Li Long Gji e kaloi kohën e tij të fëmijërisë në mes të turbullirave politike. Në vitin 710 të erës së re, Li Long Gji atëherë 25 vjeç bëri grushtshteti, duke shfrytëzuar forcën e gardës perandorake, dhe e ngriti të atin në fronin perandorak. Pas 2 vjetëve, i ati ia la fronin atij.

Në kohën kur u ngrit në fronin perandorak, ai u ndesh me vështirësi të shumta, që kishin mbetur si pasojë e tronditjeve shoqërore për një kohë të gjatë. Por pas 20 vjet pune të efektshme nën sundimin e tij, shteti kinez, që dikur ishte me rrëmujë politike, me ekonomi të falimentuar, me deficit financiar shtetëror dhe me mbrojtje kombëtare të dobët, u shndërrua në një vend të fuqishëm me politikë të pastër, ekonomi të lulëzuar, suficit financiar shtetëror dhe me mbrojtje të konsoliduar. U hap përsëri "Rruga e mëndafshit", një nga rrugët e tregtisë që shkonte nga kryeqyteti Çang-an deri në Azinë Qendrore, Azinë Perëndimore, Azinë Jugore dhe Evropë; edhe transporti detar u zhvillua pandërprerë; vinin dhe shkonin si rrjedhje uji radhët e titullarëve e funksionarëve diplomatikë të vendeve të tjera dhe të miqve të huaj. Në kryeqytetin Çang-an jetonin mbi 1 milionë të huaj. Dinastia Tang ishte bërë një qendër e shkëmbimeve ekonomike dhe kulturore në Azi.

Pas 20 vjetëve si monarku] në fuqi, Li Long Gji kishte ndryshuar karakterin e tij. Ai filloi të besonte disa ministra djallëzorë, ishte i mërzitur për çështjejt politike dhe nuk dëgjonte më vërejtjet e të tjerëve. Meqë i dinte mirë notat e muzikës, ai filloi ta donte veçanërisht nusen e të birit, Jang Yuhuan që ishte e aftë për të kënduar dhe për të kërcyer valle. Puna shkoi deri atje, saqë në moshën 59 vjeçare, ai e mori atë për grua, duke i dhënë titullin aristokratik "Konkubina Fisnike". Ata filluan të këndonin dhe kërcenin ditë e natë. Ai u dha të afërmve të saj privilegje dhe e emëroi vëllanë e saj Jang Guo Zhong kryeministër, i cili filloi të vepronte me arrogancë dhe të shpërdoronte kompetencat.

Si rrjedhim, i gjithë vendi nisi të vuante nga korrupsioni në jetën politike, luftërat kufitare dhe acarimi i kontradiktave shoqërore, etj. Në vitin 755 të erës së re, shpërtheu rebelimi i dy prej gjeneralëve. Kur trupat e rebelëve po i afroheshin kryeqytetit, Li Long Gji u arratis duke e marrë Konkubinën e tij Fisnike si dhe prirë njerëzit e tij. Por gjatë rrugës oficerët dhe ushtarët e gardës u revoltuan, e vranë kryeministrin Jang Guo Zhong dhe i kërkuan perandorit që të vriste edhe Konkubinën Fisnike. I detyruar nga situata aktuale, Li Long Gji i dha asaj urdhrin për vetëvrasje dhe më pas u nis për në provincën Siçuan.

Më vonë, rebelimi u shtyp, por dinastia Tang pësoi goditje fatale dhe filloi të shkonte drejt rënies. Gjatë turbullirave, Li Long Gji u detyrua t'ia linte fronin të birit. Pasi u kthye në Çang-an, ai filloi të jetonte i vetmuar në një pallat të prapëm, duke vddekur në moshën 78 vjeçare. (Zheng)