Krahas zhvillimit me ritëm të shpejtë të shkencës e teknikës dhe me ndërgjegjësimin e njerëzimit për të rinjohur konceptet mbi sëmundjet, mbi shëndetësinë dhe mbi modelet e mënyrave të mjekimit, shkencëtarët kanë njohur pak nga pak disa veçori karakteristike të mjekësive tradicionale dhe kanë gjetur prej tyre përgjigjet për disa probleme që nuk i ka zgjidhur dot mjekësia moderne. Prandaj vendet e ndryshme të botës kanë filluar njëri pas tjetrit të intensifikojnë kërkimet shkencore dhe zbatimin e mjekësive tradicionale.

Farmaceutika kineze, si një degë e mjekësisë tradicionale kineze, ka pasur gjithmonë rëndësi në Kinë, prandaj është zhvilluar relativisht mbarë dhe është bërë një pjesë shumë e rëndësishme përbërëse e mjekësisë tradicionale botërore. Kryetari i Degës së Bashkëpunimit Ndërkombëtar të Drejtorisë Shtetërore të Farmaceutikës Kineze, zoti Shen Zhixiang foli për këtë çështje.

"Vendet e botës kanë mjekësi të ndryshme tradicionale dhe njëra prej tyre është edhe mjekësia kineze, e cila është relativisht sistematike nga ana teorike dhe praktike, prandaj ajo është përhapur më gjerësisht jashtë vendit."

Kina zhvillon shkëmbimet ndërkombëtare në fushën e mjekësive tradicionale në radhë të parë me qëllim që ta njohë botën me farmaceutikën kineze. Që nga vitet 70 të shekullit të fundit, me mbështetjen e qeverisë kineze, farmaceutika kineze u njoh shumë shpejt në botë. Sipas të dhënave të përafërta statistikore, farmaceutika kineze është përhapur sot në mbi 130 vende të botës, numri i njësive mjekësore që mjekojnë sëmundje me barna mjekësore kineze përtej detit ka arritur në mbi 50 mijë dhe numri i mjekëve që merren me mjekësinë kineze i ka kaluar 120 mijë vetat.

Kina zhvillon në mënyrë të dendur shkëmbimet me vendet e tjera në lëmenjtë e përgatitjes së kuadrove të farmaceutikës kineze dhe të kërkimeve shkencore. Gjatë shumë vjetëve, numri i studentëve të vendeve të tjera që vijnë në Kinë për studimin e farmaceutikës kineze ka zënë gjithmonë vendin e parë në numrin e studentëve të huaj të shkencave natyrore në Kinë. Vitet e fundit është shtuar bashkëpunimi midis shkollave të larta, njësive mjekësore, njësive të kërkimeve shkencore dhe të prodhimit të barnave në Kinës dhe në vende të tjera. Për shembull, Kina zhvillon bashkëpunim me Tanzaninë në kërkimet shkencore për mjekimin e sëmundjes së Sidës me barna mjekësore kineze dhe zhvillon bashkëpunimin me Australinë në fushën e kërkimeve shkencore për mjekimin e sëmundjeve të gjakut me barna mjekësore kineze.

Kina i kushton vëmendje bashkëpunimit me vendet e tjera edhe në fushën legjislative e administrative të mjekësisë tradicionale dhe në punën për përfshirjen e farmaceutikës tradicionale në sistemin mjekësor shtetëror.

Organizata Botërore e Shëndetësisë është e mendimit se mjekësitë tradicionale janë pasuri e përbashkët e njerëzimit dhe përbëjnë burime të rëndësishme të shëndetësisë. Kryetarja e degës së bashkëpunimit në fushën farmaceutike dhe teknike të mjekësisë tradicionale të Organizatës Botërore të Shëndetësisë, zonja Malebona Matsoso, thotë se organizata e saj bën përpjekje për ta çuar përpara zhvillimin e mjekësive tradicionale.

"Në strategjinë globale të zhvillimit të mjekësive tradicionale, që parashtroi Organizata Botërore e Shëndetësisë në vitn 2003, kërkohet që secili prej vendeve anëtare të saj të hartojë politikën shtetërore për zhvillimin e mjekësisë së vet tradicionale dhe ta përfshijë atë në sistemin mjekësor shtetëror, duke u nisur nga kushtet e veta konkrete."

Zv-drejtori i Drejtorisë Shtetërore Kineze të Mjekësisë dhe Farmaceutikës Tradicionale, zoti Li Daning, thotë se Kina ka nënshkruar një marrëveshje me Organizatën Botërore të Shëndetësisë, sipas së cilës do të bashkëpunojnë në zhvillimin e mjekësive tradicionale në arenën ndërkombëtare nëpërmjet shkëmbimeve informative dhe teknike.

"Kina, si një vend anëtar i Organizatës Botërore të Shëndetësisë, ka detyrime dhe mundësi që, nën drejtimin e saj, të bëjë përpjekjet e veta aktive për ta çuar përpara zhvillimin dhe zbatimin e mjekësive tradicionale dhe të ndajë përvojën e vet me vendet e tjera." (Zheng)