Më 8 mars pasdite në orën 2 e gjysmë, në Muzeun Olimpik Ndërkombëtar, që ndodhet buzë liqenit të Lemanit, u mblodhën mysafirë nga vende të ndryshme, duke krijuar një atmosferë të ngrohtë. Këtu po zhvillohej ceremonia e ndarjes së çmimit të madh "Gratë dhe Sportet", që jepet një herë në vit nga Komiteti Olimpik Ndërkombëtar. Dita e Grave ia shtoi ceremonisë atmosferën e gëzueshme.

Komiteti Olimpik Ndërkombëtar e krijoi këtë çmim që nga viti 2000, për të nderuar individët dhe ekipet që kanë dhënë kontribut për nxitjen e pjesëmarrjes së grave në lëvizjen sportive. Secili kontinent ka një çmim dhe jepet edhe një çmim i madh botëror. Në vitin 2000, ekipi kinez i futbollit të femrave fitoi çmimin e Azisë për ndihmesën e tij të shquar në nxitjen e futbollit të femrave në Azi.

Patinatorja e njohur kineze Yang Yang është anëtare e komisionit të dhënies së këtij çmimi. Ajo i tregoi gazetarit synimin e krijimit të këtij çmimi:

"Ky çmim synon që të nxitë gratë të marrin pjesë sa më shumë në sport, të inkurajojë realizimin e barazisë të statusit të grave dhe të krijojë një shoqëri harmonike."

Çmimet e këtij viti u fituan përkatësisht nga personalitete nga Kenia, SHBA-ja, Palestina, Gjermania dhe Papua Guineja e Re, në emër të Afrikës, Amerikës, Azisë, Evropës dhe të Oqeanisë. Fituesja në emër të Amerikës është ylli i famshëm i SHBA-së Xhakie Xhoner-Kersi, ndërsa çmimi i madh botëror u mor nga kryeministrja e Xhamajkës Portia Simpson Miller. Kjo politikane ka qenë për një kohë të gjatë ministre e Sporteve e këtij vendi dhe me përpjekjet e saj Xhamajka ka arritur rezultate të shkëlqyeshme në sportet e femrave. Pas marrjes së postit të kryeministres në mars të vitit të kaluar, ajo nënshkroi edhe marrëveshjen e antidopingut. Duke folur për rëndësinë e sportit për jetën e grave, ajo tha:

"Nëpërmjet pjesëmarrjes në sporte, gratë mund të kuptojnë se gjatë procesit të zhvillimit të shoqërisë, ato kanë të drejta të barabarta dhe mund të marrin pjesë në konkurrim në arenë ashtu si meshkujt."

Çmimin e madh botëror Millerit ia dorëzoi kryetari i Komitetit Olimpik Ndërkombëtar Zhak Rog. Në fjalimin e tij, ai tha se nxitja e pjesëmarrjes së grave në sport është një nga objektivat e rëndësishëm të komitetit olimpik.

"Komitetit Olimpik Ndërkombëtar ka bërë përpjekje për pjesëmarrjen sa më shumë të grave në sport dhe ka theksuar barazinë midis meshkujve dhe femrave në lëvizjen sportive. Ju keni arritur rezultate të mëdhe në nxitjen e grave për t'u marrë pjesë me sport. Besoj se me përpjekjet dhjetëra vjeçare, do të realizohet patjetër mbështetja ndaj grave." (Wang Lei)