Dëgjoni

Qysh nga 1 dhjetori i vitit të kaluar, filloi të zbatohet "Rregullorja e mbrojtjes së Murit të Madh Kinez". Sipas rregullores, ndalohen 7 veprime në Murin e Madh si mbjellja e bimëve, prishja e murit etj. Zbatimi i kësaj rregulloreje është rezultat i përpjekjeve shumëvjeçare të specialistëve të mbrojtjes së Murit të Madh si Dong Yaohui etj.

50-vjeçari Dong Yaohui është zvdrejtor i Institutit të Murit të Madh të Kinës dhe është marrë me studimin dhe mbrojtjen e Murit të Madh prej më shumë se 20 vjetësh. Vendlindja e tij Funing i provincës Hebei ndodhet afër Murit të Madh.

Muri i Madh Kinez konsiderohet si një nga mrekullitë e krijuara nga njerëzimi. Ai nisi të ndërtohet në shekullin e dytë para erës sonë nga perandori i parë kinez Qin Shihuang për t'u rezistuar sulmeve të armiqve. Pas kësaj, dinastitë e ndryshme kineze vazhduan të ndërtonin Murin e Madh dhe si rezultat, gjatësia e tij arriti në mijëra kilometra.

Dong Yaohui dikur ishte punonjës në Drejtorinë e Energjisë Elektrike të qytetit Qinhuangdao. Në kohën e lirë, atij i pëlqente shumë ngjitja në mal dhe letërsia. Në vitet '80 të shekullit të kaluar, Dong Yaohuit i lindi mendimi për të udhëtuar më këmbë buzë Murit të Madh. Duke kujtuar këtë plan të para mbi 10 vjetëve, Dong Yaohui tha:

"Për shkak që jetoja afër Murit të Madh qysh kur isha i ri, kisha interes të madh për ta njohur thellësisht këtë mur. Por në atë kohë nuk mund të gjeja shumë të dhëna të hollësishme lidhur me të, prandaj vendosa të bëj një hetim nëpërmjet udhëtimit me këmbë."

Pas përgatitjes mbi njëvjeçare, më 4 maj të vitit 1984, Dong Yaohui dhe dy shokë të tij filluan udhëtimin e tyre. Ata udhëtuan në male të largëta dhe hasën shumë vështirësi të jashtëzakonshme. Dong Yaohui u shpreh se krahas lodhjes trupore, vetmia shpirtërore ishte vështirësia më e madhe. Ai tha:

"Pas largimit nga shoqëria njerëzore dhe të afërmit e miqtë, ndiem një vetmi të paimagjinueshme dhe pothuajse u çmendëm."

Megjithatë, Dong Yaohui dhe shokët e tij nuk hoqën dorë nga udhëtimi. Ata udhëtuan për 508 ditë duke kaluar mbi 100 konte e qytete dhe më në fund e mbaruan me sukses udhëtimin. Udhëtimi i tyre u njoftua gjerësisht nga media. Qysh nga ajo kohë, fati i Dong Yaohuit është lidhur ngushtë me Murin e Madh.

Në vitin 1985, Dong Yaohui nisi studimet në Universitetin e Pekinit. Gjatë studimeve, ai pati kontakte me shumë studiues dhe specialistë dhe mori pjesë në krijimin e Institutit të Murit të Madh të Kinës. Njëkohësisht mbi bazën e rezultateve të hetimit prej tij të Murit të Madh, ai botoi librin "Muri i Madh i ndërtuar nga dinastia Ming". Pas kësaj ai botoi me radhë disa vepra teorike e studimore lidhur me Murin e Madh duke ushtruar ndikim aktiv në këtë fushë brenda e jashtë vendit.

Pas vitit 1995, Dong Yaohui u bë me radhë sekretar i përgjithshëm dhe zvdrejtor i Institutit të Murit të Madh të Kinës. Ai organizoi aktivisht veprimtari akademike e shoqërore lidhur me mbrojtjen e Murit të Madh duke bërë thirrje për hartimin e një ligji të posaçëm për mbrojtjen e Murit të Madh. Pas përpjekjeve shumëvjeçare të Dong Yaohuit dhe të qarqeve të ndryshme shoqërore, në vitin 2003, filloi nga qeveria kineze puna për hartimin e ligjit të mbrojtjes së Murit të Madh. Tani filloi të zbatohet "Rregullorja e mbrojtjes së Murit të Madh" dhe Dong Yaohui është shumë i gëzuar:

"Në të kaluarën, kanë ndodhur shpesh incidente të shkatërrimit të Murit të Madh. Muri i Madh është një relikt i veçantë dhe duhet të mbrohet me ligj të posaçëm. Jam i mendimit se zbatimi i 'Rregullores së mbrojtjes së Murit të Madh' do të nxitë patjetër zhvillimin e punës së mbrojtjes në mbarë vendin."

Dong Yaohui tha se Muri i Madh i përket jo vetëm Kinës, por edhe tërë njerëzimit dhe është simboli i qytetërimeve njerëzore. Ai dëshiron të kalojë tërë jetën duke u marrë me çështjen e mbrojtjes së Murit të Madh. (Fani)