dëgjoni

Me zhvillimin e ekonomisë kineze dhe me ngritjen e nivelit të jetesës së popullit, kërkesa e qytetarëve për banesa është gjithnjë e më e lartë. Por Kina është një vend me popullsi të madhe dhe me burime tokësore relativisht të kufizuara. Zgjerimi i shpejtë i sipërfaqes së banesave ka shkaktuar mungesën e burimeve tokësore urbanistike. Njëkohësisht familjet me të ardhura të mesme dhe të vogla kanë vështirësi për të blerë banesa. Në fillim të këtij viti, qeveria kineze ka hartuar politikën e re të banesave, ku vendosi që banesat e tipit të mesëm dhe të vogël me çdo apartament me një sipërfaqe prej 90 metrash katrorë të jenë rryma kryesore e ndërtimit të banesave të qyteteve. Në drejtimin e qeverisë, struktura e banesave në Kinë po shkon drejt zhvillimit të banesave të tipit të mesëm dhe të vogël.

Duke folur për karakteristikat e banesës së tipit të mesëm dhe të vogël, projektuesi i kësaj banese, z. Liu Xiaozhong tha: "Në radhë të parë, përqindja e shfrytëzimit të hapësirës e banesës së tipit të mesëm dhe të vogël është relativisht e lartë. Nga ana tjetër, projektimi racional i hapësirës së banesës është një karakteristikë tjetër e banesës së tipit të mesëm dhe të vogël".

Tani banesa e tipit të mesëm dhe të vogël është një fokus në fushën e projektimit të ndërtimit në Kinë. Sipas vendimit të qeverisë kineze, qysh nga 1 qershori i këtij viti, sipërfaqja e ndërtimit e banesës së tipit të mesëm dhe të vogël me çdo apartament nën 90 metra katrorë do të zërë mbi 70 % të sipërfaqes së përgjithshme të ndërtimit të banesave.

Kina ka një popullsi shumë të madhe, ndërsa burimet tokësore janë të kufizuara. Me shpejtimin e procesit të urbanizimit, kërkesa për banesa e banorëve është shtuar pandërprerë. Ndërsa forma e përdorimit të banesave me sipërfaqe të madhe që konsumojnë shumë ujë dhe materile ndërtimi, nuk përputhet me parimin e zhvillimit të vazhdueshëm. Nënkryetari i Shoqatës së sektorit të ndërtimit dhe të trojeve të Kinës, z. Zhu Zhongyi tha se krijimi i formës së konsumit me banesën e tipit të mesëm dhe të vogël si kryesore përputhet me nivelin real të zhvillimit ekonomik dhe shoqëror të Kinës, favorizon zgjidhjen e problemit të banimit të banorëve të thjeshtë dhe është në të mirë të ngritjes së nivelit të jetesës së qytetarëve.

"Pra vendi ynë inkurajon formën e konsumit me banesën e tipit të mesëm dhe të vogël si kryesore, sepse banesa të tilla janë të pamjaftueshme dhe burimet tokësore të Kinës janë të kufizuara. Nga ana tjetër, ne duhet të marrim modelin e Japonisë dhe të Koresë së Jugut që kanë burime të pakta. Ligjet e tyre e kufizojnë sipërfaqen e ndërtimit të banesave".

Tani, në Kinë ekzistojnë disa dukuri negative në përdorimin e banesave. Disa të pasur synojnë në mënyrë të pakufizuar banesat e mëdha me shumë hapësirë, ndërsa shumë njerëz me të ardhura të mesme dhe të ulëta nuk kanë aftësi për blerjen e banesave. Zoti Zhu Zhongyi është i mendimit se në rrethana të tilla, Kina duhet të inkurajojë formën e konsumit të tipit të kursimit të burimeve.

"Banesat qoftë të mëdha qoftë të vogla kanë prekur kuotën e burimeve publike. Njerëzit me shumë para nuk mund të zgjerojnë në mënyrë të pakufizuar sipërfaqen e tyre të banimit, ndërsa të varfrit duhet të kenë banesa, gjë që favorizon blerjen e konsumatorëve, sidomos të njerëzve me të ardhura të mesme dhe të ulëta".

Sipas të dhënave statistikore, banesa e thjeshtë e tipit të mesëm dhe të vogël është kërkesa kryesore e qytetarëve për banim. Në Pekin, Shënzhen, Taiyuan, Shijazhuang dhe në qytete të mesme dhe të vogla, mbi 50 % e familjeve dëshirojnë të blejnë banesa me një apartament nën 90 metra katrorë. Tani përqindja e tregut të banesave të tipit të mesëm dhe të vogël në Kinë është relativisht e ulët. Nga një anë, njerëzit me të ardhura të mesme dhe të vogla nuk mund të blejnë fare banesa, nga ana tjetër, banesat e mëdha me shumë hapësirë dhe me çmim të lartë kanë mbetur, duke plotësuar kërkesën e të pasurve.

Specialistët janë të mendimit se zbatimi i formës së përdorimit të banesave të tipit të mesëm dhe të vogël e të tipit të kursimit të burimeve në Kinë është ende një detyrë afatgjatë. Në të ardhmen, Kina do të përkrahë përdorimin e banesës së tipit të mesëm dhe të vogël nëpërmjet disa masave të kontrollit për të shmangur përdorimin e tepërt, në mënyrë që të realizohet objektivi i tillë që çdo njeri mund të ketë banesë.

Siç mësohet, në të ardhmen, Kina do të marrë masat përkatëse për të mbledhur paratë e përshtatshme nga përdoruesit që banojnë në banesat e mëdha me shumë hapësirë. Tani Ministria e Ndërtimit po harton edhe "Standardin e projektimit të banesës me apartament nën 90 metra katrorë". (Sihai)