Zj. Zhao Sujing bëri të ditur se në Kinë ka mbi 80 milionë njerëz me aftësi të kufizuar. Aktualisht me preokupimin e organizatave të njerëzve me aftësi të kufizuar të krahinave të ndryshme dhe të gjithë shoqërisë, gjithnjë e më shumë njerëz me aftësi të kufizuar kanë marrë pjesë në ushtrime gjimnastikore për mëkëmbje. Është krijuar edhe sistemi kombëtar i organizatave sportive të njerëzve me aftësi të kufizuar. Mbi këtë bazë, Kina ka organizuar disa edicione të Lojërave kombëtare të njerëzve me të meta fizike. Ajo tha:

"Tani Lojërat Kombëtare të Njerëzve me të Meta Fizike zhvillohen një herë në 4 vjet dhe deri më sot Kina ka organizuar me sukses 6 edicione, ndërsa edicioni i 7-të do të zhvillohet në maj të këtij viti në provincën Yunnan. Edhe numri i disiplinave sportive në këto lojëra është shtuar nga 3 në fillim në 20 tani, gjë që është sinkronizuar me veprimtaritë ndërkombëtare sportive të njerëzve me të meta fizike. Sporti i njerëzve me të meta fizike i Kinës është sistemuar, standardizuar dhe ndërkombëtarizuar."

Krahas zhvillimit gjerësisht të aktiviteteve dhe veprimtarive sportive në vend, Kina ka marrë pjesë aktivisht edhe në Lojërat Paralimpike. Që nga viti 1984, Kina ka dërguar me radhë delegacione për të marrë pjesë në 6 edicione të Lojërave Paralimpike Verore, në 2 edicione të Lojërave Paralimpike Dimërore dhe në 7 edicione të Lojërave të Njerëzve me të Meta Fizike të Rajonit të Lindjes së Largët dhe të Paqësorit të Jugut, si dhe në shumë veprimtari ndërkombëtare të ndonjë disiplinave të caktuara sportive. Në këtë drejtim individët kinezë me të meta fizike kanë pasur rezultate shumë të mira. Në Lojërat Paralimpike 2004 të Athinës, sportistët kinezë me të meta fizike fituan gjithsej 63 medalje të arta, 46 të argjendta dhe 32 të bronzta, duke zënë vendin e parë në listën e medaljeve dhe në listën e medaljeve të arta.

Tani nuk mbeten shumë kohë nga Lojërat Paralimpike 2008 të Pekinit. Zj. Zhao Sujing tha se punët përgatitore për Lojërat Paralimpike të Pekinit kanë luajtur rol nxitës për çështjen e sportit të njerëzve me të meta fizike. Në saje të tyre, shoqëria kineze tregon tani më shumë vëmendje për sportin e njerëzve me të meta fizike. Ajo bëri të ditur:

"Në radhë të parë, në ndërtimin e pallateve e stadiumeve, shumë krahina filluan të ndërtojnë baza stërvitjeje për njerëz me të meta fizike, gjë që nuk ka ndodhur më parë në të kaluarën. Këto baza nuk janë ndërtesa të reja, por janë transformuar me bazat ekzistuese për njerëzit e shëndetshëm, në mënyrë që të plotësohen kërkesat e njerëzve me të meta fizike. "

Zj. Zhao Sujing shprehu mendimin se përshtatja e pallateve e stadiumeve sportive krijon lehtësi për pjesëmarrjen e njerëzve me të meta fizike në aktivitete sportive.

Pavarësisht nga rezultatet e shumta, Kina është një vend në zhvillim dhe sporti i njerëzve me aftësi të kufizuar ka nisur relativisht vonë. Prandaj, ekzistojnë shumë probleme për t'u zgjidhur dhe përmirësuar. Zj. Zhao mendon se vetëm një pjesë shumë e vogël e njerëzve me aftësi të kufizuar merren me sport dhe tani sporti nuk është ende mënyrë jetese për shumicën dërrmuese të këtyre njerëzve në Kinë. Ky është problemi më urgjent për t'u zgjidhur. Ajo tha:

"Lojërat Paralimpike të vitit 2008 na sjellin disa sfida të reja, që duken kryesisht në gjendjen e dobët të sportit masiv të njerëzve me të meta fizike. "

Zj. Zhao Sujing tha se synimi i çështjes së sportit të njerëzve me aftësi të kufizuar është tërheqja e sa më shumë njerëzve me të meta fizike në aktivitete sportive dhe ushtrime gjimnastikore për mëkëmbje. Ajo beson se me forcën e madhe ndikuese të Lojërave Paralimpike të Pekinit, ky synim do të realizohet sa më shpejt. (Wang Lei)