Dëgjoni

Para disa muajve, filmi kinez i regjisorit të ri Liu Jie "Gjykata në kurrizin e kalit" fitoi çmimin "Horizonte" në Festivalin e 63-të të Filmit të Venecies. Ky është filmi i parë i drejtuar nga Liu Jie. Ai u shpreh se ky çmim ishte më shumë nga ç'priste.

Në fakt, 38-vjeçari Liu Jie është i famshëm si një fotograf filmi. Qysh në moshë të re, ideali i Liu Jies ishte që të bëhej piktor. Por kur ishte në shkollën e mesme, ai pa rastësisht një film që shfaqte panoramat dhe folklorin në krahinat veriperëndimore të Kinës. Panoramat e bukura dhe folklori i veçantë i shfaqur në film e ndryshuan idealin e tij dhe ai vendosi të merret me fotografinë e filmit. Pas mbarimit të mësimeve në shkollën e mesme, Liu Jie hyri në fakultetin e fotografisë të Universitetit të Filmit të Pekinit për studime.

Pas diplomimit në Universitetin e Filmit të Pekinit në fillim të viteve '90 të shekullit të kaluar, Liu Jie shpresonte të gjente punë në ndonjë studio shtetërore filmi, por nuk pati rezultat. Liu Jies i pëlqente shumë filmi dhe nuk dëshironte të hiqte dorë nga ideali i filmit, prandaj vendosi të bashkëpunojë me disa shokë për të xhiruar vetë filma. Atë kohë në Kinë, filmat xhiroheshin kryesisht me investime shtetërore. Liu Jie tha:

"Studiova fotografinë për 4 vjet në universitet dhe dëshiroja shumë të xhiroja menjëherë filma pas diplomimit. Në atë kohë kishte rrallë filma të xhiruar me investime private. Unë bashkëpunova me regjisorin Wang Xiaoshuai dhe xhiruam disa filma."

Regjisori Wang Xiaoshuai është shumë i famshëm në qarqet kinematografike të Kinës. Filmat e tij përshkruajnë kryesisht jetesën e banorëve të thjeshtë kinezë. Liu Jie bashkëpunoi për mbi 10 vjet me Wang Xiaoshuai dhe u bë fotografi i posaçëm i filmave të tij.

Në vitin 2003, Liu Jie shkoi për të punuar në kontenë malore Ninglang të provincës Yunnan të Kinës jugperëndimore. Ninglang është një konte e varfër dhe me infrastrukturë të prapambetur. Për të përhapur njohuritë juridike dhe për të ndihmuar banorët vendës të zgjidhin mosmarrëveshjet juridike, gjyqtarët shkojnë shpesh me kalë atje për gjykimin e çështjeve. Pasi mori vesh këtë gjendje, Liu Jie u prek thellë dhe vendosi të bëhet regjisor dhe të drejtojë një film me këtë temë:

"Dua të xhiroj një film që përshkruan gjendjen e vërtetë. Shpresoj që filmi im mund të nxitë njerëzit t'i kushtojnë vëmendje problemit të zbatimit të ligjit në krahinat e largëta."

Filmi "Gjykata në kurrizin e kalit" përshkruan tregimet e disa gjyqtarëve që përhapin njohuritë juridike dhe zbatojnë ligjin në krahinat e varfra malore duke pasqyruar vullnetin e fortë të tyre për kapërcimin e vështirësive. Për shkak të temës serioze, shumë biznesmenë nuk dëshiruan të japin fonde për xhirimin e filmit. Por Liu Jie nuk hoqi dorë nga përpjekjet, ai harxhoi të gjitha paratë e veta të mbledhura për dasmën në xhirimin e filmit. Pas shfaqjes, filmi tërhoqi menjëherë vëmendjen e gjerë të studiuesve, të organeve qeveritare dhe të qarqeve juridike dhe fitoi çmimin "Horizonte" në Festivalin e Filmit të Venecies. Liu Jie është i mendimit se gjendja e vërtetë e shfaqur në film preku shikuesit:

"Filmi im pasqyron gjendjen e vërtetë të punës të gjyqtarëve që punojnë në krahinat malore. Megjithëse ka shumë vështirësi, kjo është një rrugë e domosdoshme në procesin e ndërtimit demokratik e juridik të Kinës."

Anëtarët e komisionit përzgjedhës të Festivalit të Filmit të Venecies e vlerësuan lart këtë film. Ata ishin të mendimit se ky film paraqet strukturën e veçantë shoqërore të Kinës duke përshkruar ndjenjat e thella midis njerëzve. Liu Jie i falënderoi shumë anëtarët e komisionit përzgjedhës për kuptimin e saktë të filmit të tij.

Liu Jie shprehu shpresën se ai do të xhirojë më shumë filma të njohur që pasqyrojnë hidhërimet dhe gëzimet e banorëve të thjeshtë kinezë. (Fani)