Megjithëse nuk u ruajtën shumë materiale historike për jetën dhe veprimtarinë e Gja Sixiesë, ne mund të marrim vesh nga materialet e pakta të ruajtura se ai jetoi në shekullin e 5-të të erës sonë dhe se ai punoi dikur si zyrtar në administratën e një krahine. Ai i kushtonte vëmendje të madhe prodhimit bujqësor, kishte shumë qejf të mbante kope dhensh, të kultivonte kultura bujqësore dhe të bënte eksperimente në ara. Për këtë qëllim, ai mësonte me modesti nga fshatarët.

Gja Sixie dikur filloi të mbante një kope prej 200 krerë dhensh, mirëpo për shkak të pamjaftueshmërisë së tagjisë, pa kaluar një vit, i ngordhën gjysma e dhenve. Më vonë mori një kope tjetër dhe mbolli një hektar tokë me sojë për të përgatitur silazh, por prapë i ngordhën një pjesë e madhe e dhenve. Ai nuk kuptonte se përse puna i shkonte ters. Mori vesh rastësisht se një çoban, që jetonte 50 kilometra larg, ishte bërë mjeshtër për të mbajtur dhentë, prandaj vajti atje për të mësuar nga ai.

Çobani plak e pyeti Gja Sixien se në ç'mënyrë i ushqente dhentë dhe e kuptoi menjëherë se Gja Sixie i ushqente ato duke ua hedhur dosido silazhin në stallë, prandaj dhentë, duke shkelur me këmbë, e ndynin silazhin me bajgë dhe shurrë. Kështu, dhentë nuk e hanin më silazhin e ndyrë dhe ngordhnin nga uria. Gja Sixie jetoi shumë ditë te çobani plak dhe, duke vëzhguar me kujdes stallën e atjeshme, e kuptoi përvojën e plakut. Pasi u kthye në shtëpi, ai filloi t'i ushqente dhentë me metodën e çobanit plak dhe arriti rezultat shumë të mirë.

Gja Sixie ishte i mendimit se zhvillimi i prodhimit bujqësor ka të bëjë drejtpërdrejt me jetën e popullit, se fuqizimi apo dobësimi i një vendi varet kryesisht nga zhvillimi apo prapambetja e prodhimit bujqësor dhe se zhvillimi i bujqësisë varet nga ngritja e nivelit tekniko-shkencor të vendit. Mbi bazën e studimit të arritjeve të brezave të mëparshëm dhe të bilancit të përvojës së kohës së tij, Gja Sixie shkroi veprën e tij të madhe agroteknike "Çi min yao shu", që do të thotë "Teknika e rëndësishme për gjithë popullin".

Libri "Çi min yao shu" është enciklopedia e parë agroteknike në Kinë. Ky libër me 110 mijë fjalë ka përmbjtje shumë të pasur. Në të përshkruhen me hollësi dhe në mënyrë të gjithanshme ligjet e rritjes së bimëve bujqësore. Arritjet e tij në kërkimet shkencore i dhanë shkas zhvillimit të prodhimit bujqësor të asaj kohe dhe këto arritje ushtruan një ndikim të thellë për shkencëtarët e brezave të mëvonshëm.

Kërkimet shkencore të Gja Sixiesë kishin temë të gjerë dhe pikëpamjet e parashtruara prej tij ishin shumë të sakëta. Ai shkroi në librin e tij se si të bëhet plugimi i thellë dhe i cekët, plugimi i pranverës, i verës, i vjeshtës dhe i dimrit, madje përmendi se si të ndreqeshin edhe gabimet e bëra gjatë plugimeve. Pikëpamja e tij për metodën e pasurimit të tokës arriti nivelin botëror të asaj kohe.

Gja Sixie i kushtonte vëmendje shumtë të madhe mësimit nga përvoja e brezave të mëparshëm. Ai shfletoi mjaft materiale të lashta, duke i studiuar me seriozitet të gjitha ato materiale që kishin lidhje me prodhimin bujqësor dhe me jetën e popullit. Në më se 150 pjesë të veprës së tij "Çi min yao shu", iu referua fjalëve në veprat e brezave të mëparshëm. Megjithëse disa pjesë të këtij libri janë humbur, kuintesenca e tij është ruajtur edhe më sot. (Zheng)