Dëgjoni

2006 nuk ishte një vit i zakonshëm për tenisin kinez. Këtë vit, Kina pati shumë suksese

historike në tenis: çifti Zheng Jie/ Yan Zi u shpall kampion në dy turne të "Titullit të Madh", "Australian Open" dhe "Wimbledon Open". Ndërkohë, Li Na u rendit ndër 8 tenistet më të forta në "Wimbledon Open" dhe vendosi disa herë rekord kombëtar të tenisteve kineze në klasifikimin e Shoqatës së Tenisit të Femrave (WTA). Në prag të sezonit të ri dhe përballë sfidave të Lojërave Olimpike të Pekinit, tenistet kineze synojnë edhe objektiva të rinj. Do të dëgjoni tani një material lidhur me këtë.

Në vitin 2007, një nga detyrat kryesore të ekipit kombë0tar të tenisit të Kinës është rigrupimi i një çifti tenistesh të nivelit botëror. Kampionet e tenisit për femra si çift në Lojërat Olimpike të Athinës, Li Ting/ Sun Tiantian nuk treguan prirje përparimi të mëtejshëm gjatë dy vjetëve të kaluar. Në këto rrethana, ekipi kombëtar i Kinës vendosi prerazi që këto dy teniste nuk do të marrin pjesë në ndeshjet si çift. Për këtë vendim, trajneri i përgjithshëm i ekipit kombëtar të tenisit të femrave Jiang Hongwei shprehu këtë mendim:

"Ndeshjet gjatë këtyre dy vjetëve kanë vërtetuar se ato nuk mund të vazhdojnë si çift. Ato kanë probleme në bashkërendim. Aftësia e Li Tin-it është ulur dhe kjo ndikoi mbi zhvillimin e këtij çifti. Megjithëse ato kanë prestigj si kampione olimpike, prapësëprapë duhet të shkëputen. Në fakt, kjo është një gjë normale."

Sipas planit të ekipit kinez, pas ndarjes së këtij çifti, Sun Tiantian do të marrë pjesë në turnetë e "Titullit të Madh" si dhe veprimtari të tjera të rëndësishme të WTA-së, duke formuar çift me teniste të ndryshme kineze, si me të fortat Li Na dhe Zheng Jie ose me të renë Sun Shengnan etj. Trajneri Jiang Hongwei tha se kjo ka për qëllim që të krijohet një çift i ri dhe i fortë brenda një kohe sa më të shkurtër, që në Lojërat Olimpike të Pekinit, ky çift dhe Zheng Jie/ Yan Zi të sigurojnë një medalje të dyfishtë të artë në tenisin e femrave si çift.

Krahas rigrupimit të çiftit, tjetër detyrë kryesore e tenisit kinez të femrave gjatë vitit 2007 është ekuilibrimi i fuqisë së tenisit si çift me atë si individ. Aktualisht, ndër tenistet kineze Zheng Jie është e vetmja që ka arritur rezultate të mira në të dy disiplinat. Të tjerat nuk kanë mundur të arrijnë në këtë nivel. P.sh. partnerja e Zheng Jie-së, Yan Zi klasifikohet në vendin e 5-të në renditjen e tenisteve si çift, por si individ ajo qëndron vetëm poshtë vendit të 200-të. Ndërkohë, tenistja e parë e Kinës si individ Li Na klasifikohet në vendin e 16-të në botë, kurse renditja e saj si teniste si çift është në vendin e 60-të a 70-të. Për këtë gjendje, trajneri Jiang Hongwei shprehu shqetësim.

"Unë shpresoj se vendet në dy klasifikimet do të jenë të përafërme. Veçanërisht ulja e aftësisë si individ do të ndikojë edhe mbi atë si çift."

Për të ndryshuar rrënjësisht këtë gjendje jo të ekuilibruar, duhet të ngrihet aftësia si individ. Në këtë aspekt, tjetër objektiv i rëndësishëm i ekipit kinez në vitin 2007 është që të ruajë renditjen e Li Na-së, tenistes nr. 1 të Kinës në vendin e 15-të. Në fakt Li Na është plotësisht në gjendje të realizojë këtë objektiv. Mediat e vendeve të ndryshme shprehin optimizëm për perspektivën e Li Na-së.

Mirëpo, cilësia jo shumë e mirë psikologjike ka qenë pengesë për përparimin e saj. Në ndeshjet e tenisit të Lojërave të Azisë në fund të vitit të kaluar, Li Na u klasifikua e para si individ në renditjen praprake, por ajo nuk paraqiti nivelin e saj të vërtetë dhe u eliminua në gjysmëfinale nga një teniste më e dobët se ajo.

Për të ngritur aftësinë e saj përballë presionit, ekipi kinez ka menduar për shumë mënyra.

Një nga këto masa është emërimi i bashkëshortit të saj Jiang Shan si trajner i ekipit kombëtar. Për këtë masë, trajneri i përgjithshëm i ekipit kombëtar të Kinës Jiang Hongwei shpjegoi:

"Do të vazhdojmë të ftojmë një trajner të huaj, por duhet edhe një trajner kinez si ndihmës i këtij trajneri të huaj. Për Li Nanin, duhet një gjendje e qëndrueshme psikologjike. Roli i Jiang Shanit nuk mund të zëvendësohet nga ne të tjerët. Li Na nuk është shumë e pavarur në karakter, ndërsa burri i saj është trajner tenisi. Trajnerët e huaj dhe ne trajnerët kinezë plus burri i saj, shpresojmë të ngremë më tej renditjen e saj në botë."

Viti 2007 është viti i fundit para Lojërave Olimpike të Pekinit. Këtë vit, tenisi kinez ka shumë objektiva për të realizuar. I urojmë suksese! (Wang Lei)