Dëgjoni

Metani, si një lloj gazi që formohet nga tharmëtimi i lëndëve organike, ka vlerë të madhe ekonomike dhe mund të shfrytëzohet në fshat si lëndë djegëse për ngrohje, për ndriçim dhe për gatim, duke zëvendësuar në një shkallë të caktuar lëndët e tjera djegëse, si naftën, gazin natyror, qymyrgurin etj. Mbeturinat e kafshëve dhe plehrat e përditshme mund të shfrytëzohen si lëndë e parë për prodhimin e metanit dhe fundërrinat që mbeten pas nxjerrjes së metanit mund të shfrytëzohen si plehra të mira organike që hidhen në ara.

Gjatë intervistave në Rajonin Autonom Guangsi-Xhuang, shkruan korrespondenti ynë, mora vesh se në të gjithë fshatrat që shfrytëzojnë në mënyrë të efektshme metanin, që është një lloj lënde e energjisë së pastër, ajri është bërë më i pastër se më parë, malet janë bërë më të blerta dhe fshatarët kanë më shumë leverdi. Drejtori i zyrës së ndihmës për të varfrit pranë administratës së rajonit Guangsi, zoti Hu Decai, tha se leverdia e shfrytëzimit të metanit po bëhet gjithnjë e më e dukshme dhe administrata e rajonit të tij e ka përfshirë popullarizimin e mëtejshëm të teknikës së shfrytëzimit të metanit në planin e përpjekjeve për shkëputjen nga varfëria.

"Shfrytëzimi i metanit na sjell shumë të mira. Me shfrytëzimin e tij zgjidhet problemi i lëndëve djegëse për fshatarët vendas dhe pakësohet shkatërrimi i pyjeve si pasojë e prerjes së drurëve. Si rezultat, është përmirësuar shumë shpejt mjedisi ekologjik. Mjedisi i fshatit është bërë më i pastër si rezultat i shfrytëzimit të mbeturinave të stallave të lopëve dhe të kuajve për prodhimin e metanit dhe fundërrinat e mbetura përdoren si plehra organike që bëjnë mirë për bimët bujqësore. Shfrytëzimi i metanit ka liruar shumë krahë pune dhe favorizon sidomos gratë."

Familja e fshatarit Lan Hua, që banon në periferi të kryeqendrës së Rajonit Autonom Guangsi-Xhuang, qytetit Naning, ka 4 pjesëtarë dhe 2 hektarë tokë. Kjo familje jeton me shumë kursim dhe me paratë e grumbulluara ka ndërtuar një banesë të vogël dykatëshe. Korrespondenti ynë vuri re se mjedisi i këtushëm është shumë i pastër dhe ndryshon shumë nga shtëpitë tradicionale të fshatit kinez që janë me kuzhina të tymosura nga djegia e shkarpave dhe kashtës. E shoqja e zotit Lan Hua tha se pastërtia e shtëpisë së saj është si rezultat i shfrytëzimit të metanit.

Korrespondenti vizitoi edhe distriktin autonom Gongçeng të kombësisë yao, që gjendet në juglindje të qytetit Guilin, dhe vuri re se çdo familje e këtushme ka ndërtuar një hauz të prodhimit të metanit, madje në disa fshatra janë ndërtuar hauze të mëdha që furnizojnë me metan në mënyrë të përqendruar. Tubat e metansjellësit shkojnë në çdo familje. Si rezultat i intensifikimit dhe zgjerimit të përmasave të prodhimit dhe përdorimit të metanit, janë kursyer krahët e punës dhe tokat e punueshme. Fshatari Rong Vensi tha se familja e tij mbështetet në përgjithësi në përdorimin e metanit për të zier ujë, për të gatuar dhe për ndriçim. Ai tha se kjo mënyrë jo vetëm sjell pastërti dhe lehtësira, por edhe është shumë ekonomike.

"Metani është i lirë. Më parë përdornim gaz qymyrguri, që është relativisht i shtrenjtë. Një bombol gazi qymyrguri kushton 92 juanë, por nuk na mjaftonte as për një muaj. Kurse tani, kur përdorim metan, na mjaftojnë 32 juanë për një muaj."

Shfrytëzimi i metanit ushtroi një ndikim pozitiv në shumë fusha në Guangsi, siç tha zv-drejtori i Drejtorisë së ekonomisë pyjore të qytetit Guilin të Rajonit Autonom Guangsi-Xhuang, zoti Gjiang Ruohai.

"Në fshatrat e rajonit tonë po bëhen përpjekje për të ndryshuar mënyrën e shfrytëzimit të burimeve të energjisë dhe mënyrën e përdorimit të lëndëve djegëse. Me përdorimin gjerësisht të metanit, masat e gjera fshatare janë çliruar nga puna e rëndë e prerjes së drurëve e barërave dhe përqindja e sipërfaqes së pyllëzuar në Guilin është rritur në 66.46 % nga 37.07 % që ishte në vitin 1980."

Rajoni Autonom Guangsi-Xhuang ka arritur suksese të kënaqshme në shfrytëzimin e metanit. Si rezultat, fshatarët e këtij rajoni kanë gjetur një rrugë të ndërtimit të fshatrave të reja. Shumë miq të huaj vijnë për të parë në këtë rajon. Zoti Li Fangzhen, zyrtar i këtij rajoni që përgjigjet për punën e ndihmës për njerëzit e varfër, tha se Guangsi si një rajon shembullor në këtë drejtim, ka pritur tashmë shumë grupe që vijnë për të marrë përvojë nga vendet afrikane dhe vende të tjera në zhvillim. Miqtë e huaj interesohen shumë për shfrytëzimin e metanit në fshatrat e rajonit tonë.

"Klima në shumë vende afrikane është relativisht e nxehtë, afërsisht si në Guangsi. Edhe ato vende kanë kushte për shfrytëzimin e metanit." (Zheng)