjekësorë nuk kishin mundësi të njihnin në kohë gjendjen e përhapjes së epidemisë. Drejtori i Qendrës së Informacionit pranë Drejtorisë së Shëndetësisë të Pekinit, zoti Gjy Vensheng, thotë se vitet e fundit Pekini ka shpejtuar ndërtimin e sistemit të trajtimit të urgjencave.

"Komiteti i Partisë dhe administrata e Pekinit i kushtojnë shumë rëndësi çështjes komunale shëndetësore. Sot në qytetin tonë janë hapur 13 zyra të posaçme, njëra prej të cilave është zyra e trajtimit të urgjencave shëndetësore që dalin befasisht. Edhe Ministria e Shëndetësisë e vendit tonë u kërkon të gjitha krahinave që të ndërtojnë sisteme përkatëse."

Sot në Kinë numri i qytetarëve përbën 40% të popullsisë, ndërsa qytetet krijojnë 50% të vëllimit të përgjithshëm të prodhimit industrial dhe 80% të shumave të taksave të mbarë vendit; 85% e vlerës së rritjes së shërbimeve komunale dhe 90% e potencialit të arsimit të lartë dhe të kërkimeve shkencore janë në qytet. Prandaj vetëm me ndërtimin e një sistemi të përsosur të urgjencave urbane, mund t'u përgjigjemi në mënyrë të efektshme sfidave të fatkeqësive natyrore, të higjienës komanale dhe të incidenteve të sigurimit publik dhe të zhvillimit të qyteteve. Akademiku i Institutit të Sigurimit Komunal të Universitetit Tsinghua dhe drejtori i Laboratorit Shtetëror për fatkeqësitë e natyrës, zoti Fan Veiçeng, foli për sistemin e përsosur të urgjencave urbane.

"Sistemi i urgjencave të një qyteti duhet të përbëhet nga tri pjesë, nga terreni i komandës së veprimeve urgjente, sistemi bazë i mbështetjes dhe sistemi kompleks zbatues."Ai sqaroi konkretisht edhe tërë procesin e punës së sistemit të urgjencave për trajtimin e incidenteve që ndodhin befasisht.

"Në rastet kur një ndërmarrje ose një njësi tjetër nuk përfundon plotësisht trajtimin e një incidenti të papritur ose nuk është në gjendje të trajtojë me sukses, të dhënat përkatëse shkojnë në sistemin vrojtues të qendrës komanduese të trajtimit të urgjencave. Atëherë, sektori përkatës gjykon shkallën e rrezikut të incidentit dhe kuadrin e ndikimit të tij, pastaj harton projektin e zgjidhjes dhe fillon zbatimin e tij, duke i dhënë shoqërisë informacionin e alarmit dhe duke grumbulluar forca për të trajtuar incidentin aty në vend."

Qytetet e mëdha të Kinës po bëjnë përpjekje për ndërtimin e sistemit të urgjencave urbane të të gjithë sektorëve, si të sigurimit publik, të komunikacionit e trafikut, të urgjencës zjarrfikëse, të ndihmës mjekësore urgjente dhe të furnizimit me ujë e me energji elektrike. Kur ndodh ndonjë incident urgjent, do të realizohet bashkëpunimi i shumë sektorëve për trajtimin e incidentit nëpërmjet sistemit komandues të urgjencave. Në disa qytete janë ngritur edhe stacione komandimi pa kabëll, që kanë funksione të radios, të trajtimit dhe të telefonit. Do të përdoren gjerësisht edhe mjete të shkencës dhe teknikës së lartë nëpërmjet transmetimit të figurave me satelit, në mënyrë që të vrojtohen dhe kontrollohen ngjarjet nëpërmjet figurave dhe mund të mbahen mbledhje me video-frekuencë.

Specialistët thonë se në ndërtimin e sistemit të urgjencave urbane të Kinës mungon modeli i sistemit të përgjithshëm. Drejtoresha teknike e Sistemit Net Gain të Singaporit në Pekin, zonja Vang Veiping i propozon Kinës të formojë një sistem unik të urgjencave. Qeveria kineze ka ndër mend që në bazën e sistemit administrativ elektronik, të ndërtuar disa vjet më parë, të ndërtohet edhe një sistem unik i urgjencave urbane që të rritet rendimenti i punës. (Zheng)