Dëgjoni

Universiteti i Filmit i Pekinit u krijua në vitin 1956 dhe është i vetmi universitet në Kinë që përgatit posaçërisht specialistë të filmit. Shumica e regjisorëve të famshëm dhe e yjeve të filmit, e operatorëve etj. kinezë janë diplomuar në këtë universitet. Zhang Huijun është rektori i këtij universiteti të famshëm.

Zhang Huijun lindi në vitin 1956 kur u krijua Universiteti i Filmit i Pekinit. Kur ishte në moshën 22-vjeçare, Zhang Huijun nisi studimet në Fakultetin e Fotografisë të këtij universiteti. Pas diplomimit deri sot, ai ka punuar në këtë universitet deri sot. Gjatë 30 vjetëve, shumë bashkëstudentë të Zhang Huijunit janë bërë regjisorë dhe operatorë të famshëm në qarqet kinematografike kineze si Zhang Yimou, Chen Kaige, Tian Zhuangzhuang, Gu Changwei etj. Edhe shumë studentë të tij kanë filluar të shfaqin talentin e vet në këtë fushë. Zhang Huijun është shumë i kënaqur për punën e vet si profesor:

"Jam shumë i gëzuar që t'u shërbej studentëve dhe t'u jap njohuri. Përpiqem të krijoj kushte të mira studimi për ta, sepse ata janë e ardhmja e filmit kinez."

Në krahasim me studentët e sotëm, kryerja e studimeve për Zhang Huijunin ishte shumë e vështirë. Në fund të viteve '60 dhe në fillim të viteve '70 të shekullit të kaluar, për shkak të Revolucionit Kulturor, shumë shkolla të larta kineze ndërprenë pranimin e studentëve të rinj. Kjo gjendje zgjati deri në vitin 1978. Zhang Huijun ishte një nga studentët e parë pas rifillimit të pranimit të studentëve të rinj në atë vit. Para hyrjes në universitet, Zhang Huijun ishte mësues fizkulture. Studimet në Universitetin e Filmit të Pekinit e ndryshuan rrënjësisht jetën e tij.

Zhang Huijun nuk do të harrojë kurrë gëzimin e madh kur hyri ditën e parë në Universitetin e Filmit të Pekinit. Më vonë ajo ditë u zgjodh nga revista e famshme kinematografike franceze "Manuali i Filmit" si një nga 100 momentet më emocionuese në historinë e filmit, sepse shumë regjisorë dhe aktorë të famshëm kinematografikë kinezë ishin studentë të rinj të atij viti. Zhang Huijun tha se në universitet, ai jo vetëm mori njohuritë profesionale, por edhe forcoi përgjegjësinë e vet për shoqërinë:

"Duhet t'i shërbejmë shoqërisë nëpërmjet njohurive që zotërojmë. Nxitja e zhvillimi i kinematografisë kineze është detyra jonë."

Pas diplomimit në Fakultetin e Fotografisë, Zhang Huijun mori pjesë në xhirimin e dhjetëra filmave dhe dramave televizive si operator. Disa vepra të tij fituan edhe çmime të mëdha brenda e jashtë vendit. Këto përvoja e kanë ndihmuar shumë në fushën e mësimdhënies. Zhang Huijun shpreson se studentët do të përdorin përvojën e pedagogëve në krijimet e ardhshme artistike:

"Në specialitetin e fotografisë përfshihen shumë shkenca natyrore dhe shkenca shoqërore si optika, fizika etj. Detyra e pedagogëve është që t'u tregojnë studentëve mënyrën e shfrytëzimit të përvojave të mëparshme."

Çdo vit kur Universiteti i Filmit i Pekinit pranon studentë të rinj, Zhang Huijun është shumë i zënë. Atë kohë, mijëra të rinj të krahinave të ndryshme vijnë në universitet për të marrë pjesë në provime. Tani shumë shkolla të larta kineze kanë zgjeruar përmasat e pranimit të studentëve të rinj, por Zhang Huijun ngul këmbë që të kontrollohet rreptësisht numri i tyre:

"Në fakt numri i studentëve të rinj përcaktohet sipas kushteve të mësimdhënies të universitetit. Dua t'i siguroj çdo studenti kushte më të mira studimi me qëllim që të diplomuarit e universitetit tonë të kenë aftësinë e mjaftueshme të merren me kinematografi."

Tani në kohën e lirë, Zhang Huijun është i zënë me përkthimin e veprave të huaja kinematografike, shkrimin e artikujve etj. Ai u shpreh se nëse një ditë nuk do të merret më me punët administrative dhe mësimdhënien, ai dëshiron të xhirojë përsëri filma. (Fani)