Dëgjoni

Vitin e kaluar, ekonomia kineze është zhvilluar shumë shpejt. Vëllimi i prodhimit të përgjithshëm të vendit gjatë 9 muajve të parë të vitit 2006 u rrit 10.7%. Efektiviteti i ndërmarrjeve industriale është ngritur pandërprerë dhe shpenzimet e konsumit të banorëve të thjeshtë të qyteteve dhe të fshatrave janë zgjeruar në mënyrë të qëndrueshme. Por rritja e shpejtë ekonomike ka sjellë edhe disa dukuri negative, si dhënia e shumtë e kredive, rritja e shpejtë e investimeve, ngritja e suficitit tregtar etj., të cilat i kanë sjellë ekonomisë kineze mungesën e lëndëve të para e të energjisë dhe rrezikun e inflacionit.

Duke iu përgjigjur pyetjeve të gazetarëve, bashkëpunëtori i vjetër i Institutit të Studimeve Monetare pranë Akademisë së Shkencave Shoqërore të Kinës, z. Yin Jianfeng tha se politika e fondeve përgatitore të depozitave dhe politika të tjera monetare kanë për qëllim të shmangin rritjen tepër të shpejtë të investimeve.

"Banka Tregtare ka pasur arsye të plotë për të dhënë kredi. Ndërsa kreditë kanë përbërë burimin kryesor të fondeve të investimeve. Për të kontrolluar dhënien e kredive nga Banka Tregtare dhe përqindjen e rritjes relativisht të shpejtë të investimeve, Banka Popullore ka ndërmarrë një sërë politikash për ngritjen e përqindjes së fondeve përgatitore, duke lëshuar një sinjal të ashpër ndaj Bankës Tregtare dhe grupeve kryesore të investimeve. Kur të shfaqet prirja e rritjes tepër të shpejtë të ekonomisë, autoritetet e makrokontrollit me siguri do të marrin masa relativisht të rrepta për ta zgjidhur këtë problem".

Sektori i ndërtimit dhe i trojeve është një nga sektorët kryesorë të nxitjes së ngritjes së vazhdueshme të investimeve në pasuritë e paluajtshme të Kinës. Qysh nga fillimi i vitit 2006, çmimi i banesave në krahinat e ndryshme të Kinës është ngritur në mënyrë të vazhdueshme, duke nxitur rritjen e shpejtë të investimeve në sektorin e ndërtimit dhe të trojeve, dhe të kredive për banesat. Njëkohësisht çmimi i lartë i banesave i ka sjellë jetës së njerëzve një presion relativisht të madh.

Ngritja e vazhdueshme e çmimit të banesave ka tërhequr vëmendjen e madhe të qeverisë kineze. Sektorët përkatës kanë marrë një sërë masash koordinimi dhe kontrolli për shpejtimin e ndërtimit të apartamenteve të thjeshta të banimit dhe vendime serioze për kushtet e kredive të ndërmarrjeve të ndërtimit dhe të trojeve.

Masat e makrokontrollit të Kinës kanë pasur efektivitet të mirë. Deri në nëntor të vitit 2006, prirja e rritjes tepër të shpejtë të kredive është ngadalësuar relativisht. Qysh nga fillimi i korrikut të vitit 2006, prirja e ngritjes së vazhdueshme të investimeve në pasuritë e paluajtshme të qyteteve dhe të qytezave përfundoi. Përmasat e ngritjes së çmimit të banesave në 70 qytete të mëdha dhe të mesme të Kinës janë kontrolluar në përgjithësi.

Në vitin 2006, roli i konsumit në nxitjen e rritjes së ekonomisë kineze ishte shumë i dukshëm. Shpenzimet e banorëve kinezë në blerjen e banesave, të veturave, të kompjuterave, në transport, arsim etj., janë ngritur mesatarisht. Parashikohet se sivjet vëllimi i përgjithshëm i shitjes së produkteve të konsumit shoqëror do të arrijë në 7 trilionë e 500 mijë juanë.

Drejtori i përgjithshëm i Shoqërisë së parë të shitjes së veturave të Tienjinit, z. Song Mingjun tha se kinezët që do të blejnë vetura, do të jenë gjithnjë e më të shumtë.

"Shtresat e mesme filluan blerjen gjithnjë e më shumë të veturave të tipit ekonomik. Ne emi vënë re se numri i përdoruesve të veturave në fshat është shtuar pandërprerë, sidomos në disa fshatra me zhvillim relativisht të mirë të industrializimit".

Tani forca kryesore nxitëse e ekonomisë kineze është mbështetur kryesisht te investimet. Gjatë 9 muajve të parë të vitit 2006, përqindja e kontributit të investimeve për rritjen ekonomike arriti në 49.9%, ndërsa konsumi vetëm 35.7%. Sistemi i sigurimeve shoqërore nuk është përmirësuar, prandaj kinezët janë shumë të kujdesshëm në konsum.

Për këtë dukuri, në mbledhjen qendrore të punës ekonomike të mbajtur pak kohë më parë, u kërkua që të ngrihen të ardhurat e banorëve të qyteteve dhe të fshatrave, sidomos të fshatarëve, dhe aftësia e konsumit të tyre.

Zv/drejtori i Institutit të studimeve makroekonomike pranë Komisionit Shtetëror të Zhvillimit dhe të Reformës të Kinës, z. Ma Xiaohë tha se zgjerimi i mëtejshëm i konsumit të banorëve, sidomos të fshatarëve, dhe shpejtimi i zhvillimit të çështjeve shoqërore të fshatit dhe të shërbimeve publike do të bëhen thelbi i zgjerimit të kërkesave të brendshme.

"Tani diferencat midis qyteteve dhe fshatrave të vendit tonë janë shfaqur kryesisht në ndërtimin e infrastrukturës. Në krahasim me qytetet, infrastruktura e ndryshme e fshatrave është relativisht e prapambetur. Përmirësimi i infrastrukturës mund të pakësojë në mënyrë të dukshme koston e jetesës dhe të zhvillimit të fshatarëve".

Suficiti tregtar në përmasa të mëdha është një problem tjetër i rëndësishëm që ka ndikuar në zhvillimin normal të ekonomisë kineze. Gjatë 9 muajve të parë të vitit 2006, suficiti tregtar i Kinës ishte 157 miliardë dollarë amerikanë. Rezerva valutore arriti në 1 trilion dollarë amerikanë, shifër kjo që zë vendin e parë në botë. Suficiti tregtar në përmasa të mëdha jo vetëm ka shkaktuar mosmarrëveshje tregtare midis Kinës dhe partnerëve të saj tregtarë, por edhe ka shtuar presionin ndaj politikave tregtare dhe valutore të Kinës. Gjatë vitit 2006, makrokontrolli ka pasur efektivitetin e përshtatshëm, ndërsa presioni i zgjerimit të mëtejshëm të kredive ekziston ende. Këtë vit, detyra kryesore e makrokontrollit do të jetë ruajtja përpjesëtimore e konsumit, investimeve dhe eksportit. Duke ruajtur rritjen ekonomike, ne do të synojmë për cilësinë dhe efektivitetin e rritjes ekonomike. (Sihai)