dëgjoni

Në verën e vitit 2008, do të zhvillohen në Pekin Lojërat e 29-ta Olimpike. Për të përhapur figurën e vet si një qytet ndërkombëtar, që nga shtatori i vitit të kaluar Pekini nisi aktivitetin "Regjisorët e njohur botërorë xhirojnë filma për Pekinin". Gjatë këtij aktiviteti do të ftohen disa regjisorë me prestigj në botë t'i njohin shikuesit e vendeve të ndryshme me Pekinin nëpërmjet filmave me metrazh të shkurtër. Si regjisori i dytë që merr pjesë në këtë aktivitet, regjisori iranian Magjid Magjidi erdhi në Pekin në fund të vitit të kaluar. Në programin e sotëm do t'ju flasim për këtë regjisor, si dhe për veprën e tij të re rreth Pekinit.

Magjidi është i njohur në botë për dy filma "Fëmijët në parajsë" dhe "Ngjyrat e parajsës". Kësaj here, atij iu kërkua të pasqyronte pamjet tipike të Pekinit me një film 5 minutësh. Ai pohoi se kjo është e vështirë, sepse Pekini ka një histori 3000 vjeçare dhe ky qytet i lashtë është gjithashtu modern. Prapësëprapë, ai u përpoq të nxirrte temën nga jeta e banorëve të thjeshtë.

Magjidi zgjodhi më në fund mënyrën e njohur për të, d.m.th. të parit e botës nëpërmjet vështritimit të çiltër të fëmijëve.

"Ndoshta unë jam i njohur për filmat me temën e fëmijëve. Çiltëria e fëmijëve frymëzon artistët, prandaj edhe personazhi i filmit tim është fëmijë."

Magjidi tha se ky film rreth Pekinit do ta bëjë të njohur me këtë qytet nga 5 drejtimet: tradita, historia, kultura, qytetërimi dhe modernizimi.

Në sheshin e xhirimit në një lagje të lashtë të Pekinit, "Liulichang", një tufë fëmijësh kaluan me biçikletë, duke mbajtur balona të purpurta. Kjo pamje u ngjan pak a shumë kuadrove të shfaqura në filmat e Magjidit, ku fëmijët vrapojnë me gëzim nëpër rrugicat e ngushta të fshatit të vogël të Iranit. Magjidi pohoi se ai e preferon një filmim të tillë. Ai e ka zakon që ta fshehë kamerën për të kapur kuadro të jetës së vërtetë. Nganjëherë edhe aktorët nuk e dinë ku gjendet aparati i xhirimit. Në fakt në këtë film rreth Pekinit, Magjidi nuk përdori asnjë aktor profesionist, ndërsa numri i fëmijëve që morën pjesë në xhirim kaloi 1000.

Magjidi e emërtoi këtë film të shkurtër me titullin "Paqja-Dashuria-Miqësia". Në ceremoninë e nisjes së xhirimeve, ai u lut për mbarëvajtjen e tyre duke cituar "Kuranin". Si një mysliman i devotshëm, Magjidi di si të çmojë paqen dhe dashurinë. Moton e Lojërave Olimpike 2008, "E njëjta botë, e njëjta ëndërr", Magjidi e kupton kështu:

"Olimpiada e kalon sferën e lëvizjes sportive dhe është simboli i bashkekzistencës harmonike të vendeve e kombeve të ndryshme. Nëpërmjet kësaj mbledhjeje të madhe, njerëzit çmojnë më shumë paqen dhe miqësinë."

Regjisori Magjid, që lindi në vitin 1959 në Teheran, parapëlqente që fëmijë futbollin dhe notin. Por në jetë, ai realizoi një tjetër ëndërr, që e ruante që nga fëmijëria, d.m.th. të shpjegojë jetën e ndryshme në vende të ndryshme të botës nga këndvështrimi i vet. Si regjisor, Magjidi është i mendimit se arti, veçanërisht arti kinematografik, është urë e mirëkuptimit dhe e shkëmbimeve. Nëpërmjet filmave mund të transmetohen paqja dhe miqësia.

"Filmat, duke kapërcyer politikën, mund të pasqyrojnë të vërtetën e karakterit njerëzor. Veçanërisht për Iranin, mediet perëndimore njoftojnë në mënyrë negative. Unë shpresoj se nëpërmjet filmave të mi, nëpërmjet fjalëve të fëmijëve, njerëzit mund të shohin një Iran të vërtetë, si dhe karakterin e iranianëve mikëpritës dhe paqedashës."

Pas xhirimeve dyjavore në Pekin, Magjidi u kthye në Iran për prodhimin e filmit. Para tij, regjisori italian Xhuzepe Tornatore u ftua i pari në Pekin për të xhiruar film. Më vonë, do të vijnë në Pekin edhe 3 regjisorë të tjerë të njohur, që janë amerikani Oliver Stoun, kinezi Xhon Wu, si dhe australiania Xhan Kampion. (Wang Lei)