Në vitet '90 të shekullit të kaluar, për shkak të presionit ekonomik dhe për shkak të qirave të ulëta, shumë piktorë të ardhur nga krahinat e ndryshme kineze në Pekin për të kërkuar raste zhvillimi morën me qira shtëpi të fshatarëve në Song Zhuang për banim dhe krijimtari. Qetësia dhe liria e jetesës atje tërhoqën shumë piktorë dhe artistë. Gradualisht Song Zhuang u bë i famshëm si një qendër banimi e artistëve. Sipas një hetimi të bërë nga Hu Jiebao në fillim të vitit 2004, atë kohë në Song Zhuang banonin më se 300 artistë. Pikërisht në atë kohë, Hu Jiebaos i lindi ideja për krijimin e një qyteze të famshme kulturore.

Hu Jiebao u shpreh se para disa vjetëve, ai lexoi dy artikuj lidhur me gjendjen e zhvillimit të sektorit kulturor botëror. Ndikimet e mëdha të sektorit kulturor të SHBA-së dhe të Japonisë mbi ekonominë kombëtare të të dy vendeve i lanë Hu Jiebaos përshtypje të thellë:

"Në fakt këta dy artikuj më ndihmuan të marr vendim për të krijuar një qytezë të famshme kulturore. Në të ardhmen, zhvillimi i sektorit kulturor kinez do të jetë shumë i shpejtë. Njëkohësisht kam një rast të mirë që në Song Zhuang ka kaq shumë artistë."

Nën drejtimin e Hu Jiebaos, në vitin 2005 u krijua Shoqata e Nxitjes së Artit e Song Zhuangut. Kjo është organizata e parë e tillë në qytezat dhe në fshatrat kineze.

Gjatë zhvillimit të punës kulturore, Hu Jiebao ka hasur shumë vështirësi. Në fillim, shumë njerëz nuk e përkrahën idenë e tij. Hu Jiebao kujtoi:

"Disa njerëz kishin keqkuptime për artin modern dhe ishin të mendimit se arti nuk ka lidhje me zhvillimin shoqëror. Në fakt, krijimi i Shoqatës së Nxitjes së Artit ka për qëllim që të nxiten shkëmbimet e artistëve me njëri-tjetrin dhe me organet qeveritare."

Pas krijimit të Shoqatës së Nxitjes së Artit, anëtarët janë shtuar deri në mbi 300 veta. Shoqata ka zgjidhur shumë vështirësi të artistëve duke përfshirë edhe shumë vështirësi të jetesës. Aktivitetet e organizuara nga shoqata kanë nxitur shumë shkëmbimet artistike dhe shkëmbimet midis artistëve. Tani numri i artistëve që banojnë në Song Zhuang ka arritur në mbi 1200.

Hu Jiebao ka bërë përpjekje të mëdha për të ndihmuar artistët në Song Zhuang të përhapin veprat e tyre. Në vitin 2005, Hu Jiebao organizoi Festivalin e parë Artistik të Song Zhuangut. Artistët ekspozuan veprat e tyre duke tërhequr shumë shikues, gazetarë dhe biznesmenë. Nëpërmjet këtij festivali, njerëzit zbuluan se në Song Zhuang ka shumë artistë të shquar. Në vitin 2006, në Song Zhuang u zhvillua Festivali i dytë Artistik. Këtë herë, shkuan atje më se 200 gazetarë kinezë e të huaj dhe u shtuan më shumë kontaktet midis artistëve dhe biznesmenëve të artit.

Në vitin 2006, u krijua në Song Zhuang Galeria e parë e Arteve Fshatare në Kinë dhe u hap një qendër artistike e ndërtuar me investimet e sipërmarrësve privatë. Krahas këtyre, më se 10 galeri të famshme kineze do të krijojnë degë në Song Zhuang ndërsa shoqëria e famshme e karikaturës kineze Sanchen do të ndërtojë në atje një bazë të sektorit të karikaturës. Po ashtu edhe shumë institucione artistike të Danimarkës, të SHBA-së, të Japonisë, të Suedisë etj. kanë hartuar plan për bashkëpunimin me Song Zhuang.

Për të thelluar kuptimin për artin dhe për të ngritur nivelin e vet kulturor, Hu Jiebao shkoi posaçërisht në shkolla të larta për studime. Hu Jiebao tha:

"Kam nxjerrë shumë njohuri nga arti. Veprat e artistëve kanë kuptime të thella dhe duhet të mësoj më shumë në këtë fushë."

Sipas projektit të Hu Jiebaos, pas mbi 10 vjetëve, Song Zhuang do të zhvillohet si një pikë tërheqëse kulturore turistike. (Fani)