Para se të nxirej nga varri pas zbulimit, kufoma e kësaj plake aristokrate rreth 60-vjeçare ishte mbështjellë me disa shtresa pëlhure të mëndafshta dhe ishte vënë në një arkivol 6 shtresor. Jo vetëm trupi i saj është ende me lëkurë të lëmuar, por edhe flokët i kanë mbetur të plotë; duken të qarta edhe vijat e rrudhave të gishtave të duarve dhe të këmbëve, madje mishi i gjithë trupit ka ruajtur vetinë elastike, gjë që i mahniti të gjithë arkeologët e pranishëm. Profesor Shan Siangjin i Universitetit Pedagogjik të Hunanit, që mori pjesë në gërmimet zbuluese, thotë se ai ka marrë pjesë në gërmimet e shumë varreve të lashta për zbulime arkeologjike, por nuk ka parë asnjëherë një kufomë të lashtë të mbetur kaq të plotë.

"Ne kemi parë në vende të tjera kufoma të lashta të thara, pa veti elastike, që quhen mumie, por asnjëherë nuk kemi parë një kufomë kaq të plotë. Në kontrast me mumiet, kjo kufomë është e patharë dhe ka ruajtur formën e saj origjinale, prandaj është e para kufomë e lashtë e patharë në botë."

Por përse kjo kufomë mbeti për mbi 2200 vjet nën tokë dhe nuk u kalb? Duke bërë një analizë, profesor Shan tha se kjo vjen kryesisht për shkak të mjedisit të mirë me temperaturë konstante, me lagështi konstante dhe pa mikrobe absolutisht brenda arkivolit. Ai thotë se duke varrosur këtë kufomë, njerëzit e atëhershëm e mbështollën me pëlhurë të mëndafshtë, mbështollën gjithashtu dhe arkivolin me rreth 5000 kilkogramë qymyr druri dhe me një sasi të madhe argjili kaolin të cilësisë së lartë, me qëllim që të shmangej depërtimi i ujit dhe i mikrobeve nga jashtë. Meqenëse në qytetin Çangsha dhe zonat përreth nuk ra asnjëherë tërmet gjatë mbi 22 shekujve, ky arkivol nuk pësoi ndonjë tronditje, prandaj kjo kufomë u ruajt për mrekulli. Specialistët gjetën në arkivol edhe një lloj solucioni misterioz. Profesor Shan thotë se pikërisht në saje të këtij solucioni, që disa e quajnë "solucionin e shenjtë", kufoma e kësaj gruaje u ruajt për 2200 vjet dhe nuk u kalb.

"Në arkivol u gjet një lloj solucioni me ngjyrë çaji, që kishte precipituar në fund të tij. Nga analiza del se ky lloj solucioni, që pati një peshë mbi 80-kilogramëshe, përmban alkool, acid acetik dhe merkur sulfurik. Këto substanca mund të frenojnë ndryshimin kimik të organizmit, prandaj kjo kufomë nuk është dëmtuar."

Punonjësit kinezë të kërkimeve shkencore morën shumë masa për të mbrojtur këtë kufomë të çmuar. Sapo e nxorën kufomën nga varri, ata injektuan formalinë në të. Profesor Shan thotë se, në kohën e injektimit të formalinës, enët e gjakut të kufomës ngriheshin lehtë, gjë që vërteton se enët e gjakut ishin të padëmtuara dhe kishin veti elastike.

Metoda optimale e ruajtjes së kësaj kufome të lashtë është që të krijohet një mjedis i ngjashëm me mjedisin ku ajo ka qenë më parë. Specialistët kanë bërë një lloj solucioni të veçantë kundër kalbjes dhe ata e quajnë "solucionin fiksues". Ata e futën kufomën në një enë të mbushur plot me këtë solucion dhe e shtinë në një arkivol prej kristali, të cilit iu nxor ajri. Ky lloj "solucioni fiksues" përmban kryesisht formalinë, alkool dhe glicerinë. Formalina luan rolin e mbrojtjes së kufomës nga kalbja, ndërsa alkooli mund të ndalojë shpërbërjen e proteinës, kurse glicerina mund të shmangë tharjen e lëkurës së kufomës.

Profesor Luo Xuegang i Institutit të Mjekësisë Siang-ya të provincës Hunan, që mori pjesë në punën për mbrojtjen e kësaj kufome të lashtë, thotë se ai i bëri kufomës një kontroll të përgjithshëm dhe vuri re se, pas mbi 30 vjetëve, kjo kufomë është ruajtur e plotë, ashtu si ka qenë.

"Kjo kufomë e lashtë nuk ka pasur ndonjë ndryshim që nga koha kur u zbulua. Lëkura e saj ka ruajtur vetinë elastike. Nëpërmjet kontrollit radioskopik të kockave, vumë re se cilësia e tyre mbetet e mirë. Gëzohemi shumë se në vitinn 1972, kur sapo u nxor nga arkivoli, ne injektuam solucion në enët e gjakut dhe deri tani solucioni ka mbetur si në fillim, gjë që tregon se enët e gjakut të saj nuk janë çarë."

Tani kufoma e gruas së Mavangduit shtrihet e qetë në "pallatin nëntokësor" të posaçëm të Muzeut të provincës Hunan. "Pallati nëntokësor" është ndërtuar në një thellësi prej 8 metrash, duke imituar mjedisin ku u zbulua kufoma e gruas. Punonjësit e këtushëm këqyrin në të 24 orë ndryshimin e temperaturës dhe lagështisë së mjedisit. Siç mësohet, ky muze ka plan të instalojë edhe një impiant të filtrimit të ajrit, për të sigurur që mikrobet e ajrit të mos futen në arkivol. (Zheng)