dëgjoni

Në Lojërat e 6-ta Aziatike Dimërore, që u zhvilluan në fund të janarit në qytetin Changchun të Kinës verilindore, delegacioni i Kinës u radhit në vendin e parë të listës së medaljeve të arta me 19 medalje të tilla dhe në njëjtën kohë, paraqitja mahnitëse e shumë sportistëve kinezë në këto lojëra u la përshtypje të thella kolegëve aziatikë dhe të vendeve të tjera. Personalitete të qarqeve të sporteve dimërore bënë të ditur se një nga shkaqet kryesore të ngritjes së nivelit të sportistëve kinezë është se janë ftuar shumë trajnerë të huaj të nivelit të lartë në Kinë.

Në listën e trajnerëve të delegacionit kinez që mori pjesë në Lojërat e 6-ta Aziatike Dimërore, 8 trajnerët e huaj zinin pothuajse 1/4 e numrit të përgjithshëm të trajnerëve të delegacionit kinez. Këta trajnerë vijnë përkatësisht nga Kanadaja, Finlanda, Suedia, Gjermania dhe Koreja e Jugut, vendet e përparuara në sportet dimërore. 6 prej tyre janë për disiplinat e sporteve mbi akull, ndërsa 2 të tjerë për ato mbi dëborë. Pjesa e madhe e këtyre trajnerëve kanë qenë në Kinë si trajnerë për mbi një vit.

Ndër këta 8 trajnerë të huaj, më i famshmi është trajneri kryesor i ekipit të dygarëshit dimëror, gjermani Klaus Siebert, sepse ai ka përgatitur Gilbert Gresin, që fitoi dy medalje të arta në Lojërat Olimpike Dimërore të Torinos. Në gjashtëmujorin e parë të vitit 2006, Sieberti u ftua nga ekipi kinez. Me të marrë detyrën, ai dha recetë për pikën më të dobët të ekipit të dygarëshit, teknikën e qitjes. Pas stërvitjeve mbi 6 mujore, ekipi kinez i dygarëshit ka pasur ngritje të shpejtë. Në Lojërat Aziatike Dimërore, ky ekip bëri të vetat 3 vendet e para në disiplinat 7.5 kilometra për femra dhe 10 kilometra të gjuajtjes për femra. Drejtori i delegacionit kinez Wang Wengang e vlerësoi shumë Siebertin që ka sjellë një koncept krejt të ri të stërvitjes. Ai tha:

"Ai jo vetëm i ndihmoi sportistët në ngritjen e rezultatit nga ana e konceptit dhe ajo e teknikës së qitjes, por edhe na ndihmoi ne trajnerët kinezë në ngritjen e aftësisë së mësimit. Nga praktika mbi 6 mujore ne kemi parë rezultate të mira."

Në fakt, Sieberti jo vetëm i ka sjellë ekipit kinez konceptin evropian të stërvitjes, por ka marrë parasysh edhe gërshetimin e këtij koncepti me karakteristikat fizike të sportistëve kinezë. Sieberti tha:

"Nuk mund të kopjoj mekanikisht metodat evropiane të stërvitjes, e prapësëprapë, sportistët kinezë janë ndryshe nga ata evropianë në vullnet dhe në forcën trupore."

Krahas Siebertit, edhe suedezi Per-Erik Ronnestrand u ka lënë përshtypje të thella trajnerëve e sportistëve kinezë. Në një veprimtari të madhe të organizuar nga Federata Ndërkombëtare e Skive, ekipi kinez fitoi dy medalje të arta. Kryetari i Shoqatës së Skive të Kinës Wang Jitao e vlerësoi lart punën e Ronnestrandit në Kinë me fjalët "Aftësia konkurruese e Kinës në disiplinat sportive të skive në mjedis të hapur është ngritur me një shpejtësi të paparë."

Përfshirja e shumë trajnerëve të huaj në sportet dimërore kineze ka sjellë ide të reja dhe koncepte të përparuara të stërvitjes. Këto kanë luajtur rol aktiv në zgjerimin e fushëpamjes të trajnerëve kinezë dhe në ndihmën ndaj sportistëve kinezë në kapërcimin e vështirësive teknike. Atëherë, pse kaq shumë trajnerë të huaj kanë qejf të vijnë në Kinë? Një funksionar i Drejtorisë së Përgjithshme Shtetërore të Sporteve dhe Fizkulturës të Kinës tha se nga njëra anë me shtimin e potencialit të Kinës, pala kineze ka më shumë fonde për të ftuar trajnerë të huaj dhe, nga ana tjetër, shumë trajnerë të huaj tregojnë optimizëm për perspektivën e sporteve të dimërore kineze dhe, njëkohësisht ata e konsiderojnë si një "sfidë" tërheqëse ardhjen në Kinë për të ndihmuar ekipin kinez të arrijë suksese në Lojërat Olimpike Dimërore.

Trajneri gjerman i ekipit kombëtar të dygarëshit dimëror të Kinës Siebert tha se ka shumë shpresa për perspektivën e ekipit kinez dhe kjo është një nga arsyet kryesore që ai erdhi në Kinë.

"Ekipi kinez i femrave është më i forti në Azi, por në sferën botërore, ai është më i dobët se shumë ekipe të forta evropiane. Megjithatë, ky është një ekip i ri dhe këto vajza kineze kanë mjaft kohë për stërvitje dhe për të rezervuar forca për edicionin tjetër të Lojërave Olimpike."

Edhe trajneri kanadez i kurlingut Randi Perri shprehu mendimin të përafërt. Ai beson në potencialin e ekipit kinez. Megjithëse nënshkroi kontratë vetëm njëvjeçare me ekipin kinez të kurlingut, ai pret që ky ekip të shpallet kampion në Lojërat Olimpike Dimërore 2010.

Ndoshta, në vitin 2010 këta trajnerë të huaj që kanë qejf të përballojnë sfida, dhe dishepujt e tyre të zellshëm do të ngrenë një "stuhi kineze" në Lojërat Olimpike Dimërore të Vankuverit. (Wang Lei)