Para ngritjes së tij në fronin perandorak, Kina ndodhej në një periudhë përçarjeje. Brenda 53 vjetëve pas përfundimit të dinastisë Tang në vitin 907 të erës së re, në krahinat qendrore të Kinës lindën njëra pas tjetrës 5 dinasti me 10 regjime të pavarura. Kjo periudhë u quajt në historiografi "5 dinastitë me 10 regjime". Për shkak të sulmeve ndaj njëra-tjetrës, ato bënin vrasje dhe grabitje. Populli hiqte të zitë e ullirit dhe shoqëria ishte plot me tronditje.

Zhao Kuang Yin kishte qenë në fillim një gjeneral i shquar i regjimit Houzhou. Për talentin e tij të shquar si komandant, ai fitoi besimin e veçantë të monarkut dhe u bë kryekomandanti i gardës së regjimit Houzhou. Në vitin 959 të erës së re, vdiq monarku i këtij regjimi, Çai Rong, dhe djali i tij 5 vjeçar trashëgoi fronin. Zhao Kuang Yin, që kishte në dorë kompetencën e komandimit të ushtrisë, deshi ta zëvendësonte dhe filloi të përgatiste një grushtshteti.

Në vitin 960 të erës së re, me rastin e vitit të ri, Zhao Kuang Yin falsifikoi një informacion mbi sulmin e armikut, mobilizoi trupat dhe i dërgoi në lokalitetin Çenqiaoyi në periferi të kryeqytetit të atëhershëm Kaifeng. Vëllai i tij dhe pasuesit e tjerë, që shërbenin në ushtri, ndërsyen ushtarakët që të revoltoheshin. Në këtë mënyrë, Zhao Kuang Yin e zuri lehtë fronin perandorak dhe e emërtoi regjimin e tij "dinastia Song". Ai u soll mirë me familjen e të ndjerit monark, duke e quajtur të venë e tij "kunatën e madhe" dhe duke i mbajtur fëmijët e saj si fëmijët e vet të adoptuar.

Ai, në radhë të parë, i vuri në postet zyrtare të gjithë ushtarakët që morën pjesë në grushtshtet dhe që e përkrahën atë për ngritjen në fron dhe, duke u mbështetur në forcat e tyre, shtypi rebelët që u ngritën kundër tij. Por pasi u stabilizua situata, ai filloi të shqetësohej se mos ndokush prej njerëzve me merita mund të ngrihej për të rrëmbyer pushtetin. Ai shtrydhi trutë për të këtë gjë. Një ditë, ai ftoi të gjithë gjeneralët në një koktej. Në kohën kur të pranishmit kishin pirë mjaft dhe ishin gjysmë të dehur, ai psherëtiu dhe tha: "Ah, unë e kuptoj mirë se të gjithë njerëzit në këtë botë mundohen vetëm të kërkojnë lumturi. Pse të mos i lini armët dhe të shkoni në fshat për të blerë së më shumë toka dhe për të ndërtuar banesa luksoze? Po të bëni ashtu, ne mund të bëhemi krushq." Të pranishmit e kuptuan menjëherë mendimin e tij dhe dhanë dorëheqjen nga postet e tyre. Zhao Kuang Yin mbajti fjalën e dhënë dhe bëri krushqi me ta.

Në vitin 976 të erës së re, Zhao Kuang Yin vdiq nga një sëmundje gjatë luftës së ekspeditës drejt veriut, duke ia lënë fronin vëllait të tij. Megjithëse nuk mundi të realizonte plotësisht ribashkimin e Kinës, Zhao Kuang Yin i dha fund gjendjes së turbullirave dhe rrëmujave të shkaktuara nga luftërat midis regjimeve të ndryshme për një kohë të gjatë. Meritat e tij, komentohen pozitivisht në historiografi. (Zheng)