18 shkurti është Festa e Pranverës e Kinës. Çdo vit gjatë kësaj feste, folkloristi kinez Wang Zuoji është shumë i zënë me organizimin e aktiviteteve të ndryshme kremtuese dhe me njohjen e të rinjve me zakonet e ndryshme tradicionale lidhur me Festën e Pranverës.

68-vjeçari Wang Zuoji lindi në qytetin e Pekinit. Kur ishte i vogël, ai e ndiqte të atin që merrej me biznes dhe pothuajse ka shkuar në të gjitha rrugët e Pekinit. Pikërisht në atë kohë, ai pati kontaktet fillestare me kulturën e pasur popullore kineze duke treguar interes të madh për folklorin kinez. Në vitin 1956, Wang Zuoji filloi studimet folkloristike nën drejtimin e folkloristit të famshëm kinez Jin Shoushen.

Wang Zuoji ka qenë në krahinat e ndryshme kineze për të hetuar folklorin vendës duke krijuar teorinë e vet folkloristike. Ai është i mendimit se në zakonet popullore përfshihen shumë kërkesa dhe dëshira të popullit. Për shembull në Festën e Pranverës, shumë kinezë varin në derë pikturën e perëndisë së derës për të mbrojtur sigurinë e tërë familjes:

"Zakonet popullore janë një lloj kulture e fatmirësisë. Kjo kulturë mund të nxitë krijimin e shoqërisë harmonike. Në fakt perënditë krijohen nga njerëzit vetë, ato përfaqësojnë idealin dhe dëshirat e njerëzve."

Për mendimin e Wang Zuoji-së, me zhvillimin e pandërprerë shoqëror e ekonomik, shumë zakone popullore janë mënjanuar. Për të përhapur trashëgimitë e shquara kulturore kineze, Wang Zuoji hapi një emision të posaçëm në radio ku i njeh dëgjuesit me zakonet popullore dhe mirësjelljen tradicionale kineze. Emisioni i tij ka fituar përshëndetjen e dëgjuesve, shumë prej të cilëve kanë dërguar letra ose kanë marrë në telefon për ta vlerësuar këtë emision. Wang Zuoji është i mendimit se megjithëse ekonomia moderne e tregut ka penguar zhvillimin e kulturës popullore tradicionale, në fakt tregtia dhe kultura mund të zhvillohen së bashku. Prandaj Wang Zuoji organizon shpesh seminare për biznesmenët me temën e zhvillimit të ekonomisë nëpërmjet trashëgimive e zakoneve kulturore. Ai tha:

"Biznesmenët kinezë duhet të ndjekin një rrugë zhvillimi nëpërmjet lidhjes së biznesit me kulturën. Vetëm kështu biznesi do të zhvillohet më mirë."

Për shkak të famës në fushën e studimeve folkloristike, edhe shumë të huaj e kanë ftuar Wang Zuoji-në t'i njohë me folklorin kinez. Vitin e kaluar, gjatë vizitës së një delegacioni qeveritar francez në Kinë, Wang Zuoji i njohu mysafirët francezë me zakonet dhe tregimet interesante të Pekinit të lashtë duke fituar përshëndetjen e tyre. Ata e ftuan Wang Zuoji-në të shkojë në Francë këtë vit për mësimdhënie. Pak kohë më parë, qarqet akademike kineze e japoneze organizuan bashkërisht një forum për të studiuar lojërat e fëmijëve jashtë shtëpisë. Wang Zuoji tregoi në këtë forum dhjetëra lojëra tradicionale kineze për fëmijë dhe analizoi prejardhjen historike të çdo loje. Shumë pjesëmarrës të forumit u shprehën se fjalimi i Wang Zuoji-së e shtoi shumë njohjen e tyre për këtë temë.

Në vitin 2008, do të zhvillohen në Pekin Lojërat Olimpike, Wang Zuoji është i mendimit se ky është një rast i mirë për përhapjen e kulturës kineze:

"Pekini duhet të shfaqë plotësisht kulturën dhe zakonet e veta të veçanta në Lojërat Olimpike të vitit 2008. Nëpërmjet Lojërave Olimpike, kultura folklorike mund t'u lërë popujve të mbarë botës përshtypje të thellë."

Për shumë vjet me radhë, Wang Zuoji ngul këmbë të përhapë kulturën tradicionale kineze në shkolla fillore dhe të mesme. Ai shpreson që nëpërmjet përpjekjeve të tij, më shumë të rinj do t'i kushtojnë vëmendje mbrojtjes së kulturës tradicionale kineze. (Fani)