dëgjoni

Pak kohë më parë, në qytetin Shangai, qyteti më i madh në Kinë, 300 maturantë të këtij viti u pranuan në Universitetin e famshëm Fudan, pa marrë pjesë në provimet e përgjithshme kombëtare, por në bazë të konkurrimit nëpërmjet provimeve me gojë, gjë që është diçka e paparë në historinë e arsimit të Republikës Popullore të Kinës.

Ndër maturantët, që u pranuan në Universitetin Fudan, është edhe vajza Zhang Moran, e cila mbaroi mësimet në një shkollë të mesme të Shangait dhe u shqua nga të 1000 maturantët pjesëmarrës në provimet me gojë. Duke folur për eksperiencën e vet, ajo tha se, në krahasim me provimet me shkrim, provimet me gojë mund të provojnë më saktë nivelin e përgjithshëm të maturantëve.

"Mua më duket se nota, që merr dikush në një provim me shkrim, sado e lartë që të jetë, nuk tregon plotësisht se ai ka nivelin më të lartë e parë në kompleks. Unë jam e mendimit se janë të domosdoshme edhe provimet me gojë, që mund të provojnë nëse pjesëmarrësit në provime kanë ide të sakta dhe janë në gjendje t'i bindin të tjerët me mendimet e tyre."

Para provimeve me gojë, Universiteti Fudan organizoi edhe disa provime të thjeshta me shkrim të lëndëve mësimore të gjuhës, matematikës, anglishtes, kompjuterit etj dhe, mbi bazën e provimeve me shkrim, caktoi 1000 maturantët pjesëmarrës në provimet me gojë prej 6000 maturantëve që u regjistruan dhe që morën pjesë në provimet me shkrim.

Për të kryer me sukses këtë punë, Universiteti Fudan organizoi një juri të përbërë nga 100 profesorë me prestigj në fushat e shkencave humanitare, të shkencave natyrore dhe të edukimit moral. Në ditën e provimeve, u vendos që çdo maturant pjesëmarrës të jepte përgjigje para 5 profesorëve, të caktuar me short, dhe secili prej të 5 profesorëve të bënte 15 minuta dialog me të. Në bazë të këtyre provimeve, profesorët zgjodhën 300 maturantë si studentë të rinj.

Maturantët, që morën pjesë në këto provime me gojë, thonë se titujt e provimeve kanë qenë të shumëllojshëm, siç janë "Jepni disa shëmbuj për të vërtetuar se ju jeni një njeri me ndjenja përgjegjësie", "Si do të zgjidhni bllokimin e shpeshtë të trafikut dhe transportit urban të Shangait, po të jeni kryetari i Bashkisë së qytetit Shangai", "Çfarë do të bëni, në qoftë se do t'ju jepet një fond për të organizuar një sërë aktivitetesh të mëdha", si dhe pyetje të tjera.

Zv-rektori i Universitetit Fudan, Cai Dafeng tha se, si administratori i një shkolle të lartë, ai ka përgjegjësinë jo vetëm të njohë nivelin e njohurive dhe aftësinë studimore të maturantëve që do të pranohen si studentë të rinj, por edhe të dijë se në ç'rrethana janë rritur ata dhe çfarë ata mendojnë. Por këto të fundit nuk i marrim vesh dot nëpërmjet provimeve të përgjithshme kombëtare me shkrim, prandaj Universiteti Fudan organizoi kësaj here edhe provimet me gojë, me qëllim që t'i njohim maturantët në mënyrë më të gjithanshme.

"Përpiqemi që, nëpërmjet provimeve me gojë, të vëmë re gjërat që mund të pasqyrojnë mentalitetet dhe virtytet morale të këtyre maturantëve, sidomos të vëmë re konceptet e tyre ndaj shoqërisë dhe ndjenjat e tyre të përgjegjësisë shoqërore. Duam të njohim edhe potencialin e tyre për studimet dhe hulumtimet akademike dhe të shohim nëse ata kanë veti për të komentuar dhe për të kritikuar diçka. I kushtojmë rëndësi edhe eksperiencës së tyre në aktivitetet shoqërore."

Në Kinë, shkollat e larta pranojnë studentët e rinj zakonisht nëpërmjet konkurrimit me provime të përgjithshme kombëtare me shkrim. Këto provime tregojnë vetëm se si maturantët kanë përvetësuar njohuritë nga librat, prandaj nxënësit u kushtojnë vëmendjen vetëm notave në provime, ndërsa nënvleftësojnë zhvillimin e tyre të gjithanshëm. Pikërisht për këtë arsye, kanë dalë mjaft "fëmijë me nota të larta dhe me aftësi të ulët".

Vang Tian-yu, një nga maturantët që morën pjesë në këto provime, tha se megjithëse nuk u pranua në Universitetin Fudan, ai kuptoi se çfarë metodë mësimi duhet të ketë ai.

"Kuptova se përgatitjet për provime të tilla me gojë duhej të bënim që në vitet e para të shkollës së mesme dhe jo në një javë para provimeve. Krahas mësimeve në klasë, ne duhej të merrnim pjesë në aktivitetet shoqërore dhe në konkurset e ndryshme të organizuara nga organizatat e Bashkimit të Rinisë dhe nga shoqata e nxënësve. Pjesëmarrja në këto aktivitete mund të na rritë aftësitë edhe në fusha të tjera."

Mënyra e re, që përdori Universiteti Fudan për pranimin e studentëve të rinj, u pëlqye shumë nga personalitete të qarqeve arsimore dhe të mediave si dhe nxënësve dhe prindërve të tyre. Ata shprehën mendimin se kjo praktikë pasuroi më tej mënyrën e pranimit të studentëve të rinj dhe do të luajë një rol orientues në forcimin e edukatës morale të nxënësve të shkollave të mesme dhe shkollave fillore. (Zheng)