Ju flet Radio e Jashtme e Kinës! Të dashur dëgjues, unë jam Pina, ju përshëndes përsëri nga Pekini. Në programin e sotëm të muzikës kineze do t'ju paraqit një grup këngësh popullore kineze, të kënduara nga Kori i Pionierëve "Zambaku". Së pari ju ftoj të dëgjoni këngën popullore të provincës Henan me titull "Thurim shporta lulesh".

Kënga që po ndiqni "Thurim shporta lulesh" është një këngë popullore e përhapur gjerësisht në provincën Henan të Kinës qendrore. Kjo këngë me tekst të gjallë dhe melodi të lehtë e të gëzueshme, karakterizohet nga stili i theksuar vendës dhe fryma e jetës. Kënga përshkruan gëzimin e vajzave që po thurin shporta me lule të bukura, të vjela nga mali.

Në këngë thuhet: "Thurim shporta, dhe do të shkojmë me to në malin Nanshan, ku ka shumë lule bozhureje, dhe do të mbushim shportat me këto lule të bukura shumëngjyrëshe."

Të dashur dëgjues, ndoqët këngën "Thurim shporta lulesh".

Kori i pionierëve "Zambaku" u krijua në vitin 1997, të gjithë anëtarët e tij janë nxënës të shkollës së mesme të qytetit Shenzhen, dhe anëtari më i madh i korit është 17 vjeç, ndërsa më i vogli 11 vjeç. Këta nxënës bëjnë përpjekje të mëdha në kohën e lirë për të mësuar artin e korit nën drejtimin e pedagogëve profesionistë. Gjatë 9 vjetëve pas krijimit të tij, ky kor ka mësuar shumë këngë të shquara kineze dhe të huaja, duke krijuar stilin e veçantë të interpretimit.

"Lulet e bukura të jaseminit janë të bardha dhe aromatike, ato pëlqehen nga të gjithë. Tani këputa unë një lule jasemini për t'ia dhuruar atij."

Kënga "Lulja e jaseminit" është një këngë popullore shumë e përhapur e provincës Hebei. Ajo ka melodi të freskët dhe të rrjedhshme. Këtë këngë, Kori i Pionierëve "Zambaku" e ka kënduar pa shoqërim në mënyrë të pastër dhe të hollë, duke shprehur plotësisht bukurinë e këngës.

Tani le të shijojmë këngën "Kënga e fëmijëve malësorë", i kënduar nga Kori i Pionierëve "Zambaku".

Ky është një grup këngësh i përbërë nga 3 këngë popullore të provincës Fujian, të kombësisë hani dhe të kombësisë tujia. Kënga popullore e provincës Fujian "Vjelim çaj" shpreh në mënyrë të gjallë punën e gëzueshme të vajzave. Kënga popullore e kombësisë hani "Ninulla e motrës" me melodi të qetë dhe të butë përshkruan një pamje, ku nëna e re këndon një ninullë për beben e vet. Ndërsa kënga popullore e kombësisë tujia "Dongdongkui", nëpërmjet veglës muzikore frymore "dongdongkui", me melodi të lehtë dhe të shpejtë, shpreh ndjenjat e thjeshta të banorëve të kombësisë tujia që duan punën dhe jetën. Këtë këngë Kori i Pionierëve e ka kënduar bukur dhe me entuziazëm. Le ta shijojmë.

Ju flet Radio e Jashtme e Kinës! Të dashur dëgjues, ndoqët një grup këngësh popullore të kënduara nga Kori i Pionierëve "Zambaku". Mirudëgjofshim të shtunën tjetër. Në mikrofon për ju, Pina.