Ju flet Radio e Jashtme e Kinës! Të dashur dëgjues, unë jam Pina, Po takohemi në programin e sotëm muzikor. Më 18 shkurt fillon festa tradicionale kineze, Festa e Pranverës që është festa më e rëndësishme e popullit kinez. Sipas kalendarit bujqësor kinez, kjo është dita e parë e një viti të ri. Prandaj ju uroj juve gëzuar vitin e ri, shëndet dhe mbarësi sipas zakoneve tradicionale kineze.

Të dashur dëgjues, sapo ndoqët melodinë "Gëzohemi shumë". Kinezët i kushtojnë rëndësi të madhe Festës së Pranverës. Punën përgatitore për këtë festë e kanë filluar para një muaji. Të gjitha familjet pastrojnë shtëpinë, blejnë ushqime dhe sende të përdorimit të përditshëm, përgatisin për fëmijët petka të reja, dhurata etj. Në të njëjtën kohë njerëzit ngjisin hieroglifen kineze "lumturia", parulla paralele, piktura të vitit të ri etj.

Festa e Pranverës është festa e mbledhjes së të gjithë anëtarëve të familjes. Kjo i ngjan shumë ditës së Krishtlindjeve në perëndim. Në vigjiljen e festës, njerëzit kthehen nga të katër anët në shtëpinë e prindërve për t'u mbledhur së bashku dhe për të gëzuar lumturinë familjare. Natën e vigjiljes, të gjithë anëtarët e familjes nuk flenë gjumë, bëjnë muhabet duke u ulur rreth e rrotull. Sot me ngritjen e nivelit të jetesës së kinezëve, më shumë njerëz kalojnë natën e vigjiljes duke shijuar mbrëmjen artistike të organizuar nga Televizioni Qendror i Kinës me rastin e festës. Tani nga "Kënga e natës së vigjiljes" le të ndjejmë atmosferën e këndshme familjare.

Në këngë thuhet: "Sa e mbarë është nata e vigjijes. Këtë natë do ta kaloj së bashku me babanë dhe nënën. Vitin e ardhshëm do të shtoj edhe një vit dhe do të jem më i shëndetshëm. Viti i ri do të më sjellë shpresa të reja dhe do të ketë një pranverë të re."

Natën e vigjiljes, në zonat veriore të Kinës të gjitha familjet hanë jaozi (një lloj ushqim karakteristik kinez), kurse në jug të Kinës, njerëzit hanë niangao (një lloj ëmbëlsire prej orizi ngjitës).

Të dashur dëgjues, kënga që ndoqët titullohet "Bëjmë jiaozi". Në këngë thuhet: "Ti përgatit brumë, unë mish dhe perime të grira, të gjitha familjet bëjnë jiaozi. Ti bën një derrkuc topolak, unë bëj një krap të madh. Të gjitha familjet janë të mbushura me të qeshura."

Sipas zakoneve tradicionale kineze, në ditën e parë të vitit të ri, njerëzit duhet të vizitojnë njëri-tjetrin. Në mëngjesin e kësaj dite, burra e gra, pleq dhe fëmijë të veshur me petken e festës shkojnë për të vizituar të afërmit dhe miqtë, ose rrinë në shtëpi për të pritur mysafirët. Kur takohen, njerëzit i urojnë reciprokisht: Gëzuar vitin e ri, dhe përshëndetje të tjera të mbara. Tani le të dëgjojmë këngën "Vizitojmë njëri-tjetrin".

Gjatë Festës së Pranverës organizohen edhe shumë aktivitete folklorike, si vallja e luanit, vallja e dragoit, etj. Mund të themi se dragoi dhe luani janë simbol i kombit kinez, vallet e luanit dhe dragoit simbolizojnë frymën kënbëngulëse dhe përparimin e tij. Le të shijojmë tani këngën "Gëzimi i Festës së Pranverës", e cila përshkruan një vajzë që shikon në rrugë vallen e dragoit.

Një nga aktivitetet e rëndësishme që organizohen me rastin e Festës së Pranverës është panairi. Gjatë kësaj feste panairi nuk është vetëm treg i shit-blerjes së mallrave, por më kryesor është terreni i argëtimeve, ku shfaqen programet artistike popullore nga më të ndryshmet. Tani le të dëgjojmë këngën "Shkojmë në panair", për të ndjerë atmosferën entuziaste të atjeshme.

Përveç aktiviteteve të ndryshme, në ditët e festës edhe ushqimet janë shumë karakteristike. Në veri të Kinës hahet jiaozi, në jug hahet niangao. Në të njëjtën kohë, në tryezë duhet të ketë patjetër pulë dhe peshk, simbol i mbarësisë dhe tepricës. Më poshtë do të shijojmë së bashku këngën "Ditët e Festës së Pranverës".

Në mbarim të programit të sotëm, ju ftoj të dëgjoni një melodi të bukur me titull "Mbarësia". Ju uroj mbarësi dhe të realizoni të gjitha dëshirat gjatë vitit të ri.

Ju flet Radio e Jashtme e Kinës! Të dashur dëgjues, ndoqët një program muzikor me titull "Kalojmë të gëzuar Festën e Pranverës". Mirudëgjofshim të shtunën tjetër. Në mikrofon për ju, Pina.