dëgjoni

Dinastia Tang (618-907 të erës së re) qe një periudhë kur poezia kineze arriti kulmin dhe emrat e poetëve Li Po dhe Du Fu simbolizojnë arritjet më të larta të poezisë së asaj kohe.

Li Po dhe Du Fu jetuan në shekullin e 8-të të erës së re, që ishte një periudhë e lulëzimit të dinastisë Tang. Li Po, që ishte 11 vjeç më i madh se Du Fu, lindi në një qytet të vogël të zonave veriperëndimore të Kinës, kurse Du Fu ishte nipi i poetit të famshëm Du Shen-yan. Li Po dhe Du Fu filluan të lexonin libra të shumtë që nga koha e fëmijërisë. Të dy pëlqenin bukurshkrimin, pikturimin dhe muzikën, të dy ishin të fortë për lojëra hipur në kalë, duke vringëlluar shpatën. Në kohën e rinisë, ata bënë një jetë romantike duke udhëtuar në shumë krahina të Kinës dhe duke krijuar një numër të madh vargjesh për bukurinë e natyrës.

Li Po ka qenë poeti më i shquar romantik në historinë e letërsisë kineze. Ai na la mbi 900 vepra poetike dhe mbi 60 vepra në prozë, të cilat janë të papara si në periudhat para tij, ashu edhe në periudhat pas tij, si nga ana e gjerësisë së përmbajtjes, ashtu edhe nga ana e larmisë së formës. Me veprat e tij, Li Po ushtroi një ndikim të thellë për shumë poetë të famshëm të brezave të mëvonshëm. Veprat e tij u përkthyen në shumë gjuhë të botës, në anglishte, rusishte, japonishte, gjermanishte etj dhe u përhapën gjerësisht në botë. Poeti impresionist amerikan Pound i përktheu veprat poetike të Li Posë në gjuhën angleze dhe ky libër u vlerësua si "krijimtaria poetike që ushtroi ndikim në gjithë botën e anglishtfolëse të shekullit të 20-të".

Ndryshe nga veprat e stilit romantik të Li Posë, një numër i madh veprash të Du Fusë, që i krijoi ai duke e lidhur ngushtë realitetin shoqëror me jetën e vet personale, përshkruajnë vuajtjet e popullit në mes të turbullirave të luftës, pasqyrojnë pamjen e shoqërisë së dinastisë Tang, që pas një lufte 20 vjeçare, filloi të shkonte nga lulëzimi drejt rënies. Prandaj veprat e Du Fusë konsiderohen si vepra epike.

Në vitet e rinisë, edhe Du Fu krijoi shumë vargje të stilit romantik për të treguar shpirtin e tij burrëror, siç janë vargjet "Pai u ngjita në majën e malit Taishan, malet e tjera më duken si kodra të vogla". Por më vonë, dëshpërimi në rrugën e karrierës dhe jetesa plot vështirësi e bënë Du Fu të njihte objektivisht korruptimin e sundimtarëve dhe vuajtjet e popullit. Kështu, ai u bë gradualisht një poet realist që shqetësohej për hallet e atdheut dhe të popullit dhe shkroi vargjet e famshme "Ndërsa në pallatet e të pasurve mishi prishet, në rrugët jashtë gjenden kufoma të të vdekurve nga e ftohta."

Du Fu na la mbi 1400 vepra poetike. Nga verpat e tij shohim motive të larmishme poezie. Duke marrë të mirat nga poetët e grupeve të ndryshme, ai krijoi poema epike, vjersha lirike dhe vjersha komentuese. Veprat e tij, që janë me përmbajtje të gjerë e të thellë, shprehin ndjenja të çiltra dhe mblidhin arritjet e poezisë në një të tërë. Elementet e reja poetike nga ana e përmbajtjes dhe formës, që gjenden në veprat e tij, kanë zgjeruar sferën e krijimtarisë letrare dhe ushtruan një ndikim të thellë për brezat e mëvonshëm. (Zheng)