Dëgjoni

Me rritjen relativisht të shpejtë të ekonomisë kineze gjatë 20 vjetëve të fundit dhe me përparimin e pandërprerë të urbanizimit e industrializimit të vendit, një numër i madh i krahut të punës të tepëruar të fshatit u derdhën në krahinat e zhvilluara për të kërkuar punë në qytet, gjë që solli një problem imediat se si të shkollohen fëmijët e këtyre punëtorëve të përkohshëm nga fshati dhe si t'u jepet atyre mundësia të rriten të shëndetshëm në një mjedis të mirë.

Vitet e fundit, me investimet shtetërore ose me ato private, në disa qytete të Kinës janë hapur shkolla të posaçme për këta fëmijë. Mirëpo në disa prej tyre kanë dalë disa probleme, si problemet e fondeve dhe të nivelit të mësuesve, dhe ato e kanë të vështirë të plotësojnë kërkesat për arsimin e rregullt. Për t'u ofruar këtyre fëmijëve një mjedis të mirë arsimor, administratat e krahinave të ndryshme të Kinës po kryejnë një kontroll dhe kanë vendosur të mbyllin disa prej këtyre shkollave që nuk arrijnë standardin shtetëror. Zëdhënësi i Ministrisë së Arsimit të Kinës, zoti Vang Xumin, tha në një intervistë se qeveria jonë do të ushtrojë administrimin normativ ndaj këtyre shkollave, duke i eliminuar jocilësoret dhe duke i ruajtur cilësoret.

"Do të mbyllim disa prej tyre që nuk kanë kushtet e duhura në përputhje me kërkesën e shtetit ose që nuk administrohen sipas rregullave përkatëse, dhe do t'i trajtojmë si duhet fëmijët që mësojnë në to. Ndërsa ato me cilësi të mirë do t'i lavdërojmë dhe t'i mbështesim."

Zoti Vang Xuming thotë se dikasteret kineze të arsimit do t'i përfshijnë shkollat e kësaj natyre në sistemin unik të administrimit; për sa u përket atyre që kanë kushtet e duhura dhe përputhen me kërkesat e shtetit, dikasteret arsimore do t'i ndihmojnë nga ana e fondeve dhe e specializimit të mësuesve dhe do t'i orientojnë si duhet.

Nxënësja 12-vjeçare Gji Man ka ardhur 2 vjet më parë nga provinca Hënan e Kinës Qendrore së bashku me prindërit që kanë filluar të punojnë përkohësisht në Pekin. Në fillim ajo u çua për të mësuar në një shkollë private posaçërisht për fëmijët e punëtorëve të përkohshëm nga fshati, kurse në shtator të këtij viti, ajo u transferua në një shkollë të rregullt fillore të Pekinit. Ajo tha gjatë bisedës me korrespondentin tonë se shkolla e saj e re ka mjedis mësimdhënieje shumë më të mirë se shkolla ku ajo mësoi më parë.

"Shkolla ime e mëparshme nuk kishte fushë sportive, prandaj në orën e mësimit të fizkulturës ne qëndronim në klasë për të shkruar ushtrimet. Në atë shkollë, një mësues jepte mësim për disa lëndë mësimore. Kurse shkolla ime e tanishme ka një fushë shumë të madhe sportive. Gëzohem shumë që tani edhe ne zhvillojmë mësimin e fizkulturës."

Masa që u mor për të mbyllur disa shkolla jo të mira të posaçme për fëmijët e punëtorëve të përkohshëm të ardhur nga fshati ngjalli diskutime të zjarrta, sepse ata punëtorë dyshonin nëse mësuesit e shkollave të hapura nga shteti mund të silleshin në mënyrë të barabartë me fëmijët e tyre, në qoftë se ata do t'i çonin fëmijët për të mësuar në këto shkolla. Ata dyshonin gjithashtu se mos kuotizacionet shkollore në ato shkolla ishin tepër të larta. Fokusi i diskutimeve ishte nëse këta fëmijë të ardhur nga fshati do të mësoheshin shpejt në jetën e shkollave, pasi do të shpërndaheshin në klasa të ndryshme.

Krahina të ndryshme të Kinës po marrin masa përkatëse me qëllim që këta fëmijë të transferohen në shkolla të hapura nga shteti. Për të zgjidhur këtë problem, rajoni Haidian i Pekinit investoi 13 milionë juanë për ndërtimin e konvikteve të reja dhe për shtimin e tryezave e karrigeve të shkollave që pranojnë këta fëmijë të ardhur nga fshati.

Në qytetin Vusi të provincës Gjangsu, administrata merr masa që fëmijët e punëtorëve të përkohshëm të ardhur nga fshati të regjistrohen dhe të paguajnë kuotizacionet shkollore baras me fëmijët vendas dhe të mësojnë në shkollat që ndodhen më afër banesave të tyre. Zv-drejtori i Drejtorisë së Arsimit të qytetit Vusi, zoti Zhang Yizhong thotë se këta fëmijë të ardhur nga fshati në Vusi gëzojnë shkollim të barabartë ashtu si fëmijët vendas.

"Fëmijët e ardhur nga krahina të tjera ndahen në klasa dhe marrin mësim krejtësisht njësoj si fëmijët e qytetit tonë. Do të bëjmë që ata të përparojnë bashkë me fëmijët tanë dhe të shkrihen sa më parë në jetën e qytetit."

Administrata e provincës Zhegjang ndihmon shkollat e këtij lloji duke investuar për ndërtimin e ndërtesave të reja për to dhe për dhënien e shtëpive me qira të ulët. Duke filluar nga viti 1999, pjesa më e madhe e shkollave të këtij lloji në këtë provincë kanë arritur standardin e përcaktuar nga shteti për hapjen e shkollave, gjë që ka zgjidhur problemin e shkollimit të mbi 200 mijë fëmijëve të punëtorëve të përkohshëm të ardhur nga fshati. (Zheng)