Jin Yuanpu ka qenë profesor i estetikës në Universitetin e Popullit Kinez. Në vitet '90 të shekullit të kaluar, me lulëzimin e sektorit kulturor të Kinës, Jin Yuanpu filloi studimin e këtij sektori të ri. Ai ishte një nga studiuesit që përhapë më herët teorinë e huaj të sektorit kulturor në Kinë. Më vonë Jin Yunpu u bë drejtor i institutit të sektorit kulturor të Universitetit të Popullit Kinez dhe ka botuar shumë vepra të posaçme. Duke folur për shkakun e ndërrimit të objektit të studimit nga estetika në sektorin kulturor, Jin Yuanpu tha:

"Gjatë studimit të estetikës, zbulova se lulëzimi i estetikës ose i artit popullor lidhen ngushtë me zhvillimin e sektorit kulturor. Në fillim të viteve '90 të shekullit të kaluar, sektori kulturor kinez filloi të zhvillohet shpejt e njëkohësisht edhe unë fillova t'i kushtoj vëmendje kësaj fushe."

Në vitin 2000, në Universitetin e Popullit Kinez u krijua Qendra Studimore e Lojërave Olimpike dhe Jin Yuanpu u bë shefi ekzekutiv i saj. Ai është i mendimit se Lojërat Olimpike tërheqin vëmendjen e mbarë botës, ato nuk janë vetëm një koncept sportiv. Jin Yuanpu shprehu shpresën që Pekini të kapë rastin e zhvillimit të Lojërave Olimpike për të nxitur zhvillimin kulturor e shoqëror:

"Jam i mendimit se Lojërat Olimpike të Pekinit do të jenë një rast i mirë për përhapjen e kulturës kineze. Njëkohësisht ne mirëpresim njerëzit e vendeve të ndryshme të vijnë në Pekin për të përhapur kulturën e tyre dhe për të zhvilluar shkëmbime me ne. Lojërat Olimpike të Pekinit duhet të luajnë plotësisht rolin e tyre për zhvillimin e shkëmbimeve kulturore."

Bashkia e qytetit të Pekinit u ka kushtuar rëndësi të madhe mendimeve të Jin Yunpu-së dhe ka pranuar shumë propozime të tij.

Duke filluar nga viti 2003, Qendra Studimore e Lojërave Olimpike ka zhvilluar për 4 vjet me radhë forumin ndërkombëtar olimpik duke ftuar studiues dhe specialistë të vendeve të ndryshme të japin propozime për Lojërat Olimpike të Pekinit të vitit 2008. Krahas këtyre, Jin Yuanpu shpreson të përhapë më tej njohuritë e Lojërave Olimpike ndër masat popullore. Prandaj ai merr pjesë aktivisht në aktivitete vullnetare propaganduese dhe zhvillon bashkëpunimin me ndërmarrje, institucione qeveritare e shkolla të larta për të përgatitur vullnetarë të Lojërave Olimpike, për të përhapur frymën e Lojërave Olimpike dhe për të krijuar një mjedis të mirë humanitar për Lojërat Olimpike të Pekinit.

Si një studiues i sektorit kulturor, Jin Yuanpu është shumë i kënaqur për zhvillimin e shpejtë vitet e fundit të sektorit kulturor kinez dhe për përkrahjen e fuqishme të qeverisë kineze ndaj këtij sektori. Njëkohësisht ai vuri në dukje se në këtë proces ekzistojnë ende disa probleme. Ai u ka bërë thirrje disa herë organeve përkatëse qeveritare të hartojnë politika shkencore për zhvillimin e sektorit kulturor:

"Megjithëse sektori kulturor po zhvillohet shpejt, duhet të vërejmë që në Kinë sektori i prodhimit zë ende një vend më të rëndësishëm. Kjo është gjendja aktuale. Krahinat e ndryshme duhet ta zhvillojnë sektorin kulturor sipas kësaj gjendjeje."

Jin Yuanpu tha se tani zhvillimi i sektorit kulturor kineze përballet ende me disa pengesa si mungesa e talenteve, mospërsosja e sistemit etj. Megjithëse përqindja e sektorit kulturor në GDP është ngritur shpejt, në krahasim me vendet e zhvilluara, kjo përqindje është ende shumë e vogël. Prandaj zhvillimi i Lojërave Olimpike të Pekinit do të jetë një rast i mirë për zhvillimin e sektorit kulturor kinez.

Jin Yuanpu është shumë i zënë me studimet e sektorit kulturor, megjithatë, ai nuk heq dorë nga studimet estetike. Jin Yuanpu tha se estetika është shkenca e bukurisë dhe atij i pëlqejnë të gjitha gjërat e bukura. (Fani)