dëgjoni

Lojërat Olimpike janë një takim madhështor ndërkombëtar, ku do të mblidhen mysafirë që flasin gjuhë të ndryshme. Për të krijuar një mjedis pritës në përshtatje me Lojërat Olimpike, Pekini jo vetëm ka bërë shumë përpjekje për inkurajimin e banorëve në mësimin e gjuhës angleze, por u propozon të rinjve të mësojnë edhe gjuhë të tjera. Një nga këto përpjekje janë edhe një sërë aktivitetesh të emëtuara "Përshëndetje me gjithë botën", me të cilat hyn në korpusin e shkollave mësimdhënia e shumë gjuhëve të huaja. 

Grupi i parë i gjuhëve që do të përhapen në shkolla përfshin gjuhët japoneze, franceze, gjermane, ruse, spanjolle dhe koreane. Objektivat e mësimdhënies janë kryesisht nxënësit e shkollave të mesme e studentët e shkollave të larta, që nuk i dinë fare këto gjuhë. Organizatorët e këtyre aktiviteteve kanë shtypur tekstet e mësimdhënies dhe kanë regjistruar edhe disqet ndihmëse, të cilat do t'u jepen falas studentëve dhe banorëve që janë në gjendje të mësojnë vetë gjuhë të huaja. Lidhur me këto aktivitete, një nga përgjegjësit e tyre, zv/drejtori i Qendrës së Shkëmbimeve Ndërkombëtare të Arsimit të Pekinit, z. Ding Shulin tha:

"Vargu i aktiviteteve 'Përshëndetje me gjithë Botën' nisi më 22 nëntor të vitit të kaluar dhe do të zgjatë deri në prag të Lojërave Olimpike 2008. Këto aktivitete organizohen kryesisht për nxënësit dhe studentët e shkollave të mesme dhe të larta, që janë baza e vullnetarëve të Lojërave Olimpike. Ata do të marrin falas tekste dhe disqe dhe do t'u bëhet falas përgatitja përkatëse."

Me të nisur këto aktivitete gjetën përgjigje aktive në shkollat e mesme dhe të larta. Deri tani mbi 1000 studentë janë përgatitur. Mësohet se deri në fund të këtij viti, edhe afro 25 mijë studentë e nxënës të tjerë do të përgatiten në mënyrë të tillë.

Z. Ding shprehu mendimin se këto aktivitete do të jenë me vlerë për krijimin e një mjedisi të mirë për Lojërat Olimpike.

"Shpresojmë që sa më shumë studentë dhe banorë të thjeshtë të tregojnë vëmendje për mësimin e gjuhëve të tjera, krahas anglishtes. Sa më shumë njerëz që mund të flasin disa gjuhë të bëhen vullnetarë, kz është synimi ynë."

Lidhur me fjalët e mësipërme të zotit Ding, të dashur dëgjues, ndoshta do t'u lindë pyetja: Pas përgatitjes vetëm një-vjeçare, këta nxënës e studentë, që nuk kanë bazë të gjuhëve përkatëse, a mund të plotësojnë kërkesën si vullnetar përkthyes të Lojërave Olimpike? Për këtë, z. Ding shpjegoi:

"Shumica dërrmuese e nxënësve dhe e studentëve që marrin pjesë në përgatitjet tona nuk kanë përvojë në mësimin e gjuhëve të tjera përveç anglishtes. Mbi bazën e përgatitjes masive, planifikojmë që në prill dhe maj të vitit 2007, do të zhvillojmë edhe përgatitje të nivelit më të lartë. Shpresojmë se këta studentë, pas përgatitjes së mëtejshme do të bëhen 'forcat kryesore' të vullnetarëve, që të hyjnë me të vërtetë në fushën e lojës dhe në zyrat e Lojërave Olimpike; ndërsa studentët me përgatitje masive mund të japin ndihmë në përkthim për mysafirët e huaj jashtë fushës sportive."

Si një pjesë përbërëse e këtyre aktiviteteve, u zhvillua ditët e fundit "Konkursi i Njohjes me Gjuhën Franceze të Studentëve Pekinas". Ky konkurs tërhoqi mbi 200 studentë, që mësojnë në specialitetin e gjuhës franceze në shkollat e larta të Pekinit.

Anëtarja e jurisë së vlerësimit të këtij konkursi, funksionarja e ambasadës së Francës në Kinë z. Eva Martim shprehu habitje dhe gëzim të madh për nivelin e gjuhës franceze të studentëve pjesëmarrës. Ajo mendon se aktivitete të tilla janë një ndihmë e madhe për përhapjen e frëngjishtes dhe do të jenë në të mirë të organizimit normal të Lojërave Olimpike të Pekinit.

"Sa më shumë vullnetarë, aq më mirë! Frëngjishtja është një gjuhë ndërkombëtare dhe përdoret gjerësisht edhe në Lojërat Olimpike."

Vajza Kang Yi, që mëson në Institutin e Dytë të Gjuhëve të Huaja të Pekinit, fitoi çmimin e parë në këtë konkurs. Ajo tha se u regjistrua pak kohë më parë si vullnetare e Lojërave Olimpike të Pekinit. Ajo shprehu shpresën se do të japë kontributin e vet me aftësinë në gjuhë. Gjatë intervistës për gazetarin e radios sonë, ajo shprehu në frëngjishte urimet e saj për Lojërat Olimpike të Pekinit.

"Si një festival madhështor ndërkombëtar, Lojërat Olimpike kanë tërhequr pjesëmarrjen e shumë, shumë njerëzve. Pavarësisht nga ngjyra e lëkurës suaj, mund të gjeni natyrën, bukurinë dhe harmoninë në këtë mbledhje. U uroj këtu sinqerisht suksese Lojërave Olimpike 2008!" (Wang Lei)