Kënga që ndoqët është një këngë popullore kazake e Singjiangut me titull "Unë të pres ty deri në të gdhirë". Tingujt e bukur harmonikë të krijuar nga kitara përshkruajnë një natë të qetë. Gjatë interpretimit, Wang Hongwei e ka trajtuar këtë këngë në mënyrë të veçantë, duke kombinuar mënyrën e këndimit të këngëve klasike evropiane me atë popullore dhe duke shprehur bukur shpresën e djalit për të nesërmen e bukur.

Wang Hongwei, që ka zë kumbues ka lindur në Singjiang të pjesës veriperëndimore të Kinës dhe është ushqyer nga muzika, këngët dhe vallet e atjeshme. Në moshën 15 vjeçe ai u pranua si një ushtar artistik në repartet ushtarake, ndërsa në vitin 1991 u pranua pas provimeve në fakultetin e muzikës të Institutit Artistik të Ushtrisë Popullore Çlirimtare Kineze, ku merrte mësime nga profesoresha e njohur Meng Ling. Gjatë 3 vjetëve, ai studioi në mënyrë sistematike artin vokal dhe mjeshtëria e interpretimit e tij u ngrit dukshëm, duke formuar stilin e vet të veçantë. Ai ka timbër të gjerë e zë të lartë dhe interpretimi i tij me ndjenja të përzemërta ka forcë të madhe tërheqëse artistike.

Kënga që ndoqët është një këngë popullore e provincës Shanxi të Kinës veriperëndimore me titull "Xintianyou i lashtë", interpretuar nga Wan Hongwei. "Xintianyou" është një formë e këngëve malësore, shumë e pëlqyer nga banorët vendës. Pjesa veriore e provincës Shanxi ndodhet në rrafshnaltën me dhe të verdhë dhe transporti aty është i vështirë, banorët shkojnë shpesh me bagëti nëpër rrugët malore. Për të zhdukur ndjenjën e vetmisë dhe mërzitjen, njerëzit këndojnë këngë të krijuara aty për aty. Ashtu siç thuhet në këtë këngë: "Është e lehtë të takohemi, por është e vështirë të bisedojmë. Njëri është në mal, tjetri në luginë, vetëm mund të përshëndesim me dorë njëri-tjetrin."

Pas diplomimit në Institutin Artistik të Ushtrisë, Wan Hongwei u kthye në Ansamblin Artistik të Ushtrisë në Singjiang. Si një këngëtar ushtarak, ai shkonte shpesh në reparte për të dhënë shfaqje për ushtarët, ku interpretimi i tij entuziast u prit ngrohtësisht nga oficerët e ushtarët.

Në vitin 2000, Wan Hongwei fitoi medaljen e artë në interpretimin e këngëve popullore të konkursit të këngëtarëve të rinj, të organizuar nga Televizioni Qendror i Kinës, dhe qysh atëherë ai ka tërhequr vëmendjen e më shumë dëgjuesve. Më vonë Wan Hongwei erdhi në Pekin dhe u bë një këngëtar solist në Ansamblin e këngëve dhe valleve të Drejtorisë së Përgjithshme Politike të Ushtrisë Popullore Çlirimtare Kineze dhe aktivizohet në skenën e krahinave të ndryshme të Kinës.

Kënga që ndoqët, është një këngë popullore e pjesës veriore të provincës Shanxi, me titull "Shkon me bagëtinë", kënduar nga Wang Hongwei. Kjo këngë lirike përshkruan një vajzë, që shikon kalimin e radhës së bagëtive duke qëndruar pranë rrugës dhe pret me padurim kthimin sa më parë të të dashurit të saj.

Në fund të programit të sotëm muzikor, do të shijojmë së bashku këngën popullore ujgure të Singjiangut "Trëndafili i kuq". Kjo është një këngë e bukur dashurie Melodia e saj pak melankolike shpreh mallin e një djali për të dashuren e tij. Në këngë thuhet: "Në qiellin e pafund të natës nuk ka dritë të hënës, në zemrën time ka rënë një trishtim i thellë. A e dini ju yje në qiell se ku është ajo, hëna ime."

Ju flet Radio e Jashtme e Kinës! Të dashur dëgjues, ndoqët disa këngë popullore kineze të interpretuara nga këngëtari i njohur kinez Wang Hongwei. Mirudëgjofshim të shtunën tjetër. Në mikrofon për ju, Pina.