Dëgjoni

Yong Rubu është kompozitor dhe dirigjent i famshëm i kombësisë mongole të Kinës. Gjatë jetës muzikore mbi 50-vjeçare, ai ka krijuar shumë vepra muzikore të stileve të ndryshme.

Yong Rubu lindi në vitin 1933 në Rajonin Autonom të Mongolisë së Brendshme të Kinës veriperëndimore. Këngët e bukura popullore të vendlindjes ngjallën dashurinë e tij për muzikën qysh në moshë të re. Yong Rubu tha:

"Vendlindja ime është kullota Kerqin, atje ka këngë të pasura popullore si 'Gadameilin' etj. Që sapo linda, fillova të kem kontakte me këngën popullore."

Në vitin 1947, Yong Rubu u largua nga vendlindja dhe u bë një ushtar artist. Në ushtri, ai shfaqi gradualisht talentin e lartë muzikor. Në vitin 1950, Yong Rubu shkoi për studime në fakultetin e muzikës të Universitetit e Artit Luxun të Kinës Verilindore për studime. Më vonë ai vazhdoi studimet muzikore në Universitetin Qendror të Muzikës në Pekin. Në vitin 1955, ai u kthye në Mongolinë e Brendshme dhe u bë dirigjent dhe kompozitor i Asamblit të Këngëve dhe të Valleve të Zonës Ushtarake të Mongolisë së Brendshme. Por pikërisht kur Yong Rubu ishte gati të zhvillonte çështjen muzikore, Revolucioni Kulturor e detyroi të largohej nga skena e muzikës. Gjatë mbi 20 vjetëve, Yong Rubu nuk pati asnjë rast për shfaqje. Megjithatë, ai nuk humbi shpresën për të ardhmen:

"Nuk hoqa dorë nga muzika. Në kohën e lirë lexoja shumë libra dhe studioja teorinë muzikore perëndimore. Në atë kohë kisha një ideal që një ditë të drejtoja një orkestër të nivelit më të lartë shtetëror të interpretonte simfonitë e krijuara nga unë."

Pas përfundimit të Revolucionit Kulturor, në vitin 1979, Yong Rubu u bë dirigjent dhe kompozitor i Trupës Artistike të Radio-Televizionit të Mongolisë së Brendshme duke rifilluar të merret me muzikë. Nëpërmjet përgatitjes 30-vjeçare, shpërthyen plotësisht entuziazmi dhe frymëzimi muzikor i tij. Në vitin 1989, Yong Rubu realizoi idealin e vet. Ai drejtoi orkestrën qendrore dhe zhvilloi me sukses koncertin e veprave simfonike individuale. Ai është kompozitori i parë i pakicave kombëtare kineze që ka dhënë koncert me vepra simfonike individuale.

Pas kësaj, krijimtaria muzikore e Yong Rubu-së arriti kulmin. Ai krijoi shumë vepra simfonike, këngë, muzikë opere, të dramave televizive etj. Në vitin 1991, simfonia "Kënga e Ergunë-s" e tij fitoi çmimin e artë të Festivalit Ndërkombëtar të Muzikës të Mongolisë. Në vitin 1998, Yong Rubu drejtoi Trupën e Korit të Radios të Mongolisë së Brendshme dhe fitoi çmimin e parë në konkursin e parë të korit të Kinës. Në vitin 2001, kori i krijuar nga ai "Qengji i vetëm" fitoi çmimin më të lartë muzikor të Kinës, çmimin "Kambana e Artë". Në vitin 1999 dhe vitin 2002, u botuan përkatësisht veprat e tij muzikore "Studime për këngët popullore të kombësisë mongole" dhe "4 stinët". Në vitin 2003, u botua albumi i këngëve i tij "Fryma e kullotës" duke fituar përshëndetjen e specialistëve dhe të dëgjuesve.

Yong Rubu u shpreh se muzika popullore është shpirti i veprave të tij, ndërsa kullota subjekti i përhershëm. Ai tha:

"Muzika ime ka karakteristika të veçanta të kombësisë mongole e njëkohësisht kam shpërfaqur edhe shumë karakteristika të muzikës perëndimore. Duhet të forcojmë shkëmbimet me muzikantë të vendeve të ndryshme për të përhapur muzikën tonë në mbarë botën."

Megjithëse Yong Rubu ka dalë në pension para mbi 10 vjetëve, ai është ende shumë i zënë tërë ditën. Yong Rubu u shpreh se krahas punës së dirigjentit, ai vazhdon të merret me krijimtari muzikore. Yong Rubu tha:

"Jam shumë i gëzuar që merrem me muzikë. Kjo është një zgjedhje e drejtë për mua. Do të vazhdoj të merrem me këtë çështje." (Fani)