Su Shi, që pati emrin tjetër Su Dong Po, lindi në vitin 1037 në një familje burokrate në qytetin Meizhou të provincës Siçuan të Kinës Jugperëndimore. I ati i tij, Su Shyn, ishte një letrar i njohur i asaj kohe. I ndikuar nga familja e tij, Su Shi filloi të pëlqente letërsinë qysh në vogëli dhe demonstroi herët talentin e tij të shquar në këtë drejtim. Ai, së bashku me të atin Su Shyn dhe të vëllanë Su Zhe, u quajtën "Tre Su" dhe ata të tre u konsideruan në historinë e letërsisë kineze si tre nga "8 prozatorët më të shquar të dinastive Tang dhe Song", të periudhës nga shekulli i 7-të deri në shekullin e 12-të.

Arritjet më të rëndësishme të Su Shiut janë veprat e tij poetike, por ai korri suksese të shkëlqyera edhe në fushën e prozës. Në mënyrë të veçantë, shënimet e udhëtimit, që krijoi ai, janë bërë shembuj për shkrimtarët e brezave të mëvonshëm në krijimtarinë e tyre letrare. Su Shi la mbi 2700 vepra poetike dhe proza, që ruhen edhe tani. Temat e veprave të tij janë shumë të gjera. Ndër to, ka vjersha lirike, vjersha politike, komente politike, komente për pikturim etj. Veprat e tij jo vetëm kanë vlerë letrare, por kanë edhe vlerë historike.

Su Shi korri suksese të veçanta në fushën e bukurshkrimit dhe pikturimit dhe pati nderin të quhej një nga 4 kaligrafët më të shquar të asaj kohe. Kontributi i tij në fushën e pikturës ka qenë shumë i dukshëm. Në periudhat para tij, bukurshkrimi dhe pikturimi trandicional kinez konsideroheshin më shumë si diçka teknike, që ndryshonin nga poezia që konsiderohej si një lloj arti fisnik. Su Shi parashtroi i pari nocionin e "pikturës intelektuale" dhe përkrahu integrimin e poezisë, bukurshkrimit dhe pikturimit në një të tërë. Në saje të pozitës dhe prestigjit të tij, kjo teori u pranua shpejt nga intelektualët. Duke filluar nga koha e Su Shiut, "piktura intelektuale" u bë gradualisht një degë e pikturimit tradicional kinez.

Ashtu si letrarët e shumtë në historinë kineze që punuan njëkohësisht si zyrtarë qeveritarë, edhe Shi Shi punoi dikur si zyrtar në dikastere qendrore dhe në administrata lokale, ku pati prestigj të lartë. Ai la gjurmë edhe në qytetin Hangzhou të provincës Zhegjang, që është një qytet i njohur turistik në Kinën Lindore. Ai punoi për disa vjet si kryetari i bashkisë së qytetit Hangzhou. Nën drejtimin e tij, u bënë punime në përmasë të madhe për rregullimin e liqenit Sihu të Hangzhout. Si rezultat i këtyre punimeve, u ndërtua në mes të liqenit një pendë e gjatë, duke u shfrytëzuar balta e nxjerrë nga shtrati i liqenit, dhe u ndërtuan disa ura mbi ujë të liqenit. Kështu, u lehtësua shumë komunikacioni mbi ujë. Më vonë, banorët e Hangzhout e emërtuan këtë pendë "Pendën e Su Shiut". Sot, kjo pendë është bërë një nga bukuritë e njohura turistike të liqenit Sihu të Hangzhout. (Zheng)