dëgjoni

Tan Duni është kompozitor i famshëm kinez. Në vitin 2001, për shkak të muzikës së shkruar nga ai për filmin "Tigri i tulatur dhe dragoi i fshehur", ai fitoi çmimin "Oskar" të atij viti për muzikën më të mirë. Tan Dun është muzikanti i parë kinez që fiton këtë çmim. Në krijimet muzikore, Tan Duni bën përpjekje për të shkrirë kulturën orientale me kulturën perëndimore duke krijuar stilin e vet të veçantë muzikor.

Tan Duni lindi në vitin 1957 në një fshat të vogël pranë qytetit Changsha të provincës Hunan të Kinës qendrore. Kur ishte në moshë të re, babai i Tan Dunit i binte shpesh veglës tradicionale muzikore kineze "erhu" në kohën e lirë. Melodia e bukur e "erhu"-së i la mbresa të thella Tan Dunit të vogël. Ai u habit nga magjia e muzikës. Qysh nga ajo kohë, Tan Duni mësoi t'u binte disa veglave muzikore duke përfshirë disa vegla tradicionale muzikore kineze, violinën etj.

Në vendlindjen e Tan Dunit, sa herë zhvillohen aktivitete e ceremoni të rëndësishme si dasma, varrime etj. muzikantët popullorë interpretojnë muzikë popullore me karakteristika vendëse e mbushur plot me elemente misterioze orientale. Tan Duni u shpreh se muzika popullore e vendlindjes ka ushtruar ndikim rrënjësor mbi krijimet muzikore të tij.

Në fund të viteve '70 të shekullit të kaluar, Tan Duni hyri në Universitetin Qendror të Muzikës të Kinës për të studiuar kompozim. Pas marrjes së doktoratës, ai shkoi në Universitetin Kolumbia të SHBA-së për të studiuar muzikën klasike perëndimore dhe mori gradën e doktorit në muzikë. Pas diplomimit, Tan Duni ka jetuar gjithmonë në Nju-Jork të SHBA-së. Nga vendlindja në Pekin, pastaj nga Pekini në SHBA, Tan Duni ka ndier thellë dallimet kulturore:

"Kur shkova për herë të parë nga vendlindja në Pekin, më vonë nga Pekini në Nju Jork, ndjeva dallimet e mëdha kulturore dhe pashë zakonet e ndryshme."

Gjatë studimeve në Nju Jork, si shumë studentë kinezë, Tan Duni u befasua nga ndryshimet kulturore midis Lindjes dhe Perëndimit. Ai ka bërë përpjekje të mëdha për të shkrirë kulturën orientale me kulturën perëndimore në krijimet muzikore duke pasur rezultate.

Me ftesën e regjisorit të famshëm kinez Li An, Tan Duni shkroi muzikën e filmit të Li Anit "Tigeri i tulatur dhe dragoi i fshehur". Gjatë krijimit, Tan Duni përdori plotësisht karakteristika të ndryshme të veglave tradicionale muzikore kineze dhe të violonçelit perëndimor duke krijuar një atmosferë mistike dhe pak të dhimbshme që lidhet ngushtë me tregimet e filmit:

Melodia që po dëgjoni është pikërisht melodia e filmit "Tigri i tulatur dhe dragoi i fshehur" e krijuar nga Tan Duni. Kjo melodi fitoi çmimin "Oskar" të vitit 2001 për muzikën më të mirë.

Tan Duni ka pasur sukses në drejtim të shkrirjes së muzikës orientale me muzikën perëndimore, por shumë njerëz ende janë dyshues për stilin muzikor të Tan Dunit. Tan Duni ngul këmbë që muzika është një art pa kufizime dhe plot me imagjinatë:

"Një herë një kritik muzikor amerikan u shpreh se muzikantët kinezë nuk duhet të krijojnë muzikë perëndimore. Nuk bie dakord me mendimin e tij. Jam një kompozitor ndërkombëtar dhe krijoj vepra muzikore për dëgjuesit e mbarë botës."

Tani Tan Dun jeton në Nju Jork. Jetesa e tij është shumë e thjeshtë. Gjatë krijimeve muzikore, ai ka provuar të përdorë mjete të ndryshme si ujë, gur, gjethje etj. për të bërë muzikë. Veprat seriale muzikore të krijuara kohët e fundit nga Tan Duni si "muzikë uji", "muzikë guri", "muzikë gjethjeje" etj. kanë fituar miratimin e qarqeve artistike ndërkombëtare dhe janë shfaqur shumë herë në festivale të ndryshme artistike. (Fani)