Dëgjoni

Ditët e fundit Drejtoria e Përgjithshme Kombëtare e Sporteve e Kinës shpalli se në vitin 2007 Kina do të zhvillojë në mbarë vendin një sërë aktivitetesh sportive me temën "Ushtrimet gjimnastikore masive ecin së bashku me Olimpiadën". Do të dëgjoni tani një material lidhur me këtë.

Aktivitetet "Ushtrimet gjimnastikore ecin së bashku me Olimpiadën" nisën në vitin 2006. Nëpërmjet këtyre aktiviteteve, Drejtoria e Përgjithshme Kombëtare e Sporteve e Kinës inkurajon dhe organizon banorët e thjeshtë kinezë të marrin pjesë në stërvitje sportive, duke përhapur njohuritë sportive e olimpike në masat popullore. Lidhur me rëndësinë e këtyre aktiviteteve, kryetari i Komitetit Olimpik të Kinës z. Liu Peng tha:

"Këto aktivitete kanë për qëllim që të përhapet shpirti i Olimpiadës dhe janë konkretizimi i rëndësishëm i konceptit 'Olimpiada Humanitare' të Lojërave Olimpike të Pekinit". Një nga treguesit kryesorë të arritjes së suksesit të një edicioni të Lojërave Olimpike është shkalla e përhapjes së shpirtit olimpik në vendin organizator dhe madje në mbarë botën. Shpirti i Olimpiadës mishëron konceptin për forcimin e zhvillimin e plotë të cilësive trupore dhe të vullnetit të njeriut, ndërsa pjesëmarrja është parimi i dorës së parë i këtij shpirti. Pa pjesëmarrje, nuk mund të flitet as për realizim të idesë olimpike. Nga ky këndvështrim aktivitetet 'Ushtrimet gjimnastikore masive ecin së bashku me Olimpiadën' janë mishërimi konkret i këtij shpirti."

Liu Peng tha gjithashtu se qëllimi bazë i qeverisë kineze për zhvillimin e punëve sportive është "zhvillimi i lëvizjes sportive dhe forcimi i cilësive trupore të masave popullore". Me organizimin e këtyre aktiviteteve, procesi i përgatitjes dhe i organizimit të Lojërave Olimpike do të bëhet edhe një proces i nxitjes së forcimit të cilësive trupore të masave popullore të Kinës.

Mësohet se gjatë vitit 2006, miliona kinezë morën pjesë në aktivitetet sportive "Ushtrimet gjimnastikore masive ecin së bashku me Olimpiadën" dhe këto aktivitete kanë pasur rezultate të mira. Prandaj, Drejtoria e Përgjithshme Kombëtare e Sporteve e Kinës vendosi që të zgjerojë më tej përmasat e këtyre aktiviteteve. Sipas planit, kjo drejtori do të organizojë 65 aktivitete të mëdha, duke përfshirë alpiniymin, pingpongun, notin, tenisin, gjimnastikën aerobike, varkën e dragoit, vallen e luanit dhe lëvizje të tjera sportive që parapëlqehen nga kinezët.

Këto aktivitete do të përshkojnë gjithë vitin 2007. Njëkohësisht Drejtoria e Përgjithshme e Sporteve e Kinës ka marrë parasysh përfshirjen e masave popullore të shtresave dhe moshave të ndryshme në këto aktivitete. P.sh. për banorët e qytetit do të organizohet "Gara kombëtare e lundrimit me varka", në fshat do të zhvillohet "Gara e bilardos e miliona fshatarëve", ndërsa "Gara kombëtare e lundrimi detar të të rinjve" do të tërheqë interesin e të rinjve. Zv/drejtori i Drejtorisë së Përgjithshme Kombëtare të Sporteve të Kinës Feng Jianzhong tha:

"Për sa i përket llojeve të sporteve, të moshuarit kanë sportet e tyre të parapëlqyer, ndërsa të rinjtë sporte të tjera. Edhe në krahina të ndryshme të Kinës ekzistojnë ndryshime të mëdha në sportet e preferuara, prandaj duhet të organizohen aktivitete të ndryshme në krahina të ndryshme."

Z. Feng Jianzhog tha se për të garantuar zhvillimin normal të këtyre aktiviteteve, Drejtoria e Përgjithshme Kombëtare e Sporteve e Kinës do të investojë një fond të konsiderueshëm nga të ardhurat e lotarive sportive. Njëkohësisht do të ndërtojë në fshat një varg instalimesh sportive publike. Për efektivitetin real të këtyre aktiviteteve, z. Feng Jianzhong shprehu mendimin se banorët e thjeshtë do të jetë gjyqtarët përfundimtarë. Ai shprehu shpresën se këto përpjekje të qeverisë kineze do të favorizojnë masat popullore kineze, që të gëzojnë me të vërtetë Olimpiadën si dhe dobitë nga stërvitjet sportive. Ai tha:

"Sa më shumë njerëz të marrin pjesë, aq më të suksesshme do të jenë këto aktivitete." (Wang Lei)